A rôh trâm mâ, rêm pâ hiăng tơpui ‘na hên troăng tơrŭm cheăng vâ po rơdâ tê ăm kong têa ê chính ngạch, hên kơchơ mơdró vâ rôe pakĭng tê ăm kong têa Sinuâ. Khu pêt sầu riêng Dak Lak xuân tơbleăng mâu tơdroăng tơrŭm cheăng, tung mê ai: Mơdêk kĭ tơhbrâ tơrŭm  cheăng ton hơnăm, tơniăn teăng a tê mơdró iâ khế tiô rơnó; Mơhnhôk mâu khu mơdró Sinuâ ‘no liăn pro hnôu ‘măn hngíu, Logistics ƀă ‘măn pro lĕm trâu tâ a mâu cheăm kong pơlê; po tơrŭm hnê mâu ngế pêi cheăng, hnê kih thuât ƀă túa pêi cheăng rak ngăn ăm krúa lĕm.

Dak Lak nôkố ai vâ chê 40.000 ha plâi sầu riêng, pê lo hơnăm 2025 riân vâ chê 400.000 tâ̆n. Kong pơlê hiăng châ peăng Sinuâ kĭ 269 mah kơpong pêt ƀă vâ chê 7.400 ha, 40 tíu kơxuô tâ tung kơthung plâi nếo klêi krí ƀă 11 tíu pro ‘măn plâi sầu riêng hngíu tê ăm kong têa ê.