Tâng dêi a hngêi ngăn ngi hno têa kơtăn ing hngêi bu to lâi hvêa chêng prôk, nâ H’Uốt Niê, a ƀuôn Kla, cheăm Krông Ƀuk, tơring Krông Pač tô tuăn ăm dêi rơpŏng hngêi xâu lơ trâm mâu tơdroăng ki ôh tá mơhúa drêng hno têa trâu ó mê nếo bu ai to kế ki kơdât tâ tá ‘nâng ‘nâi dâng krâng chêng. Mâu ngế ki hiăng krâ, mâu vâi hdrêng ki kŭn, tâng ôh tá mơhúa klêh tung hno ki trâu kố mê kô rơ-iêo khât, mơni kô xía vâ, thăm nếo rơ-iêo troh châ chăn, pro mâu rơpŏng kuăn rêh ối tâ tá kố tô tuăn ó pá kâi tối:

“Rơ-iêo ƀă kuăn pơlê, malối cho ƀă mâu vâi hdrêng, hiăng ai ngế ki kơtong klêh tơđôu kŏng, tơpê chêng. Gá rơ-iêo khât la ôh ti ‘nâi bro tiah lâi, vâi pro môi tiah kố mê á xuân ôh ti ‘nâi pro ti lâi lôi xo. Rơhêng vâ vâi kô rơnêu, bro chía a’ngêi, kâk iâ, vâ kuăn pơlê ki rêh tơniăn, mê môi tiah rơpŏng á kố ối ai ngế ki krâ, vâi hdrêng ki kŭn nếo, ôh ti tơniăn ôh yoh”.

Pôa Grik Mlô, ngế ki pơkuâ chi ƀô̆ ƀuôn Kla, cheăm Krông Ƀuk tơring Krông Pač ăm ‘nâi, sap ing nếo tơbleăng ‘no liăn bro hno têa Đ3 tơkâ luâ thôn, vâi krâ nhŏng o hiăng ôh tá vâ môi tuăn bă túa pêi dêi khu kăn pơkuâ tơring ƀă cheăm. Vâi krâ nhŏng o hiăng tối tơdroăng ki bro mơhrê tê kơtiê xuân môi tiah mâu tơdroăng ki ôh tá tơniăn, rơ-iêo dêi hno têa ki kố troh rêm râ khu kăn pơkuâ, la troh nôkố xuân tá hâi hlo pơkâ tơleăng:

“Sap ing rôh ki bro klêi mê hno têa ki kố ôh ti châ xúa. Tơnêi têa ‘no liăn mê liăn hía, hno têa ôh ti châ xúa, tiah mê cho mơhrê tê kơtê liăn ngân tơnêi têa. Rế pro mơhrê tê kơtê, rế bro tơdjâk troh vâi krâ nhŏng o kuăn pơlê, xua tơnêi tơhnah tơhnâp đi đo, hmâ troh a rơnó mê tơnêi tro tơhnah. Hngêi kuăn pơlê ki tâ tá vâi xâu ó khât. Hôp pơlê, trâm mâ kuăn pơlê tối đi đo sap ing mê nah troh nôkố”.

Pôa Nguyễn Tiến Văn, Kăn phŏ hnê ngăn Vi ƀan cheăm Krông Ƀuk, tơring Krông Pač ăm ‘nâi, hno têa Đ3 châ bro klêi a hơnăm 2015, la bu xúa châ 1 hơnăm xo mê chúa lôi tiah mê. Xiâm kối, kố ôh ti xê hno têa xiâm mê bro xŏn tâ hno têa ki xiâm gá ‘nâi tâ klâng. Tiô pôa Văn, hno têa ki kố nôkố hiăng tro kơđu dâi ƀă tơnêi, ôh ti châ xúa xếo:

“Hno têa Đ3 kố pơxiâm ăm xúa a hơnăm 2015, xúa châ dâng 1 hơnăm mê hno têa ki kố ôh tá ‘no têa xếo. Nôkố gá hiăng tro kế tơmeăm xok kơdât troăng têa, tơnêi trâp kơđu tâi.Tơring xuân hiăng lăm séa ngăn ƀă ai tơmiât vâ rơnêu la hlo ôh ti tơƀrê. Nôkố tâng rơnêu mê kơxô̆ liăn ‘no hên khât”.

