VOV4.Sêdang - 9 khế, vâ riân ngăn rêm khế ai lối 10 rơpâu khu mơdró kâ pâ pơtê ing khu tơrŭm tê mơdró kâ, tung pơla mâu khu mơdró kâ ki nếo châ mơjiâng ƀă kơxô̆ liăn ki tơkêa vâ mơdró kâ xuân hiăng kơdroh hên ó tâng vâ pơchông ngăn ƀă rơnó kố dêi hơnăm nah. Drêng ai mâu tơdroăng ki xahpá dêi khu mơdró kâ mê, Ngế pro xiâm hnê ngăn Chin phuh hiăng ai troăng hơlâ pơkâ thế nhên khât mê cho athế rêh ối tơchoâm tơniăn ƀă COVID vâ mơnhông pêi cheăng kâ.

Tiô Kơ koan xiâm xêo kế tơmeăm khoăng, xua tơdjâk pơreăng COVID-19, tơdroăng mơjiâng pro tơmeăm tro tot, 9 khế hiăng hluâ ai lối 90 rơpâu ngế tê mơdró ôh tá ai tơmeăm ki klâi xếo, tâk 15,3% tâng pơchông roh kố hơnăm nah (dâng rêm khế lối 10 rơpâu khu tê mơdró pơtê tơdroăng tê mơdró). Xuân tung khế 9 kố nah, bu ai dâng 85 rơpâu khu tê mơdró nếo mơjiâng, kơdroh 13,6% tâng pơchông ƀă roh kố hơnăm nah. Rơtế amê, kơxô̆ liăn kĭ mơ’no xuân kơdroh tâng pơchông roh kố hơnăm hdrối.

Pôa Phạm Đình Thúy –Kăn xiâm pơkuâ Kơ koan xêo ngăn tơmeăm khoăng Kơmăi kơmok ƀă mơjiâng, Kơ koan xiâm xêo kế tơmeăm khoăng, Khu xiâm pơkâ túa cheăng ƀă mơ’no liăn cheăng tối:

‘’COVID xông tâ tú sap apoăng hơnăm 2020, troh nôkố hiăng vâ chê 2 hơnăm. Khu tê mơdró ôh tá kâi vâ pơtối mơ’no liăn cheăng. Tá hâi ai hơnăm ki lâi mê kơxô̆ khu tê mơdró mơjiâng iâ tâ tâng pơchông khu tê mơdró thế pơtê mơjiâng tơmeăm khoăng, pơtê môi tiah hơnăm kố’’.

Pôa Nguyễn Quang Huân – Kăn teăng mâ Kuô̆k hô̆i hneăng má 15, Kăn phŏ hnê ngăn Khu ngế tê mơdró krê Việt nam mê tối ăm ‘nâi:

‘’Tung pơla kố nah thế klâ kơtăn ton hâi a hên kong pơlê, ki rơhêng vâ tối ƀă Pơlê kong kân Hồ Chí Minh, Hà Nội, mâu kong pơlê ai kơpong pơreăng xua mê kơxô̆ khu tê mơdró thế pơtê tê mơdró cho tơdroăng ki tơ’lêi plĕng ƀă thế môi tuăn xua tơdrêng châ 2 pơkâ rế mơjiâng pro tơmeăm khoăng tê mơdró rế hbrâ mơdât pơreăng cho pá ‘nâng, xua mê pin thế kơjo ăm mâu tơdroăng ki lâi kal pêi hdrối. Mơhúa ‘nâng, troh nôkố, Ngế pro xiâm hnê ngăn tơnêi têa hiăng ai troăng tơmiât hnê mơhno nhên cho rêh ối tơdjuôm tơniăn ƀă COVID vâ mơnhông mơdêk cheăng kâ, á tơmiât tơdroăng kố kô châ pơ’lêh tung mâu khế mơ’nui hơnăm’’.

Rơtế tơmâng mâu troăng ki lâi vâ khu tê mơdró hiăng ƀă dế ối kâi pêi cheăng tê mơdró kô chiâng pơtối mơjiâng pro tê mơdró; troăng pêi ki lâi vâ mâu khu tê mơdró dế tơniăn pêi kâ – tê mơdró kô rĕng mơnhông tung hneăng la ngiâ, jâ Phí Thị Hương Nga – Kăn phŏ pơkuâ Kơ koan xiâm xêo kế tơmeăm khoăng Kơmăi kơmok ƀă Mơjiâng, Kơ koan xiâm xêo kế tơmeăm khoăng, Khu xiâm pơkâ túa cheăng ƀă mơ’no liăn cheăng pơkâ thế:

‘’Mơhé mâu khu tê mơdró hiăng mơ-eăm, laga xua pơreăng COVID-19 xông tâ tú tung  môi pơla ton pro ivá hbrâ mơdât dêi khu tê mơdró kơdroh. Khu tê mơdró pơtê tơdroăng pêi cheăng 9 khế apoăng hơnăm ki hên cho khu tê mơdró ki mơ’no liăn cheăng pá kơdâm 5 rơtal liăn. Tơdroăng tŏng kum kơdroh kơxô̆ liăn ăm mâu khu tê mơdró cho kal khât, pơtih ăm phêp khu tê mơdró khăm ngăn COVID ƀă mâu pơkâ mơjiâng pro kế tơmeăm khoăng – tê mơdró, xuân tơniăn mâu pơkâ ‘na hbrâ mơdât COVID-19 ƀă mâu kong pơlê kal tah lôi mâu mơ-éa phêp ki kŭn pro pá ăm khu tê mơdró’’.

Mơgêi roh hôp Chin phuh tiah hmâ khế 9 pơla kố, pôa Phạm Minh Chính, Ngế pro xiâm hnê ngăn tơnêi têa tối rơdêi mâu tơdroăng xiâm ki kal, tung mê ki rơhêng vâ tối cho tơmâng troh tơdroăng pêi cheăng dêi Khu tê mơdró. Ki nhên cho pêi pro tơdrêng mâu troăng vêh tơniăn tơdroăng pêi cheăng a mâu kơpong hngêi kơmăi kơmok, kơpong cheăng kâ, kơpong xúa kơmăi kơmok rơxông nếo, mơ-eăm mơjiâng pro tơmeăm khoăng ăm rơnó kal hên tơmeăm khoăng, ki má lối cho mâu pú hmâ rôe hên tơmeăm khoăng a châu Âu, Mih, peăng mâ hâi lo pá kơnhŏng châu Á.

Tơkŭm po pêi pro, xúa mâu roh ing mâu tơdroăng tơkêa bro tê mơdró tơ’lêi hlâu hiăng kĭ tơkêa. Xêo tơmiêt, tối hdrối tơdroăng mơjiâng pro kal vâ tơmeăm khoăng roh mơ’nui hơnăm vâ ôh tá ăm ai tơdroăng tá bê tơmeăm khoăng.

VOV1 rah chêh

A Sa Ly tơplôu ƀă tơbleăng