Cheăm Dak Ha, tơring Dak Glong cho môi tung mâu tíu ki troh “têa ƀă on” tung tơmeăm khoăng ki kơnía git dêi Tơnêi hmốu Lâp plâi tơnêi UNESCO Dak Nông. Pôa KɃang, hdroâng M’Nông, cho ngế ki rơkê tĕn tơmeăm a pơlê Ting Wel Đăng, cheăm Dak Ha tối ăm ‘nâi, tơdroăng ki kong pơlê rah xo pơlê kố cho tíu ki pơtê chêng vâ hyô ngăn ‘na tơmeăm khoăng ƀă po troăng hơlâ ôm hyô pơlê pơla hiăng po troăng vâ mơnhông pêi cheăng kâ ăm kuăn pơlê. Mơngế M’Nông tíu kố dế hbrâ rơnáu hiâm tuăn vâ tơ’mot rơtế mơnhông ‘na ôm hyô, tơdroăng tê mơdró kâ.

“Hnoăng cheăng tiô khôi hmâ vâi krâ hdroâng kuăn ngo nôkố hiăng châ mơnhông, rế mơjiâng vâ xúa rế vâ tê ăm tơmối ki mot ôm hyô. Môi tiah tĕn tơmeăm khoăng kố, vâi kơnốu tung pơlê ngế ki lâi xuân athế ‘nâi, rế rak vế dêi tơdroăng cheăng, rế pêi lo liăn ngân hên”.

Rơtế prôk vêh troh a Tơnêi hmốu lâp plâi tơnêi UNESCO Dak Nông, tơring Krông Nô cho tíu ki ai hên tơnêi tíu ki krip lĕm, tơdrŏm, kong kế ngo ngối, ƀă kuăn pơlê cho hdroâng kuăn ngo ối rak vế dêi khôi túa, vêa vong hdroâng kuăn ngo. Pôa Y Suơ Hlong, pơlê Dru, pơlê kân Dak Mâm, tơring Krông Nô, hâk tơngăm drêng pôa kot mâ nah, cho tíu ki kro mơdrŏng ‘na khôi túa, vêa vong, hên túa lĕm tro ƀă hên tíu ki krip tơdrŏm. Tung mê, xuân chiâng vâ hơ’muăn tối môi tiah xí Drai Sap, ƀă mâu kiâp hmốu, ngo on.

“Á hơniâp ro khât drêng hlo mâu tơnêi tíu ki krip lĕm môi tiah xí Drai Sap lơ kiâp hmốu ngo on hiăng châ xúa, pơtối mơdêk rơtế ƀă khôi túa lĕm tro tiô khôi hmâ dêi hdroâng kuăn ngo vâ mơnhông pêi cheăng kâ, rêh ối pơlê pơla. Hên vâi krâ-nhŏng o hiăng veăng pêi pro ƀă tê mơdró kế tơmeăm, tơ’mot tơmối mot ôm hyô, tơdroăng rêh kâ ối rế hiá rế thăm mơdêk”.

Jâ Tôn Thị Ngọc Hạnh, Kăn phŏ hnê ngăn Vi ƀan kong pơlê Dak Nông tối ăm ‘nâi, kong pơlê kơnôm châ ai hlâu xêh kong kế, ngo ngối ki lĕm krip, tơdrŏm, mê tơmeăm khoăng ki vâ po ôm hyô ăm tơmối mot ngăn mâu tơmeăm khoăng ki krip krih, mâu tơmeăm khoăng ki tơdrŏm, lĕm mơnâ mâ ngăn. Hên xí têa ối hmuâ dêi tơná tung mâu kong kế, môi tiah Dak Glun, Drai Sap, Gia Long, Trinh Nữ ƀă hên hĕng mâu tơmeăm khoăng ki ê hía. Tơdrêng amê, cho kơpong kiâp hmôu ngo on, Kơpong ki rak vế mâu tơmeăm khoăng Nam Nung, Kơdrum kong ilâng Tà Đùng, long Tà Đùng ai vâ chê 40 rơlốu kân kŭn, châ pơtih cho Ving Hạ Long a Tây Nguyên”. Ki rơhêng vâ tối, Dak Nông kro mơdrŏng ‘na khôi túa, vêa vong dêi 40 hdroâng mơngế kuăn ngo nhŏng o rơtế rêh ối. Tâi tâng mâu tơmeăm ki mê chiâng kơpong ki krê xêh dêi Tíu Ôm hyô Tơnêi hmốu Lâp plâi tơnêi UNESCO Dak Nông.

Vâ pơtối mơdêk mâu tơmeăm khoăng, ki ai xêh hlâu mê, Tơdroăng pơkâ hneăng hop kân Đảng ƀô̆ kong pơlê Dak Nông roh má 12 vêh mơnhên, mơnhông ôm hyô cho môi tung 3 hnoăng cheăng ki vâ mơnhông pêi cheăng kâ dêi kong pơlê. Jâ Tôn Thị Ngọc Hạnh tối ăm ‘nâi, ƀă mâu troăng hơlâ ki pơkâ mơnhên mê, pơkuâ ngăn, tơdjâ pêi ki nhên, tung mâu hơnăm hdrối mê hía nah, Dak Nông dế chôa ‘lâng hvêa chêng prôk tơdjâ ôm hyô tung lơgât dêi lâp plâi tơnêi.

“Vâ tơdrêng, tơ’mô, tơrŭm tâi tâng mâu túa cheăng mê hnoăng cheăng ki pơkal ƀă ngin hiăng chôa ‘lâng pơkâ mơjiâng mâu túa cheăng, mâu tíu ki mot trâu hơngế dêi tơdroăng hnê hriâm, thăm mơdêk hiâm tuăn dêi pơlê pơla. Pro ti lâi vâ kuăn pơlê chiâng hlê plĕng, tơrŭm, tơdjêp ƀă ing tơná kuăn pơlê cho ki xiâm dêi tơdroăng ki ‘no hnoăng cheăng veăng rak ‘măn, chôu vế, mơnhông mâu tơmeăm khoăng, chôa ‘lâng pơtối mơdêk, vêh ‘mâi mơnhông, pơtối rak vế mâu khôi túa, vêa vong ki lĕm tro dêi mâu hdroâng kuăn ngo. Kring vế, rak ngăn tơniăn túa lĕm tro, tơmeăm khoăng ăm mơnhông ôm hyô ƀă rơtế prôk ƀă mơnhông pêi cheăng  kâ, rêh ối pơlê pơla dêi kong pơlê”.

Ing tơdroăng ki ai hlâu dêi túa lĕm tro ki krê xêh mê, tơnêi tíu, kong kế, ngo ngối ki kân krip, lĕm tơdrŏm, hyôh kong prâi rơngiâp lĕm plâ rơnó, plâ hơnăm, tơdrêng ƀă mâu troăng hơlâ ki mơ’no liăn tro troăng, pói tơngah tung la ngiâ ôh pa hơngế, tơdroăng ôm hyô Dak Nông kô mơnhông ó rơdêi, tơ’mot tơmối vêh tơkŭm troh a Tíu Ôm hyô Tơnêi hmốu Lâp plâi tơnêi UNESCO Dak Nông.