-Ô pôa, tiô Tơdroăng pơkâ pêi tung mơnhông kơvâ mơdâ pêt kơphế tơniăn ton troh a hơnăm 2030 ah, kong pơlê Dak Lak hiăng mơnhên tối kơxô̆ ƀăng tơnêi, chiâk deăng ai dâng 200.000ha, kuăn pơlê châ xo dêi dâng 2,5 tâ̆n/ha. Tiah mê, vâ khoh châ pêi pro mâu tơdroăng ki xiâm kố, kong pơlê hiăng ai mâu troăng hơlâ nhên ki tiah lâi vâ pêi pro, ô pôa?

Pôa Nguyễn Thiên Văn: Tung tơdroăng pơkâ rak vế, pêi pro tiô Troăng tơkêa pêi mơnhông kơvâ cheăng tê mơdró kơphế, mê kong pơlê Dak Lak kô tơkŭm pêi pro lĕm tro mâu túa pêi cheăng. Ing lơgât ‘na pêi chiâk pêi deăng tơniăn mê, ai tơnêi hlâu, kong pơlê kô mơhnhôk ƀă hnê tối kuăn pơlê rah xo kơpong tơnêi ki tơtro vâ mơ’no liăn vêh pêt nếo kơphế ki dâi lĕm. Ngin kô mơjiâng chiâng mâu kơpong ki pêi pêt mơjiâng hên hdrê  kơphế, tơkŭm tung tơdroăng ki pêt mơjiâng tơniăn, tơdroăng mơdâ pêt, rak ngăn, tôh têa, rơvât phon, krí xo, mơ’no tê pơrá ai hlá mơ-éa mơnhên tối, ƀă ki xiâm khŏm châ 80% ƀăng chiâk deăng ki pêt kơphế tro tiô tơdroăng pơkâ kố. Pakĭng mê, kong pơlê kô mơ’no liăn vâ mơjiâng pro rơchôa, hno têa vâ rak vế tơniăn ăm tơdroăng ki tôh têa, rơvât phon tơniăn lĕm ăm hdrê loăng pêt. Kong pơlê pơtối pơkâ mâu troăng hơlâ vâ krí xo, rak ‘măn klêi kơ’nâi krí, tơniăn châ 95% pơ’leăng kơphế châ têng khăng tro tiô tơdroăng pơkâ.

-Ê, dế nôkố mâu tơdroăng pơkâ thế ‘na rak ki dâi lĕm rế hiá rế pơkâ nhên, pơkâ pêi pro kơtăng hât, malối ƀă mâu kơchâi, plâi, pôm ki tê hên ngi kong têa vâi ê, môi tiah kơphế, ti mê, vâ tơxâng ƀă tơdroăng pơkâ thế ki nếo ing mâu kơchơ kong têa ê, tung la ngiâ kố ah, kong pơlê Dak Lak kô ai tŏng gum pêi pro mâu tơdroăng ki mê ga tiah lâi, ô pôa?

Pôa Nguyễn Thiên Văn: Ngin vêh mơnhên athế ai tơmeăm ki pêi mơjiâng hên, athế dâi lĕm khât. Ki má péa, túa ki mơdâ pêt, rak ngăn, krí xo, mơ’no tê xuân athế tiô chal nếo, tơtro ƀă tơnêi tíu, hyôh kong prâi ƀă athế châ kơdĭng liă ngân vâ mâu tơmeăm ki tê mơ’no mê ai hlá mơ-éa mơnhên, tơro ƀă tơdroăng pơkâ thế dêi kơchơ tung tơnêi têa ƀă kong têa ê. Ing mâu tơmeăm ki dâi lĕm môi tiah mê, ngin tơkŭm tung mơnhông mâu kơpong hngêi kơmăi vâ krếo thế mâu khu mơdró kâ mơ’no liăn cheăng a mâu hngêi kơmăi ki kân dêi kong pơlê. Ing mê ah, kô têng, uâ pơli mâu tơmeăm ki mê pro ti lâi ăm ga dâi lĕm, vâ yă tê châ to kơnâ hên tâ. Pakĭng mê, mơjiâng pro mâu inâi tơmeăm, hnối ai tá tíu ki pêt mơjiâng kơphế, inâi kơphế Buôn Ma Thuột vâ châ djâ tê mơ’no dêi kơphế ki dâi lĕm, ƀă túa cheăng ki rơkê, ki dâi lĕm khât tiah mê vâ mơ’no tê tung tơnêi têa ƀă kong têa ê.

-Ô pôa, vâ mơnhông ‘na kơvâ mơdró kơphế tơniăn ton mê xuân kal athế ai tơdroăng ki tơrŭm cheăng krá tơniăn tro tiô tơdroăng ki dâi lĕm mê. Xua ti mê, kong pơlê ai pơkâ mâu troăng prôk ki ti lâi vâ veăng gum ăm kuăn pơlê ƀă khu mơdró tung tơdroăng mơnhông pêi chiâk pêi deăng, pêt mơjiâng tơmeăm, vâ tơmeăm ki pêi lo mê châ kơnâ yă, ƀă châ po rơdâ tíu tê rôe tiô kơ tơdroăng ki tơrŭm cheăng kố?

Pôa Nguyễn Thiên Văn: Kong pơlê Dak Lak kô pơkâ troăng hơlâ ki rơtế ƀă kuăn pơlê, pơtối ‘mâi rơnêu mâu khu pơkuâ ngăn cheăng vâ tŏng gum kuăn pơlê, môi tiah hngêi rak liăn, tíu xiâm hriăn plĕng, viê̆n khoa hok, vâ ing mê, gum vâi krâ-nhŏng o châ hlê plĕng, hnối chiâng xúa khoa hok kih thuât ƀă liăn ngân, tơmeăm khoăng ki vâ pêi chiâk pêi deăng. Tơdrêng amê, mơnhôk khu mơdró tung kơvâ tê rôe kơphế thăm mơnhông pêt mơjiâng rế hên, mơdêk ki kơnâ dêi kơphế, tơxâng ƀă tơdroăng ki pói  rơhêng vâ tung mơnhông pêi cheăng kâ-rêh ối pơlê pơla. Kong pơlê Dak Lak xuân tơkŭm mâu troăng hơlâ, pêi pro adrêng, môi tiah vâ tah lôi drăng tíu ki tơvâ tơvân, ai mâu troăng prôk ki phá, ki nếo ƀă thăm mơdêk hnoăng cheăng ăm kơvâ cheăng, xing xoăng tơdroăng cheăng tơtro, rơtế ƀă khu mơdró kâ vâ tơ’mot mâu khu mơdró kâ mơ’no liăn cheăng a kong pơlê Dak Lak, klêi mê, tơrŭm ƀă mâu khu pơkuâ ngăn kuăn pơlê ki pêt kơphế vâ rôe kơphế dêi kuăn pơlê tơ’lêi hlâu, vâ mơ’no kơphế dêi kong pơlê Dak Lak tơbleăng, tê troh a kơchơ, xuân môi tiah veăng uâ pơli mâu tơmeăm khoăng ki pêi lo ing chiâk deăng dêi kong pơlê, tung mê, ai kơphế.

-Hôm, mơnê kơ pôa!