Tơdroăng hnê tôu 2 to hơkâ – 3 kơtâ koăng – 5 kơtâ chêng cho tơdroăng pêi pro tung tơkêa bro kơxô̆ 6 Hnoăng cheăng xiâm tơnêi têa ‘na mơnhông mơdêk cheăng kâ - rêh ối pơlê pơla kơpong hdroâng kuăn ngo ƀă kong ngo 'na "Rak vế, mơnhông ki kơnía dêi khôi túa lĕm tro dêi mâu hdroâng kuăn ngo rơtế ƀă mơnhông ôm hyô" xua Khu pơkuâ 'na mơhno túa lĕm tro, Tơ'noăng ivá ƀă Ôm hyô Dak Lak pêi pro.

Tung lối 2 khế hriâm tâp, mâu vâi o hok tro Hngêi trung phôh thong hdroâng kuăn ngo ai tíu kâ koi ối pơtê Đinh Núp, cheăm Phú Mỡ ƀă mâu droh rơtăm cheăm Xuân Lãnh hiăng châ mâu ngê̆ nhân, vâi krâ ki rơkê  hnê ‘na kih thuât tôu chêng tơgôu koăng, rêi prôa, rêi têng nêng chiâng khât; pơtâp mâu ƀai kơhnhon xuăng rơtế ƀă tơrêm idrâp koăng, ƀai chêng.

Jâ Nguyễn Thụy Phương Hiếu, Kăn phŏ pơkuâ Khu pơkuâ 'na mơhno Túa lĕm tro, Tơ'noăng ivá ƀă Ôm hyô kong pơlê Dak Lak tối ăm ngin 'nâi, klêi kơ'nâi hâi khế kơnôm châ mâu ngê̆ nhân, vâi krâ hnê tối, tôu, rêi, mơđah tôu chêng tơgôu koăng, kơhnhon xuăng, rơngê ting ting, mâu vâi o hlê plĕng rĕng, hâk vâ pơtâp ƀă kô chiâng pêi pro lĕm tro mâu ƀai tôu  chêng tơgôu koăng rơtế ƀă mâu leh mơdĭng tiô khôi hmâ dêi hdroâng kuăn ngo tơná. Klêi kơ'nâi po lâm hriâm kố, mâu vâi o kô chiâng vâ pơtối hnê mơhno, pơtâp vâ chiâng mâu ngế ki pơtối rak vế mâu tơdroăng ki kơnía git túa lĕm tro dêi hdroâng kuăn ngo tơná.

“Mâu vâi muăn hiăng ai tơdroăng ki hơ'lêh hên ‘nâng. Kơnôm châ mâu vâi krâ ki rơkê hnê, mâu vâi muăn hiăng pơxiâm rơbot ƀă mơđah tơbleăng rơkê khât mâu ƀai chêng koăng, xuân môi tiah mâu túa kơhnhon xuăng. Kố cho rôh ki pơxiâm ki hiăng pro tơná pin châ tơ'lêi hlâu. Khu ngin pói vâ hngêi trung kô pơtối mơjiâng khu hok tro kố ah chiâng môi khu ki xiâm vâ mơnhông hnoăng cheăng kố tung la ngiâ. Ing mê, mâu vâi o kô ai hên rôh châ veăng mơhriâm, pơtâp, hnê tơdjâ mâu tơdroăng tơ'noăng, tơ'noăng tôu chêng koăng akố ôh tá xê to tung pơlê pơla mê ối tơ’noăng a mâu hngêi trung hdroâng kuăn ngo ai tíu kâ koi ối pơtê ƀă mâu hngêi trung tung kong pơlê vâ tơpui tơno, hriâm tâp, veăng kum rak vế khôi túa lĕm tro dêi hdroâng kuăn ngo tơná."

