Klêi kơ’nâi séa ngăn nhên tơdroăng pêi pro hbrâ mơdât pơreăng dêi khu thái pơlât mơnăn ƀă khu râ kăn pơkuâ tơring, mâu kơdroăng păn ai ro xo têa tôu tro pơreăng châi klêa ƀă hlâ a 2 tơring Đơn Dương ƀă Đức Trọng, khu râ kăn pêi cheăng hiăng ai roh pêi cheăng ƀă khu râ kăn pơkuâ kong pơlê Lâm Đồng.

A kố, pôa Phùng Đức Tiến, Ngế pro xiâm phŏ pơkâ thế mâu kơ koan tơnêi têa rơtế tơring kal rĕng pêi pro mâu troăng vâ pơlât kuăn kiâ tro châi klêa, kơdroh iâ má môi tro lŭp ƀă tơniăn mơgrúa lĕm kong prâi. Kơ koan xiâm pơlât mơnăn rơtế mâu tíu cheăng ki tơdjâk thâ kêi đeăng mâu tơdroăng pơlât ăm ro xo têa tôu tro pơreăng vâ tơbleăng teăm tơdrêng troh kuăn pơlê, tơrŭm ƀă kuăn pơlê pơlât ro tro pơreăng.

Khu xiâm pơkuâ ‘na Chiâk deăng ƀă Mơnhông thôn pơlê ƀă mâu kơ koan tơnêi têa, khu tê mơdró ki xiâm kơvâ păn mơnăn mơnôa kô tŏng kum tơmeăm khăm pơlât, pơkeăng pơlât ăm kong pơlê Lâm Đồng.