Mâu hâi ki kố, a ƀuôn Akŏ Dhông, pơlê kong kơdrâm Ƀuôn Ma Thuột kơdrâm kơdrĕng tơmối ôm hyô tung kong pơlê ƀă kong pơlê ki ê, kuăn pơlê pin rêh ối pêi cheăng a kong têa vâi vêh pơlê xiâm tơdah Têt. Klêi kơ’nâi 30 hơnăm hơngế ing pơlê kong kơdrâm pêng păm tuăn pâ, nâ Nguyễn Kim Nguyên rêh ối pêi cheăng a kong têa Mih kơdrâ xua hlo a pơlê xiâm pơhlêh hên, ƀă nâ kơdrâ má môi cho pơhlêh tơdroăng rêh kâ ối dêi pơlê, dế xông tiô rơxông nếo, tơdrêng amê xuân ối rak dêi khôi túa lĕm tro vâi krâ nah. Ôu kơphế tung hngêi trá xŏn (A-rul Haos) Arul House, nâ Nguyễn Kim Nguyên tối tiah kố:

“Á mot akố á xuân hâk mơnâ ‘nâng. A kố môi tiah tung kong kế, môi tiah tơdroăng ki ai khât ‘nâng... ai môi tiah lâi á tối môi tiah mê... hlo lĕm krip ‘nâng’’.

Drêng hên ngế hâk vâ ƀă tơdroăng ki tơtro tiah hmâ ƀă rơhí rơhó a Arul House mê ngê̆ sih ưu tú Vũ Lân, ngế ai lối 40 hơnăm ƀă tơdroăng hriăn plĕng, rak vế khôi túa lĕm tro Tây Nguyên, ƀuôn Akŏ Dhông ƀă tíu mơhno khôi túa lĕm tro Arul House ối cho tíu ki má môi rak vế khôi túa lĕm tro. Pôa tối tơmeăm kơnía khôi túa lĕm tro, malối ‘na rak vế, tôu chêng koăng Tây Nguyên thế cho môi kế tơmeăm ki châ rak tơniăn môi tíu, thế rêh tiô hâi khế.

Ki nhên ga, a Arul House tung ƀuôn Akŏ Dhông ăm hlo, kố cho môi tung mâu troăng prôk vâ pơtối châ rak vế tơmeăm kơnía git tiô khôi hmâ lĕm tro dêi Tây Nguyên châ pơtối tung tơdroăng rêh ối chal nếo:

“Ôh tá xê to rak tiô túa ton mê vâi ối chiâng pro ăm lĕm tro tâ  mê tíu ki nếo môi tiah tíu a Arul kố rơtâ tá xúa tơmeăm rơnuâ pro môi tiah mâu plong loăng lơ djâ plong loăng kố mơhno hên tơdroăng rêh ối tiah hmâ xuân môi tiah tơdroăng pói vâ dêi kuăn pơlê ƀă nôkố vâ ‘măn a rơtâ tá tíu kố. Mê cho mâu tơdroăng ki pơhlêh laga pơhlêh tơtro. Gá pơtối kâi trâng ƀă kong prâi tíu rêh ối kal mơnhông ôm hyô mơjiâng tơdroăng ki rêh ăm kuăn pơlê tung pơlê’’.

Arul House cho môi tíu rêh ối tung hên rơxông, dêi rơpŏng jâ H’Len Niê dêi ƀuôn Akŏ Dhông, bêng Tân Lợi, pơlê kong kơdrâm Ƀuôn Ma Thuột. Jâ H’Len, môi ngế kơdrâi pêi chiâk deăng, bu hmâ ƀă tơdroăng pông tơnêi, kơxah pôu tơmeăm tung pong, xua hiâm mơno hâk tơngăm ‘na mâu kế tơmeăm ki kơnía dêi jâ pôa nah, hiăng chôa ‘lâng mơjiâng tíu rêh ối dêi rơpŏng tơná chiâng môi tíu chôu ‘măn rak vế khôi túa lĕm tro Rơđế ƀă ôm hyô hngêi tê tơmeăm kơchâi kâ dêi Rơđế tiô khôi vâi krâ nah.

