Tung roh lăm mơnhên ngăn tơdroăng tơrŭm tê mơdró a kơchơ a kong pơlê Dak Lak a khế 8 hơnăm kố, pôa Niick Ruzzo, kăn pơkuâ ngăn Kŏng ti VOS Advisory, a kong têa Mih hiăng hâk kơdeăn mâu tơdroăng ki pro vâ rơnuâ ƀă tơmeăm xúa ing xú tiê̆n. Pôa Niick Ruzzo ai tối, mâu tơmeăm ki mơjiâng pro ing xú tiê̆n ga tơviah, lĕm tro ƀă ôh tá pro ‘mêi troh tơnêi tíu ƀă tơnêi tíu hyôh kong prâi hiăng xo tơ’nôm troăng hơlâ vâ pôa tơdjêp tơrŭm ƀă mơ’no liăn, tơrŭm tê mơdró kâ.

“Á hiăng lăm pôu ngăn môi tung mâu ƀăng deăng ki kân dêi ngoh Nguyễn Phú Tùng vâ châ ngăn, châ hlo tơdroăng ki mơdâ pêt, rak ngăn, ƀă hiăng păng ‘nâng châ hâk nâ xua ing túa ki dâi ing tơmeăm khoăng ki pêt mơjiâng mê. Á hâk mơnâ ‘nâng kô ai roh vâ po rơdâ tíu tê mơdró ƀă tơbleăng tối mâu tơmeăm khoăng ki rơkê dêi ngoh troh ƀă hên ngế tâ”.

Ngế ki pôa Niick Ruzzo ai tơbâ mê cho ngoh Nguyễn Phú Tùng, ngế ki mơjiâng pro xuân cho kăn xiâm pơkuâ ngăn Kŏng ti tơlo liăn cheăng Looffaa, ối a pơlê kong kơdrâm Ƀuôn Ma Thuột, kong pơlê Dak lak. Tiô ngoh Nguyễn Phú Tùng, Loofaa cho tơkéa vâ tối “xú tiê̆n”. Ing tơdroăng ki tí tăng ‘nâi ‘na kơchơ tê mơdró, ngoh Tùng hiăng hlo nhên xú tiê̆n cho tơmeăm ki ai hên tơdroăng vâ xúa, vâ chiâng tơmeăm ki tơtro ƀă tơnêi tíu, hyôh kong prâi. Ngoh ƀă mâu pú hmâ hiăng hriăn plĕng tơdroăng ki mơjiâng mâu tơmeăm, mơjiâng kŏng ti vâ tơdjêp troh tơdroăng ki tê mơdró dêi kế tơmeăm. Ing mâu tơmeăm ki apoăng xúa tung hơpiâp on môi tiah tơmeăm ki xâ krí hdro, kế xâ kơ’lo, kế ki xê hdro, hleăng mơngĕn, loăng ki xếo kơ’lo ƀă hên hĕng mâu tơmeăm ki ê lơ xúa tung hngêi hum môi tiah loăng ki vâ blâi rŏng, tơdrong tâ kơƀŏng hum bă hên hĕng mâu tơmeăm ki ê, tung pơla mơjiâng mê, mâu ngế ki cheăng mê ối rơkê khât tung tơdroăng mơjiâng mâu tơmeăm ki lĕm mơnâ mâ ngăn, môi tiah kơtong yĭng, muâk, kơđo, đoan, kơtep tâ liăn, yêp ƀă hên tơmeăm ki ê. Kŏng ti ối tơkŭm po mâu hneăng tơ’noăng vâ chêh pro mơnhên, tăng troăng pêi pro tiô túa méa ki nếo ai kơnâ tâ, kơnía tâ. Ngoh Nguyễn Phú Tùng tối ăm ‘nâi:

“Dế nôkố, á ai dâng 50 tơmeăm khoăng. Kơchơ ki rôe xo tơmeăm ki mơjiâng pro dế nôkố, cho kong têa Pơhlăng, Hongkong. Mâu kong têa môi tiah Mih, Canada, Nhuk, Hàn Quốc xuân hiăng lăm pôu ngăn kơpong ki pêt mơjiâng tơmeăm kố, lăm pôu ngăn kŏng ti vâ rơtế dêi pó tơrŭm cheăng. Tơmeăm pêi lo dêi ngoh tơkŭm hên cho tơmeăm ki xúa tung hngêi hum, hơpiâp on ƀă mâu tơmeăm ki vâ xúa môi tiah muâk, kơtong yĭng, tơmeăm xâ ƀă hên tơmeăm ê, châ hên ngế rơhêng vâ rôe”.

