Kố cho tơdroăng vâ tối pơkâ dêi Vi ƀan kuăn pơlê kong pơlê Gia Lai tung rôh lăm pêi cheăng ƀă Khu xiâm ngăn ‘na chiâk deăng ƀă mơnhông thôn pơlê apoăng khế 8/2024 kố nah. Vi ƀan kuăn pơlê kong pơlê Gia Lai tối, tơdroăng ‘no liăn mơjiâng pro 2 to rơchoâ cho kal, xua ing hơnăm 2012 drêng Hngêi kơmăi on tơhrik An Khê - Kang Nâk hiăng pêi cheăng, têa Kroăng Pa troh mơ’no djâ veh kĕn kroăng Kôn hiu troh Bình Định, pro ƀăng klâng kân ki mơdâ pêt báu a An Khê hiăng ôh tá bê têa.

Têa mêi hiu mot a rơchôa pơlê kong krâm An Khê ối dâng 4 m3 tung 1 yâi, a rơnó tô mơdrăng tung long rơchôa ôh tá ai têa, mâu tíu ki ‘nâ têa toăng chiâng pro ‘mêi. Pôa Đặng Quốc Hoài Huy, Kăn phŏ hnê ngăn Vi ƀan kuăn pơlê dêi pơlê kong kong krâm An Khê tối, tơdroăng ôh tá ai têa, pro ‘mêi hyoh kong prâi kô tăng troăng tơkâ luâ xơpá tâng rơchôa a Kroăng Pa rĕng châ ‘mâi pro.