Cho môi tung mâu droh rơtăm plâ hơnăm hmâ ƀă chiâk deăng, kơnôm kơhnâ mơ-eăm hriâm ƀă ƀĕng ƀeăn tung pêi chiâk, khên xúa ki rơkê khoa hok kih thuât tung pêi cheăng kâ, ngoh K’Đức, ối a Đinh Trang Thượng, tơring Di Linh, kong pơlê Lâm Đồng châ tối mơngế ki rơkê kơhnâ dêi pơlê ƀă châ mot tung Đảng.  Drêng đảng viên K’Đức hiăng pơtối rak vế pêi pro hnoăng cheăng djâ troăng ahdrối, kơhnâ hnê tối kuăn pơlê pơ’lêh hdrê pêt, mơdâ pêt kơchâi krúa tiô troăng mơnhông ki pơxúa pêi lo kế tơmeăm.

“Ƀă hnoăng cheăng cho đảng viên hơnăm ối nếo, tung mâu hơnăm hdrối, a hiăng hmâ kơhnâ khât ƀă hnoăng cheăng pêi xua Đảng ủy ƀă mâu kăn pơlê cheăm pơcháu. Tung mê, ai tơdroăng pêi djâ troăng ahdrối tung mơnhông pêi chiâk, pơhlêh hdrê pêt mơdêk pêi lo liăn ƀă hnê kuăn pơlê pêi trối. Môi tiah rơkong Pôa Hồ hiăng hnê đảng viên thế prôk hdrối vâ pơlê pêi tiô kơ’nâi’’.

Môi tiah đảng viên Kly, ối a cheăm Tân Thượng, tơring Di Linh xuân pêi tro hnoăng cheăng djâ troăng a hdrối tung mơhnhôk cheăng kâ rêh ối vâ kuăn pơlê tung pơlê cheăm hriâm trối  hlối pêi tuâ. Sap hâi pêi klêi túa pêt măng tây tiô inâi chêh vâ rôe, kơdrum pôa Kly chiâng kơdrum mơnúa pêt, tơ’mot hên ngế kuăn pơlê troh ngăn vâ ‘nâi vâ pêi trối... Pôa K’Ly ăm ‘nâi, vâ pơhlêh tuăn tơmiêt tung tơdroăng pêi pêt kuăn pơlê thế mơnhên ƀă mâu tơdroăng cheăng pêi ai pơxúa khât.

“Vâ kuăn pơlê ai liăn châ xo tơ’mot rêm hâi, á hiăng djâ troăng a hdrối pêt măng tây vâ xo hdrê loăng pêt iâ khế drêh hdrê loăng pêt ton hơnăm, châ kuăn pơlê hriâm ƀă pêi trối. Nôkố, măng tây tíu tê tơniăn, yă tê sap 70.000  liăn - 100.000liăn/kg, hên mơngế mơdró troh tăng rôe a kơdrum la ôh tá tơmeăm vâ tê. La ngiâ kố ah, a kô mơ-eăm po rơdâ kơdrum deăng pêt va âi hên kuăn pơlê pêt châ xo tơ’mot liăn rêm hâi, hlối tơniăn tung rêh ối”.

Tiô đảng viên “Brao, Kăn pơkuâ hnê ngăn Chi ƀô̆ thôn Hàng Ùng, cheăm Bảo Thuận, tơring Di Linh, tơdroăng pơtối rak hnoăng ki djâ troăng a hdrối dêi đảng viên tung mơnhông pêi chiâk ƀă tơdroăng rêh ối a mâu pơlê hdroâng kuăn ngo cho môi tung mâu tơdroăng cheăng ki kal châ Đảng ƀô̆ tơring Di Linh tơmâng mơnhông pêi. Xua mê, vâ pơhlêh tuăn tơmiêt, túa pêi cheăng dêi kuăn pơlê, đảng viên tung chi ƀô̆ đi đo tơpui tơno ƀă mơjiâng túa cheăng kâ tơtro ƀă tơƀrê. Ai tiah mê ‘nôi kuăn pơlê nếo loi ƀă pêi tiô.

“Hdrối nah, xua pêt kơphế mơdâ dêi hdrê ƀă  kloăng gá, loăng xông kân ôh tá rơdêi, plâi ôh tá ‘nhó hên. Sap hâi pêt hdrê kơphế ki nếo 138 kơphế pơklêp tơkâng mê plâi kơphế hên tâ tâng vâ pơchông ƀă hdrối nah. Kuăn pơlê hlo a pêi cheăng tơƀrê, mê ai hên ngế troh hriâm pêi trối vâ mơnhông cheăng kâ rêh ối  tung rơpŏng hngêi’’.

Tơring Di Linh nôkố ai 4.400 ngế đảng viên, tung mê ai lối 900 ngế đảng viên cho kuăn ngo. Ing ki đảng viên mê cho mâu ngế djâ troăng hdrối tung tơdroăng cheăng pêi, veăng ‘no hnoăng pơhlêh tuăn tơmiêt, túa pêi cheăng tung mâu kuăn pơlê hdroâng kuăn ngo, veăng ‘no hnoăng a tơdroăng mơnhông cheăng kâ-rêh ối dêi tơring Di Linh tối krê ƀă Lâm Đồng tói tơdjuôm.