“Á hâk vâ á tơmiât ƀă á pêi tiô troăng á tơmiât ôh tá xê á cho ngế ki tê mơdró. Ki ai drêng amê cho á hlo cho ki kơnâ khôi túa lĕm tro jâ pôa nah ‘măn ăm. Xua Arul cho môi tơdroăng hơ’muăn dêi tơdroăng rêh ối dêi H’Len-cho tơná á kố, hdroâng Arul cho inâi kơjôi dêi pâ á mê. Á tơmiât á cho um méa dêi nôu pâ xuân cho môi ngế kuăn dêi tơnêi Việt Nam pin hâk vâ mê pin ôh tá pro ‘mêi jâ pôa pin ôh, rêh ối ăm tơnêi têa pin ƀă pin thế mơhno ƀă châ chăn pin ing mâu troăng pêi cheăng ƀă tơpui kâ ƀă á hâk tơngăm’’.

Tơdroăng ki hâk vâ khôi túa lĕm tro dêi Rơđế, pâ khôi túa vâi krâ nah dêi rơpŏng, hdroâng hdrê ƀă pơlê, cho tơdroăng ki mơhnhôk vâ H’Len Niê mơjiâng tíu khôi túa lĕm tro Arul House. Ƀă tơdroăng ki mơhnhôk dêi châ chăn rơdêi ƀă hên tơdroăng tŏng kum tá hiâm mơno, ngế kơdrâi pêi chiâk deăng a pơlê Akŏ Dhông hiăng mơjiâng châ tơƀrê Arul House pêng păm khôi túa lĕm tro Rơđế. Laga drêng hngêi kố châ mơjiâng klêi, H’Len Niê trâm tơdroăng ối pá kong ivá á, mê cho ti tăng liăn vâ Arul House kô lĕm troh tá ah ƀă tíu kố.

Klêi mê, nâ hiăng trâm nâ Trần Thị Châu Phương, ngế ki chiâng rơkê tung kơvâ pêi ôm hyô a Hội An ƀă pơlê kong kân Hồ Chí Minh. Ƀă nôkố, Trần Thị Châu Phương cho Kăn pơkuâ Arul House:

“Drêng mê nah á troh a xăng H’Len ƀă cho mơngế tơmối ôm hyô tê. Á xuân tơmiât ti lâi môi ngế kơdrâi Rơđế mê ai ivá pêi môi tiah mê, ƀă á cho môi ngế tơmối ôm hyô hlo mê cho tơdroăng ki kân mê á nếo vêh rơtế ƀă xăng H’Len. Châ khât á tá hâi pêi châ ki klâi ăm Arul ôh, á hlo a Pơlê vâi rêh ối lĕm ‘nâng, cho rơkê ‘nâng laga tá hâi ai ngế ki pro ăm gá tro hên tâ mê tê. A hngêi vâi kâ ki klâi hâi tiah hmâ kâ ki klâi, hâi leh kâ klâi mê pó pế tơmeăm ki mê, á bu ngế ki pro ăm gá tơtro, pro ăm gá lĕm tâ, ki xiâm khôi túa lĕm tro cho hiăng ai tâi tâng. Ing tung kuăn mơngế dêi rêm ngế mê ing mê Arul mơjiâng chiâng rêm hâi’’.

Nôkố Arul House hiăng cho môi tung mâu tíu ki hmâ ƀă tơmối ôm hyô tung tơnêi têa ƀă kong têa ê rêm roh troh ƀă tíu ki pêi kơphế kân má môi Ƀuôn Ma Thuột. Drêng môi hâi kơdrâm kơdrĕng dêi kơphô̆ Ƀuôn Ma Thuôt rơhĭng rơhối, on khôi túa lĕm vâi krâ nah chếo a plông kân dêi Arul House. Chêng koăng chuât pu hung pu hung, hơdruê eirei ƀă kơhnhon xuăng pêng păm tuăn pâ kuăn mơngế, pơtối tơdjêp kuăn pơlê Akŏ Dhông ƀă tơmối ôm hyô rêm pơlê chiâng môi pơlê pơla.