Túa ki tôu mơđah tơbleăng péa to hơkâ – pái kơtâ koăng – pơtăm kơtâ chêng cho tơdroăng ki tơrŭm dêi pái túa prôa ki tối, péa to hơkâ – pái kơtâ koăng – pơtăm kơtâ chêng tung idrâp, rơ-rêk ƀă tơdrá chuât ki pơto pơtih vâ mơjiâng chiâng môi túa ngê̆ thuât mơđah tơbleăng ki rơkê, ro rih má môi. Idrâp dêi péa to hơkâ – pái kơtâ koăng – pơtăm kơtâ chêng  ai hên tơdrá chuât tơniâ, rơ-eăng pơrá phá dêi pó, ai mâu tơdroăng ki kơnía git khât dêi túa ki mơđah tôu chêng koăng.

Xua mâu tơmeăm kố ga ai pơxúa kân, kơnía lĕm khât mê hơnăm 2015, Ngê̆ thuât mơđah tơbleăng Tôu chêng tơgôu koăng - Kơhnhon xuăng - Rơngêi ting ting châ Khu xiâm ngăn 'na mơhno Túa lĕm tro, Tơ'noăng ivá ƀă Ôm hyô mơnhên tối cho tơmeăm khoăng ki kơnía git dêi tơnêi têa.

Tơdroăng ki tơkŭm po leh mơdĭng a rôh apoăng rơnó hơngui ôh tá xê to tơdroăng ki mơhno túa lĕm tro dêi pơlê pơla mê ối cho hnoăng ki vâ rak vế ƀă pơtối mơdêk ki kơnía git dêi tơmeăm khoăng mơhno túa lĕm tro. Pôa La Văn Hãng, Kăn pơkuâ ƀơrô ngăn 'na mơhno túa lĕm tro dêi cheăm Xuân Lãnh, kong pơlê Dak Lak tối ăm ngin 'nâi:

“Ing hơnăm 2016 troh nôkố, kong pơlê pơtối tơkŭm po leh mơdĭng vâ rak vế ƀă mơnhông khôi túa lĕm tro dêi hdroâng kuăn ngo a Xí Thoại tối krê ƀă Xuân Lãnh tối tơdjuôm. Ngin khŏm mơ-eăm pêi pro hnoăng cheăng ki mê, mơhé klêi kơ'nâi 'mot tơkŭm pêi cheăng tơnêi têa péa râ ối trâm hên pá puât to lâi ngin xuân pơtối tơkŭm po vâ pro tơ'lêi hlâu ăm kuăn pơlê mâu hdroâng kuăn ngo châ trâm mâ, hriâm ƀối dêi pó túa ki rơkê, ki lĕm tro ƀă pơtối rak vế, mơnhông khôi túa lĕm tro mê dêi hdroâng kuăn ngo tơná”.

Péa to hơkâ – pái kơtâ koăng – pơtăm kơtâ chêng cho tơmeăm khoăng ki lĕm tro dêi hdroâng kuăn ngo Bơhnéa ƀă Chăm, châ rak vế ƀă hnê mơhno ing hên rơxông. Ing mâu leh mơdĭng pơlê pơla troh lâm hriâm hâi kố, idrâp Péa to hơkâ – pái kơtâ koăng – pơtăm kơtâ chêng xuân ối chuât xơtó, tơdjêp rơxông ối nếo ƀă khôi túa lĕm tro dêi hdroâng kuăn ngo tơná.

Tơdroăng kơvâ cheăng ki ngăn ‘na túa lĕm tro dêi kong pơlê Dak Lak tơkŭm po hnê ăm mâu vâi o hok tro ôh tá xê to veăng kum rak vế mâu  tơmeăm khoăng ki kơnía git, mê ối mơjiâng tơ'nôm mâu ngế hơnăm ối nếo hâk git, vâ khât tơdroăng túa lĕm tro mê pơtối châ rak vế, mơnhông ƀă lân rơdâ troh lâp lu tung tơdroăng rêh ối chal nếo hâi kố.