Kŏng ti tê ngi kong têa ê tơmeăm 2-9 (Simexco Daklak) nếo pêi kêi tơdroăng tâ tung kơxâk tơmeăm container tơmeăm kơphế ki lĕm má môi vâ tê ngi kơchơ kong têa Nhuk. Kố cho khu kơphế pơ’leăng ki lĕm má péa dêi Việt Nam châ tê ngi kong têa ê tiô troăng chính ngăch, klêi kơ’nâi khu apoăng a hơnăm 2021 tê a kơchơ châu Âu.

Tŭm 2 khu tơmeăm pơrá dêi kŏng ti Simexco. Ƀă tâi tâng lối 19 tâ̆n ƀă kơnâ lối 120.000 dollars, rêm tâ̆n kơphế roh kố châ kơlo yă tơdâng lối 6.300 dollars, kơnâ má môi sap ing hdrối nah troh nôkố, châ vâ chê 5 xôh tâng pơchông ƀă yă kơphế tê mơdró a nôkố. Tiô Khu tơrŭm kơphế Ƀuôn Ma Thuột, 2023 cho hơnăm má 5 Việt Nam tơkŭm po pêt mơjiâng kơphế ki lĕm ƀă khu kơphế ki lĕm păng ‘nâng kố dế châ pêt mơjiâng a 10 kong pơlê, kơxô̆ kơphế hơnăm 2023 châ dâng lối 200 tâ̆n, tê ki hên a kơchơ kong têa Mih, Italia, Nhuk, Hàn Quốc.