Troh nôkố tâi tâng ƀăng deăng plâi kâ dêi kong pơlê Kon Tum châ lối 14.000 ha, tâk 10.500 ha tâng pơchông ƀă hơnăm 2020. Tiah mê, kong pơlê Kon Tum hiăng rĕng kêi rĕng lối 1 hơnăm ƀă hluâ 4.000 ha tâng pơchông ƀă pơkâ mơ’no troh hơnăm 2025. Vâ rêm hơnăm pêt dâng 3.000 ha plâi kâ, 3 hơnăm hiăng hluâ, kong pơlê Kon Tum mơdêk hnê mơhno, tŏng kum teăm tơdrêng ‘na hdrê, kơxô̆ liăn, kih thuât ăm kuăn pơlê pêi chiâk deăng.

Rơtế amê pêi pro châ tơƀrê troăng hơlâ rak ngăn lĕm kơdrum pêt plâi kâ, ki má lối a kơpong hdroâng kuăn ngo. Troh nôkố, kong pơlê Kon Tum xuân hiăng mơjiâng châ 25 mah kơpong pêt, tung mê ai 18 mah kơxô̆ kơpong pêt ngi kong têa ê ƀă 7 mah kơxô̆ tê tung tơnêi têa ƀă tâi tâng ƀăng deăng vâ chê 400 ha loăng plâi.