Kơxo hâi má 4 Têt Ất Tỵ, a deăng pêt pôm ló a cheăm Dak N’Drót, tơring Dak Mil, kong pơlê Dak Nông, tơdroăng pêi cheăng cho kơdrâm kơdrĕng sôk suâ. Vâ chê 30 ngế kŏng nhân dế thâ lâk xo pôm ló, rơkong tó kơdrâm phiu ro tá tâng kơmăi chuât tôh kế tơmeăm khoăng.

Ngoh Y Dap Kƀuôr, ối a ƀuôn Trắp B, cheăm Čư Mgar, tơring Čư Mgar, kong pơlê Dak Lak tối, ngoh hiăng lăm ing kơxo má vâ teăm lâk dêi pôm ló a kố. Pôa Lại Cao Điền, pơkuâ chiâk pêt pôm ló tối ăm ‘nâi, 7ha pôm ló Nhuk hiăng châ mâu ngế ki rôe kok yă ƀă 2 pâ hiăng môi tuăn, môi tuăn hâi khế pơcháu tơdah tơmeăm.

Xua hiăng môi tuăn hdrối xua mê troh hâi má 4 Têt, kơxô̆ kŏng nhân lâk pôm ló ing Dak Lak hiăng tơkŭm rơxế troh vâ lâk teăm rơnó, tơniăn hâi khế pơto tơmeăm ăm mâu ngế ki lăm rôe.

Hâi má 4 Têt xuân cho rôh ki hên kuăn pơlê pêi chiâk mâu kong pơlê kơpong Tây Nguyên lo lăm dêi a kơdrum deăng tôh dêi kơphế, sầu riêng ƀă hên mâu hdrê loăng pêt ki ê. Pôa Y Danh Niê, a ƀuôn Knia 3, cheăm Ea Bar, tơring Buôn Đôn, kong pơlê Dak Lak xuân dế tơ’moê dêi klŏng ƀek vâ tôh kơphế. Pôa Y Danh ăm ‘nâi hiăng tôh rôh má môi kơtăn kố cho a hâi lơ 20 khế 12 âm lĭt. Nôkố mâu hâi pơtê têt hiăng klêi mê reăng kơphế xuân hiăng hŏn, răng, klăng a hâi vâ tôh rôh má 2. Tôh kơphế klêi mê rơpŏng kô poê báu ƀă troh mơ’nui khế 1 âm lĭt mê pơtối krí tiu.

A tơring Đăk Hà, kơpong ki pêt hên kơphế dêi kong pơlê Kon Tum, hâi má 4 Têt, idrâp kơmăi hrik têa rơdêng troh lâp lu mâu kơpong chiâk pêt kơphế. Pôa Nguyễn Văn Phượng a thôn 4, cheăm Đăk Mar, tơring Đăk Hà ăm ‘nâi, rơpŏng ai 1 ha kơphế ki nếo ‘mâi pêt hơnăm má 2, pôa rơtế ƀă dêi kơdrâi toi klŏng vâ hdoăng têa tôh ăm rêm xiâm kơphế. Tung pơla tơdroăng ki hơniâp ro hâi rơnó hơngui, vâi krâ nhŏng o pơrá tơngah tung môi hơnăm pêi cheăng kâ châ hên tơmeăm, kong mê tro tôu ‘ló, tơmeăm pêt lĕm, plâi kơtóu, yă tê tơniăn.