Dế nôkố, mâu ngế mơdró dế tí tăng rôe plâi sầu riêng a kong pơlê Dak Lak châ yă kơnâ sap ing 80 rơpâu troh 95 rơpâu liăn 1 kg, mê cho tơdroăng ki tơniăn ăm tê rôe plâi a hngêi kơchơ. Maluâ ti mê, tơdroăng ki hdró yă, pơkâ yă kơnâ xuân tơ’lêi ai tơdroăng ki ôh tá tơniăn ‘na yă, tơ’nhiê ‘na tơdroăng ki pơkâ yă, ‘na kĭ tơkêa tê rôe, maluâ tâng tơdroăng tê rôe a hngêi kơchơ ai tơdroăng ki pơhlêh kân. Pakĭng mê nếo, tơdroăng ki tơbriât tê rôe, hjip yă, tong hơ’vĕng, ko ‘nhiê loăng plâi xuân tơ’lêi ai môi tiah hdrối nah nếo, ing mâu tơdroăng ki tối tiah mê, pro kuăn pơlê khoh chiâng ôh tá tơniăn. Pôa Y Khoan Kƀuôr, ối a cheăm Čư̆ Pơng, tơring Krông Ƀuk, kongpơlê Dak Lak tối ăm ‘nâi:

“Nôkố, tơdroăng rêh ối hiăng chía tơniăn, plâi sầu riêng dế hiăng ai yă kơnâ, tơdroăng pêi cheăng kâ tung rơpŏng hngêi châ mơnhông. Á hlo tung pơlê ai mâu ngế rơxông hơnăm ối nếo hiăng mơ-eăm khât tung tơdroăng pêi pêt, rak ngăn plâi sầu riêng”.

Vâ tơniăn ăm tơdroăng kuăn pơlê châ krí xo dêi plâi sầu riêng, khu kăn pơkuâ ngăn tơring, cheăm rơtế ƀă mâu khu kŏng an tung kong pơlê Dak Lak hiăng mơjiâng, pơkâ mơ’no hnoăng cheăng thăm mơdêk tơdroăng ki vâ hbrâ rơplâ mơdât, tơtrâ khu ki pro xôi ƀă mâu ngế ki hliăng tăng tơdroăng xôi tung rơnó krí plâi sầu riêng hơnăm 2024. Tơdrêng amê, lăm ngăn nhên vâ kring vế mâu hnôu, hneăm, hngêi ki ‘măn plâi, lăm gak ngăn a mâu tíu ki ai hên plâi sầu riêng ki vâ tê mơdró, ki malối, mâu chiâk deăng plâi sầu riêng ki hơngế ing hngêi dêi kuăn pơlê, séa mơnhên ngăn mâu tơdroăng cheăng tung tê rôe, tê mơ’no dêi plâi sầu riêng, mơjiâng khu ki tŏng gum krí xo ƀă tê mơ’no plâi sầu riêng. Đăi tă Trần Quang Hiếu, Kăn phŏ ngăn Kŏng an kongpơlê Dak Lak tối ăm ‘nâi:

“Ngin kô hbrâ vâ tí tăng ‘nâi tơdroăng, tơrŭm ƀă mâu khu râ, kơvâ cheăng thăm mơdêk tung pơkuâ ngăn ‘na kring vế tơniăn ‘na cheăng kâ, ki rơhêng vâ tối ai tơdjâk troh mah kơxô̆ tung kơpong ki pêt, mah ki tâ plâi tung kơxâk ƀă mâu tơdroăng ki lulêa tung tê mơdró. Ƀă rĕng châ tăng ngăn, tăng hlo, hbrâ tơplâ mơdât, rup tơleăng mâu ngế ki ai tơdroăng tong hơ’vĕng. Thăm mơdêk hnoăng cheăng râ tơnêi têa ‘na tơdroăng mơ’no tê plâi troh a kong têa ê, ‘na troăng prôk, ‘na pơkuâ ngăn kơvâ cheăng tê mơdró ki tơ’lêi hlâu vâ kring vế tơniăn ăm tơdroăng rêh ối, pêi cheăng kâ a kong tơring, cheăm”.

Kong pơlê Dak Lak dế nôkố ai lối 32 rơpâu 700 ha loăng plâi sầu riêng, tung mê, ai dâng 16 rơpâu ha loăng plâi hiăng châ krí, cho kong pơlê ki ai tơnêi chiâk deăng pêt plâi sầu riêng kân má môi tung lâp tơnêi têa. Hơnăm 2023, sầu riêng kong pơlê Dak Lak hiăng châ 285 rơpâu tâ̆n ƀă hơnăm kố tiô tối hdrối kô châ lối 300 rơpâu tâ̆n.