Xuân tiô ngoh Tùng tối, dế nôkố, rêm khế kŏng ti ai mơjiâng hrĭng rơpâu tơmeăm ki vâ xúa tung hngêi hum, hơpiâp on, krê ƀă mâu tơmeăm ki vâ rơnuâ ga bú iâ tâ, ngăn tiô kơ tơmối ki vâ tí tăng rôe rêm hâi, tơmeăm ki mơjiâng pro hên lơ iâ. Xua dế nôkố, kơxô̆ tơmeăm ki mơjiâng mê ối iâ, tá hâi châ tơxâng ƀă tơdroăng ki mơjiâng pro.

Vâ mơjiâng kơpong ki pêt mơjiâng tơmeăm, vâ chê 2 hơnăm hdrối mê hía nah, kŏng ti tơlo liăn cheăng Loofaa hiăng tơrŭm ƀă 8 rơpŏng kuăn pơlê a pơlê kong kơdrâm Ƀuôn Ma Thuột ƀă tơring Krông Ƀúk pêt lối 20 ha tiê̆n vâ xo xú ga, kĭ tơkêa tơrŭm rôe tiê̆n ai 5.000 1 pŭm tiê̆n. Nâ H’Wen Êban, ối a bêng Khánh Xuân, pơlê kong kơdrâm Ƀuôn Ma Thuột, kong pơlê Dak Lak ai tối, tâng vâ pơchông ngăn ƀă tê tiê̆n kơbâng mê tơdroăng kĭ tơkêa tê rôe ƀă kŏng ti kố pro pơxúa châ tơƀrê hên khât, mơnhông tơdroăng pêi cheăng kâ tơniăn tro tâ.

“Hdrối nah ối a hngêi xuân hiăng pêt tiê̆n drêng kĭ tơkêa ƀă kŏng ti Loofaa môi hơnăm pêt châ rơnó tiê̆n, môi rơnó châ xo dâng 30.000 to, châ pêi lo châ dâng 300 rơtuh liăn 1 hơnăm”.

Ƀă túa ki pêi pêt mơjiâng, rak ngăn tiô kơ túa ki nếo, kŏng ti dế veăng gum ăm tơdroăng mơjiâng cheăng pêi tơniăn ăm 15 ngế pêi cheăng, ƀă kơlo châ kâ sap ing 3 troh 6 rơtuh liăn 1 khế. Nâ Nguyễn Thị Nguyệt Hồng, a bêng Khánh Xuân, pơlê kong kơdrâm Ƀuôn Ma Thuột, pêi cheăng akố tối ăm ‘nâi:

“Á hiăng pêi cheăng akố châ dâng 1 hơnăm kố. Tơdroăng cheăng rêm hâi cho pơchoh, pôe, pêi pro kơtong, muâk. Hnoăng cheăng akố cho tơdroăng ki lĕm ro, tíu ki cheăng ga hmâ ƀă tơnêi tíu, hyôh kong prâi, rêm ngế châ rơtế dêi pó tơrŭm dêi pó, kơlo liăn khế ai châ dâng 5 troh 6 rơtuh liăn mê xuân chía tơniăn”.

Ƀă tơdroăng ki mơjiâng pro hên kế tơmeăm ki nếo ing xú tiê̆n, ngoh Nguyễn Phú Tùng ƀă mâu khu ki tơrŭm cheăng pói tơngah veăng gum thăm mơdêk tơdroăng cheăng pêi, ki châ mơ’no tê dêi kế tơmeăm, pêi châ lo liăn ngân ăm kuăn pơlê. Rơtế ƀă mâu tơmeăm ki pêi lo hiăng châ ai, tíu ki dế tí tăng hlê plĕng ing tơdroăng mơjiâng tơmeăm vâ thăm mơdêk ki kơnía ing xú tiê̆n.