VOV4.Sêdang - Xông tơpui a roh hôp mơ’no tơdrêng tung um tiô troăng măng Internet lâp tơnêi têa Khu hnê mơhno tơnêi têa ƀă Khu hnê mơhno 63 kong pơlê, pơlê kong kơdrâm vâ mơnhên tơdroăng châ tơƀrê apoăng tung hbrâ, mơdât pơreăng COVID-19 tung roh má 4 ƀă tơpui tơno mâu hnoăng cheăng, túa cheăng hbrâ, mơdât pơreăng, mơnhông cheăng kâ – rêh ối pơlê pơla tung la ngiâ tơkŭm po a kơxo lơ 17/10, pôa Phạm Minh Chính, Ngế pro xiâm hnê ngăn Chin phuh, Kăn xiâm pơkuâ hnê mơhno tơnêi têa hbrâ, mơdât pơreăng COVID-19 tối nhên, thế môi tiah sap apoăng troh mơ’nui, môi tuăn tung pơkuâ, hnê mơhno, tơkŭm pêi pro mâu troăng hơlâ, pơkâ pêi, pơkâ tung hbrâ mơdât pơreăng vâ môi tuăn tung lâp tơnêi têa, khu râ kăn pá xôp thế pêi tiô râ kăn kơpêng pơkâ; râ kăn pá xốp ôh tá chiâng tơbleăng ăm pêi pro pơkâ ki ôh tá tro ƀă pơkâ dêi râ kơpêng.

Hâi lơ 11/10, Chin phuh hiăng tơbleăng ăm pêi pro Pơkâ kơxô̆ 128 ‘na Pơkâ pơtân ‘’Kâi trâng tơniăn, ƀeăn ƀĕng rơkê, mơdât châ tơƀrê pơreăng COVID-19’’. Nôkố, hên kong pơlê, pơlê kong kơdrâm hiăng pro pơhôi klâ kơtăn pơlê pơla, pơ’lêh chôa ‘lâng kâi trâng tơniăn, ƀeăn ƀĕng rơkê, mơdât châ tơƀrê pơreăng COVID-19.

A roh hôp kố, Khu hnê mơhno Tơnêi têa ƀă Khu hnê mơhno mâu kong pơlê kô séa ngăn klêi môi măng t^ng pêi pro Pơkâ kơxô̆ 128 dêi Chin phuh. Ki rơhêng vâ tối, séa ngăn ‘na mâu tơdroăng ki ối tơvâ tơvân tung pơkâ, ki má lối cho mâu tơvâ tơvân tung pêi pro vâ ai pơ’lêh teăm tơdrêng, thế mơjiâng tơdroăng môi tuăn ing tơnêi têa troh kong pơlê.

4.Mâu hâi kố, hên kong pơlê, pơlê kong kơdrâm tung kơpong tơbăng kroăng Cửu Long pơtối tơbleăng pơkâ ƀă hnê mơhno nhên vâ pêi pro Pơkâ 128 dêi Chin phuh. Tiô pơkâ dêi Viƀan kong pơlê Sóc Trăng, a drêng kố kuăn pơlê thế pêi tiô pơkâ thế 5K dêi Khu xiâm ngăn pơkeăng ƀă khăm pơlât. Xuá mâu phân mêm kŏng nghê̆ thông tin tiô pơkâ vâ tơbleăng ăm ƀok thái pơkeăng, kĭ pâk vaccine, khăm pơlât. Ƀă tơdroăng prôk lo/mot a kong pơlê, mơngế kong pơlê Sóc Trăng châ prôk lo ing kong pơlê laga thế pêi tiô mâu pơkâ hbrâ, mơdât tiô pơkâ dêi khu xiâm, kơvâ cheăng tơnêi têa. Kong pơlê Tiền Giang xuân hiăng ai pơkâ tơbleăng tâi tâng kong pơlê châ râ má 2 (ki tơ’lêi tơdế). Viƀan kong pơlê Cà Mau nếo tơbleăng pơkâ pơtân ‘’Kâi trâng tơniăn, ƀeăn ƀĕng rơkê, mơdât châ tơƀrê pơreăng COVID-19’’ tung kong pơlê. Pơtối mê, mâu ngế troh ing kơpong ki tơ’lêi iâ ƀă tơdế châ phêp mot tung kong pơlê. Pêi pro Pơkâ 128 dêi Chin phuh a rơnó kố mê kuăn pơlê tung kơpong tơbăng kroăng Cửu Long châ phêp prôk lăm tung kơpong ngiêt lơ kơpong ngiêt tung kong pơlê. Mâu rơxế pơto tơmối lăm troh mâu kong pơlê xuân tá hâi chiâng kơtâu. Bu ai kong pơlê Vĩnh Long nôkố rêm hâi bu ai 1 roh rơxế pơto tơmối prôk lăm troh ƀă vêh pơlê kong kân Hồ Chí Minh pơxiâm sap hâi môi lơ 18/10.

A Sa Ly tơplôu ƀă tơbleăng