Kot mâ ƀă xông kân a pơlê hngế hngo kăch măng Ia Hrung, tơring Ia Grai, kong pơlê Gia Lai, pôa Ksor Phiếu xo on veăng ƀă péa kơpeăng kŏng tá ai ki klâi. Kơnôm mơ-eăm kơhnâ pêi cheăng ƀă ‘nâi kơdĭng liăn, mê tơdroăng cheăng kâ dêi prế on veăng hơnăm ối nếo rế ton rế xông tơƀrê. Nôkố, Ksor Phiếu cho môi tung mâu rơpŏng kro mơdrŏng a pơlê ai vâ chê 2 ha kơphế pêt tơvât ƀă tiu hlối păn 17 to ro. Hơnăm kố nah, kơphế ai yă rơpŏng pôa pêi châ xo lối 400 rơtuh liăn.

Hên rơpŏng nhŏng o tung pơlê hiăng hriâm ing túa pêi cheăng pêt loăng plâi tê lo liăn ƀă hlối păn kơpôu ro chu ƀối ing pôa Ksor Phiếu kăn thôn, vâ ai tơdroăng cheăng kâ vâi rế tơƀrê. Nôkố 200 rơpŏng nhŏng o dêi pơlê, hngêi ki lâi xuân ai tơvi, rơxế hon đa. Hên rơpŏng kuăn pơlê hiăng pro hngêi lĕm. Kuăn pơlê ki ối tung pơlê hiăng ai tơdroăng rêh ối tơniăn. La tơdroăng prôk lăm tung pơlê hâi tơ’lêi hlâu.

Hơnăm 2023, pôa Ksor Phiếu hiăng tơmiêt túa pêi cheăng kơnôm tíu pêi cheăng pro nhŏng o dêi pơlê cho kŏng ti kơphế Ia Grai rơtế ƀă mâu rơpŏng tê mơdró tung kong pơlê veăng gum liăn ƀă tơbleăng pro troăng kơxái krâ on tơhrik ăm bâ eăng troăng pơlê. Kơnôm ing mê tơdroăng prôk lăm a kơmăng dêi kuăn pơlê hiăng tơ’lêi hlâu. Pôa Ksor Tí,  kuăn pơlê dêi pơlê Blo Dung tối:

“Sap hâi pôa Ksor Phiếu châ rah xo pro Kăn pơkuâ hnê ngăn Chi ƀô̆ hlối pro kăn thôn, pôa hiăng tơkŭm po hên hneăng hôp hnê tối ăm kuăn pơlê, malối cho mâu rơtăm ôh tá chiâng kơto rơxế tâng hiăng ôu drôu ƀiêr, hnê kuăn pơlê tah lôi tơdroăng rĕng xo on veăng tá hâi tro hơnăm. Tung mơnhông cheăng kâ, ki hên pêt kơphế ƀă pêt báu klâng, nôkố ƀă tơdroăng pêt kơphế môi rơnó hmâ xo 5 tâ̆n kloăng. Ƀă tơdroăng bâ eăng troăng pơlê, tung mâu hâi hdrối kố nah tíu pêi cheăng pro nhŏng o xuân hiăng veăng gum ƀă krâ ‘măn 5 to pin on tơhrik kơtâu ing mâ hâi vâ ăm ai on veăng bâ troăng pơlê ’’.

Pêi rêm khế, pôa Ksor Phiếu kăn thôn tơkŭm po hôp cho troăng pơlê vâ tơpui tơno tơdrêng mâu tơdroăng xơpá tơvâ tơvân tung rêh ối. a mâu rôh hôp pơlê a chê kố, Kosor Phiếu xuân tối tơdrăng, ai mâu ‘nâ tung khu rơtăm pro xôi luât prôk drô troăng. Pôa ƀă Tôh rak ngăn kring gak pro tơniăn dêi pơlê Blo Dung troh a tơrêm to hngêi pơkâ thế kĭ hlá mơ-é ôh tá pro xôi luât ki thế tơniăn a drô troăng prôk. Thiếu tá Vũ Hùng Cường, Ngế pơkuâ kŏng an cheăm Ia Hrung tối:

“Mâu kŏng an ƀă mâu vâi pú a thôn, pơlê, malối cho pôa Ksor Phiếu kơhnâ tung tơdroăng cheăng kó, pơkâ thế mâu rơpŏng hngêi tơhrâ hnê ‘na luât troh mâu vâi muăn kuăn cháu hiăng rak vế pêi tro. Malối nôu pâ hiăng ‘nâi chơ chiên dêi kuăn lăm hriâm teăng pơcháu rơxế ăm vâi to lăm hriâm”.

Pôa Ksor Phiếu kăn thôn ối kơhnâ veăng cheăng ‘na tơleăng mơnhên tơdroăng tơbriêt tơnêi, tơmeăm khoăng, tơhôu tơhêng tung kuăn pơlê. Hnê kuăn pơlê veăng tơplâ mơdât mâu ki ai xôi; tah lối túa tơlá ton nah ki ôh pá tro lơ rĕng xon on veăng, xo on veăng ki ối tơdjuôm môi mơheăm môi hdrông hdrê vâ mơnhông tơdroăng rêh ối tiô túa lĕm tro a kơpong kuăn pơlê ối.

Pôa Ksor Phiếu ai tối tiah kố: cho môi ngế đảng viên, cho kăn thôn tơdroăng cheăng ki klâi pin xuân thế djâ troăng pêi a hdrối, kuăn pơlê nếo ƀối kơ’nâi.

“Á pơchân mâu rơtăm to rơxế thế rak tro luât rak tơniăn drô troăng mê cho xâu muâk ƀaoh hiêm, ôh tá ôu drôu biêr drêng to rơxế. Thế tro hơnăm mê nếo xo kơnốu, xo kơdrâi, tah mâu túa tơlá ôh pá tro ƀă mơhnhôk mâu rơpŏng cho mâu kuăn cháu mơ-eăm hriâm troh tui lui. Tơ’nôm môi tơdroăng ki kal nếo, achê kố đi đo ai vâi hdrêng tro klâk têa a hên pơlê cheăm, mê a xuân đi đo tối pơchân kuăn pơlê thế tơmâng ngăn krâu khât dêi kuăn ‘nĕng tơná vâ ví trâm mâu tơdroăng ki châi heăng tung hiâm mơno”.

Pôa Thái Hồng Cương, Kăn hnê ngăn Đảng ủy cheăm Ia Hrung tối tiah kố: Mâu hnoăng pêi ‘na mơnhông cheăng kâ - rêh ối a pơlê blo Dung ai hnoăng veăng ‘no hên dêi pôa Ksor Phiếu:

“Ƀă pôa Ksor Phiếu, hnoăng cheăng Kăn pơkuâ hnê ngăn hlối pro kăn thôn mê pôa xuân đi đo tơbleăng tối mâu luât pơkâ tŏng gum dêi Đảng, Luât tơnêi têa teăm troh ƀă kuăn pơlê. Ing mâu rôh trâm mâ hôp chi ƀô̆, hlối tơrŭm ƀă mâu thôn pơlê, pôa ối mơhnhôk kuăn pơlê kớroh tah túa tơlá ton nah ki ôh pá tro. Troh nôkố, a pơlê, tơdroăng mơnhông cheăng kâ ƀă rak  tơniăn kal kí đi đo châ tơniăn”.

Ksor Phiếu đi đo châ kuăn pơlê Blo Dung, cheăm Ia Hrung, tơring Ia Grai, kong pơlê Gia Lai  loi ƀă pâ nhoăm.