Tiô riân apoăng, riân troh kơhâi dế hâi lơ 23/7, lâp tơring Lak ai vâ chê 1.200 hectar báu klâng ƀă prá alâi tŭm túa tro têa lân lu. Kuăn pơlê hiăng teăm pôu djiân tơdrêng báu phái, tơmeăm troh mâu kơpong a’ngêi khăng lĕm, tơniăn vâ hbrâ ví têa lân lu.

Pôa Võ Anh Tú, Kăn phŏ hnê ngăn Vi ƀan tơring Lak, kong pơlê Dak Lak tối ăm ‘nâi, tơring hiăng hnê mơhno mâu ƀơrô, khu cheăng, kơ koan, cheăm ngăn tiô kong mêi têa lân lu, pêi pro tro tơdroăng “pŭn tơdrêng”, xo tơdroăng ki tơniăn dêi kuăn pơlê cho tơdroăng ki pơkâ apoăng tung tơdroăng hbrâ, ví kong prâi pro ôh tá tơniăn.