Hno têa Đ3 xŏn lối 1 rơpâu 400 m, châ Vi ƀan hnê ngăn tơring Krông Pač kĭ ‘no liăn bro a hơnăm 2013, cho môi tung mâu kế ối tung Tơkêa bro hno têa Krông Ƀuk Hạ. Klêi kơ’nâi mâu rôh rơnêu hno têa ki kố ai tâi tâng kơlo liăn ‘no vâ chê 15 rơtal liăn. Ki rơhêng vâ tối, hdrối tơring Krông Pač mơjiâng bro hno têa ki kố, Khu pơkuâ ‘no liăn pro ƀă pro hno têa 8 ối tung Khu xiâm ngăn chiâk deăng ƀă Mơnhông thôn pơlê hiăng ai hlá mơ-éa pơkâ kơxô̆ 513/BLQ-TĐ pơkâ thế pơtê pro xua liăn ‘no hên (tâk troh 180 rơtuh liăn tung môi ha) la ôh tá tơƀrê.

Tơdah xo hlá mơ-éa hnê pơchân, Vi ƀan hnê ngăn tơring Krông Pač xuân ối mơhno tơdroăng ‘khŏm mơ-eăm” ƀă môi hlá mơ-éa ki pơtroh tơvêh apoăng khế 10/2013. Tung hlá mơ-éa mê, tơring tối tiah kố tơdroăng ki ‘no liăn bro gá kal khât. ‘No liăn bro hno têa vâ ai têa tôh kế tơmeăm, têa ôu kâ hum roh kô mơdêk tơƀrê ƀă tơdroăng ki xúa ton xŏn, rế hía rế tơniăn tơdroăng reh ối ăm kuăn pơlê tung kơpong, veăng kum mơdêk mơnhông cheăng kâ, rêh ối pơlê pơla dêi kơpong.

Ki rơhêng vâ tối tâ nếo, maluâ hno têa Đ3 hiăng ôh tá ‘no têa xếo, hơnăm 2019 Vi ƀan hnê ngăn tơring Krông Pač pơtối ‘no 850 rơtuh liăn rơnêu. Klêi mê, khế 8/2023, Khu séa ngăn kong pơlê Dak Lak lăm troh ngăn ƀă tối, hno têa ki rơnêu kĭng hno têa bro ƀă hmốu kơnâ 850 rơtuh hiăng tơhnâp, klêh tung hno têa.

Pôa Trần Hồng Tiến, kăn pơkuâ ngăn Đảng tơring, Kăn hnê ngăn Hô̆i đong hnê ngăn tơring Krông Pač ăm ‘nâi, tung tơdroăng ki tơpui mơgêi dêi Khu séa ngăn kong pơlê, khu pơkuâ Đảng, Hô̆i đong hnê ngăn dế pơkâ thế Vi ƀan hnê ngăn tơring tối tơbleăng mâu tơdroăng ki kal tơdjâk troh hno têa Đ3 vâ ai troăng hnê mơhno. Ví tơdroăng ki hno têa kố hiăng ôh tá xúa xếo mê ối pơtối bro mơhrê liăn tê kơtê ‘no liăn ‘mêng rơnêu:

“Khu pơkuâ ngăn Đảng tơring, Khu pơkuâ Hô̆i đong hnê ngăn xuân hiăng ai mâu khu kăn lăm troh séa ngăn, ‘nâi nhên tơdroăng. Klêi séa ngăn mê xuân hiăng ai hlá mơ-éa pơkâ thế Vi ƀan hnê ngăn tơring tối tơbleăng tâi tâng mâu tơdroăng dêi hno têa Đ3 kố. Vi ƀan hnê ngăn xuân hiăng tối tơbleăng ƀă hiăng tơpui ƀă Khu ngăn chiâk deăng ƀă Mơnhông thôn pơlê rơtế ƀă mâu kơ koan ki tơdjâk, kong pơlê xuân hiăng lăm troh séa ngăn. Gá tơvâ hên tơdroăng ƀă mâu hneăng hôp kuăn pơlê, ƀă hnoăng cheăng kăn hnê ngăn hô̆i đong xuân hiăng pâ thế, pâ thế ƀă kong pơlê kal athế ví tiô túa ki tŭm têk. Ví tơdroăng gá hiăng tiah mê, mê nếo nôkố pơtối rơnêu ôh ti tro pơkâ gá kô pơtối tơnhiê”.