Tơring tơkăng kong Ngọc Hồi, kong pơlê Kon Tum ai 199 Tíu krâ ‘măn kơmăi mơdêk - mơju ivá on tơhrik ki kân 3 pha. La mâu Tíu ‘măn kơmăi on tơhrik 3 pha mê ki hên a drô mâu troăng kân xiâm, troăng tung thôn ƀă tung mâu pơlê, a mâu kơpong pêi chiâk hơngế ing pơlê hâi teăm ai liăn hnhâng pro troăng kơxái on tơhrik. Pôa Đinh Cao Cường, Kăn pơkuâ hnê ngăn Đảng tơring Ngọc Hồi, kăn hnê ngăn Hô̆i đong kong pơlê Kon Tum ăm ‘nâi, séa ngăn dêi kơ koan cheăng ‘na kơvâ ki mê ăm hlo, lâp tung tơring ai lối 3.000 rơpŏng kuăn pơlê pêi chiâk ƀă tâi tâng ƀăng tơnêi lối 4.000 ha dế kal la hâi ai troăng kơxái on tơhrik 3 pha vâ xúa tung pêi chiâk. Kố cho môi tơdroăng ki kuăn pơlê hiăng hên hdroh tối ăm khu râ kăn i ‘nâi:

“A mâu rôh trâm mâ kuăn pơlê mâu kăn Hô̆i đong kong pơlê a tơring Ngọc Hồi, kuăn pơlê hiăng hên hdroh pâ thế kơvâ ngăn on tơhrik séa ngăn, lăm ngăn hlối hnhâng kơxái on tơhrik 3 pha vâ ai on tơhrik ki têi ăm mâu rơpŏng ki pêi chiâk châ xúa tung pêi chiâk a ƀăng chiâk ki kân vâ xúa drêng hrik têa toh loăng plâi kô kâi tơniăn. A xuân ‘nâi hên ngế kal vâ on tơhrik xúa tung pêi chiâk nôkố xuân dế kal vâ há a mâu tơring, cheăm ki ê’’.

Nôkố lâp tung kong pơlê Kon Tum ai 182 kơpong pêi chiâk pa kong kơpong kuăn pơlê ối kal thế hnhâng kơxái on tơhrik 3 pha. Vâ châ hnhâng kơxái on tơhrik 3 phá ăm tâi tâng mâu kơpong pêi chiâk mê, kơvâ ngăn on tơhrik kong pơlê Kon Tum thế ‘mâi pro, mơjiâng nếo dâng 267 km troăng kơxái on tơhrik ki têi krâ kơvâ, 366 km troăng kơxái têi iâ,  219 tíu krâ ‘măn kơmăi mơdêk - mơju 3 pha ƀă hía hé.

Ƀă tâi tâng kơxô̆ liăn ‘no pêi ahdrối lối 624 rơtal liăn. Pôa Lê Như Nhất, Ngế pơkuâ Khu mơdró kong pơlê Kon Tum ăm ‘nâi, kơxô̆ mơngế kal thế hnhâng troăng kơxái on tơhrik 3 pha nôkố luâ kơ ivá dêi mâu kăn ƀă kơvâ ngăn on tơhrik:

“Ƀă tơdroăng ‘no liăn hnhâng troăng kơxái on tơhrik 3 pha vâ pơxúa tung pêi chiâk ki hơngế kơpong kuăn pơlê ối nôkố xơpá khât ôh tá ai tơdroăng pơkâ vâ ‘no liăn pro. Xua mê, liăn ki vâ ’no dêi kơvâ ngăn on tơhrik xuân ôh tá ai liăn vâ ‘no mơjiâng pro a kơpong ki mê. Mâu kơpong kuăn pêi chiâk ki hên hơngế ing pơlê kal thế ai hên liăn, kơvâ ngăn on tơhrik ôh tá ai liăn. Kố cho tơdroăng ki pá má môi tung tơdroăng tơbleăng pêi nôkố’’.

Vâ tah ki xơpá, tơdroăng pêi pro cho tăng liăn ‘no mơjiâng pro troăng kơxái on tơhrik 3 pha ăm mâu kơpong pêi chiâk ki hơngế ing mâu pơlê vâ rĕng troh pơkâ cheăng pêi ƀă kơmăi kơmok ki dâi lĕm, tiô túa nếo vâ xúa tung pêi chiâk, tiô khu ngăn tê mơdró kong pơlê Kon Tum kal pêi pro tơdrêng hên tơdroăng, mê cho:

Mê cho, pơkâ thế Khu xiâm Kŏng ti on tơhrik kơpong tơdế tơnêi têa ăm hdrối kơxô̆ liăn ‘no mơjiâng pro; kơvâ ngăn on tơhrik Kon Tum veăng kum ‘na kih thuât ăm mâu khu rơpŏng ki vâ veăng tơ’lo liăn hnhâng kơxái on tơhrik 3 pha troh a châk deăng; liăn veăng tơlo ing pơlê pơla ƀă rơpŏng ki pêi chiâk, tê mơdró; mâu kăn rêm râ ai pơkâ luât tŏng kum hnhâng pro on tơhrik 3 pha ƀă mâu kơpong pêi chiâk rơtế mơdêk ki pơxúa pê lo tơmeăm; tung tơdroăng cheăng pơkâ hdró ki kal tơmâng troh tơdroăng mơhno mâu kơpong hmâ pêt loăng plâi a kơpong tơnêi hơpok lĕm tơ’lêi tung tơdroăng hnhâng kơxái on tơhrik 3 pha.