Sap hâi lơ 30/10 troh hâi lơ 3/11, a kong pơlê (Jơn-bùk) Jeonbuk, Hàn Quốc, po mơđah tơbleăng kế kâ ăm chiâng drôu lâp plâi tơnêi IFFE 2025.  Kố cho tơdroăng mơhnhôk tê mơdró kân má môi tung mâu kơvâ ôm hyô pro pló a Hàn Quốc. Kong pơlê Dak Lak ai 6 khu mơdró veăng tơbleăng, mơđah tê mâu tơmeăm pêi chiâk deăng ki krê xêh, mê cho: kơphế, kloăng mắc-ca, phái Briêt, priât, ca cao ƀă mâu tơmeăm pêi châ mơnhên OCOP.

Mâu tơmeăm khoăng dêi kong pơlê tơ’mot krâm kuăn pơlê lăm ôm hyô, tăng hlê plĕng ƀă rôe tơmeăm. Tơdroăng veăng mơđah tơbleăng tơmeăm lâp plâi tơnêi môi tiah IFFE ôh tá xê to vâ tơbleăng um méa Dak Lak mê ối vâ po rơdâ rôh tơrŭm ‘no liăn mơjiâng tơmeăm khoăng, djâ tơmeăm pêi chiâk ki krê xêh dêi kong pơlê prôk rế hơngế tung kơchơ mơdró lâp plâi tơnêi. Mơđah tơbleăng tơmeăm chiâng pló drôu lâp plâi tơnêi IFFE hơnăm 2025 cho rôh vâ Dak Lak mơhno inâi tơmeăm pê lo ing chiâk deăng krê dêi kong pơlê, hlối po rơdâ tơrŭm cheăng tê mơdró ƀă ‘no liăn cheăng pơla Dak Lak ƀă Joenbuk tối krê, pơla Việt Nam Hàn Quốc tối tơdjuôm.