Tung roh po kơchơ mơđah tơbleăng kế tơmeăm, châ po a Ƀuôn Ma Thuột, mâu kế tơmeăm ki châ dó inâi OCOP ƀă kế tơmeăm dêi mâu cheăm bêng la lâi xuân ai kơdrâm mơngế lăm ngăn, tí tăng rôê. Nâ Huỳnh Thị Thủy, môi ngế ki hmâ rôe xúa kế tơmeăm a kong pơlê Dak Lak ai tối ăm ngin tiah kố:  Tơdroăng ki nâ rơhêng vâ tí tăng ‘nâi plĕng vâ rôe xúa mê cho ki dâi lĕm dêi kế tơmeăm, tíu xiâm ki mơjiâng kế tơmeăm. Nâ hiăng tí tăng rôe mâu tơmeăm ki hmâ xúa, ki nhên ‘na xiâm rêi ƀă ki rơhêng vâ tối cho mơngế Việt Nam ki mơjiâng pro kế tơmeăm mê, xua mê, xuân cho vâ mơhno hiâm mơno nâ rơhêng vâ tŏng veăng tí tăng rôe tơmeăm dêi Việt Nam.

“Á pói rơhêng vâ mâu kế tơmeăm ki châ mơjiâng mê rế hía rế dâi lĕm luâ tâ, châ tơbleăng mơ’no tê tung tíu ki kân rơdâ vâ rêm ngế kuăn pơlê châ tơ’lêi hlâu vâ châ rôe, châ xúa, châ dâi. Pakĭng ki dâi lĕm dêi kế tơmeăm, mê um méa xuân kal há, xua ga, mơngế ki hmâ tăng rôe kế tơmeăm ki ahdrối tâ, vâi kô ngăn a tơdrong, kơhôp, chhá ki kơxu kế tơmeăm, kế ki lâi mơnâ mâ ngăn mê vâi kô vâ ngăn, vâ rôe kế tơmeăm ki mê hên tâ. Tâng rơtế xuân môi túa kế tơmeăm ki mê, ga ai hên túa, hên túa, gok gâ um méa, mê ga kô pro hên ngế rơhêng vâ ngăn, vâ hlo, vâ rôe tâ.”

Ki pơhlêh tung túa hlo ngăn kế tơmeăm ki vâ tê rôe mê, nốkố xuân cho tơdroăng ki kal kân khât, mê xuân cho kế tơmeăm ki vâ mâu tíu ki pêi pro mơjiâng mê xuân athế pơhlêh hên tiô túa ki nếo. Tung kơvâ ki pơchoh chêp kơpó hmân ếo, jâ Nguyễn Thị Đượm, Kăn pơkuâ ngăn ‘na tĕn, rơneăm ếo pơtâk tiô khôi túa dêi Tây Nguyên a bêng Ƀuôn Ma Thuột hiăng hlê plĕng nhên mâu tơdroăng ki pói vâ dêi kuăn pơlê ki pói vâ rôe xúa kế tơmeăm ƀă chân tuăn tung pơhlêh túa mơjiâng pro vâ khoh châ tê ăm tơmối. Jâ Đượm ai tối tiah kố:

“Tiô kơ tuăn mơno dêi kuăn pơlê ki kal vâ rôe nôkố, mâu tơmối ki lăm troh a Buôn Ma Thuột, mê vâi hmâ hâk vâ dâi mâu ếo pơtâk hmân tiô khôi hmâ ƀă xuân ai mâu ngế ki ‘nâi vâi hâk vâ rơnuâ hmân ếo tiô chal nếo. La ki hmâ hlo, vâi nhŏng o, vâi tơmối rơhêng vâ sap rơnuâ ếo pơtâk hmân tiô khôi hmâ hên tâ. Ki rơdêi dêi tơná mê cho kal athế tĕn mơjiâng, pơchoh kế tơmeăm tiô tuăn i hiâm dêi nhŏng o, tơmối rơhêng vâ.”

Ƀă mâu kế kâ, hên hngêi mơdró, hên tíu pêi cheăng xuân po xêh túa cheăng kâ ki nếo. Nâ Dương Thị Trúc Linh, ối a bêng Tuy Hoà, kong pơlê Dak Lak - Kăn pơkuâ ngăn tíu mơdró Út Vũng Tàu, cho mơdró to mâu kế tơmeăm ki châ dó inâi OCOP 3 hơlŏng, ai tối ăm ngin tiah kố:

“Mâu tơmeăm ki pêi mơjiâng pơrá châ mơjiâng pro ing pơlê cheăm, châ hlá mơ-éa mơnhên hưh cơ mê ai hên kuăn pơlê rơhêng vâ rôe xúa kâ. Tiô tơdroăng ki pói rơhêng vâ dế nôkố, mê cho kâ tơmeăm ki krúa, maluâ ƀă mâu kế kâ ăm vâi hdrêng, vâi ‘nĕng. Kố cho hneăng ki thăm mơdêk má môi ki ngin dế tơkŭm pêi pêt mơjiâng.”

Mâu khu mơdró kâ ki kân xuân dế pơhlêh nhên ‘na túa ki vâ tê tơmeăm ăm tơmối, kuăn pơlê. Tiô nâ Châu Yến Duyên, cheăng tung Kŏng ti pêi cheăng tiô rơnó Yến sào Thành Dung, a cheăm Krông Pač, kong pơlê Dak Lak ai tối: Ahdrối nah, kŏng ti ki hên tơkŭm păn, mơjiâng yến sào ki krúa lĕm vâ mơ’no tê troh a kong têa vâi ê. Laga, nôkố, kŏng ti ki kố hiăng châ tê hên a mâu hngêi kơchơ tung tơnêi têa, klêi mê, mơjiâng pro hên tơmeăm kâ, tơmeăm ôu ing mê, pro hên ngế tơmối, hên ngế kuăn pơlê rơhêng vâ rôe ôu, rôe kâ.

“Kŏng ti hiăng hriăn plĕng ƀă mơjiâng mâu kế tơmeăm ki tơtro ƀă mâu kuăn pơlê ki hmâ vâ rôe, trối yến sào ki tâ tung klŏng, ga ai hên túa, hên um méa, hên ki xú pơ-ou, xú lĕm vâ kuăn pơlê tăng rah dêi xêh. Pakĭng mê, ngin ối mơnhông pêi mơjiâng yến sao ki têng, tê ƀă yă ki tơtro krâ kơvâ, vâ tơ’lêi ăm kuăn pơlê rôe xúa vâ ôu, vâ kâ.”

Mâu tơdroăng ki veăng lăm rôe dêi kuăn pơlê ƀă tơrŭm tê mơdró dêi khu mơdró ăm hlo, tơdroăng ki tơdjêp, tơrŭm pơla péa pâ rế hía rế krá rơdêi. Mơngế ki vâ rôe xúa ƀă veăng vâ rôe kế tơmeăm dêi Việt Nam xua ga ai tơdroăng achê, tơdrăng, ƀă tơniăn lĕm; tung pơla mê, khu mơdró kơdo mơ-eăm pơhlêh nếo vâ rak vế tuăn loi ƀă po rơdâ khu ki veăng tơlo liăn ngân vâ tơrŭm cheăng kâ-tê mơdró. Tơdroăng ki tơrŭm mê ôh tá xê to veăng mơjiâng hên kế tơmeăm dêi pơlê cheăm dêi kong pơlê Dak Lak ai mâ a mâu siêu thĭ ki kân, veăng tê mơdró điê̆n tưh, mê ối veăng gum mơjiâng inâi kế tơmeăm Việt Nam rế hía rế hía rế krá rơdêi.