Tung 327.000 ha kơphế Arabica ƀă Robusta nôkố ai dêi kong pơlê Lâm Đồng hiăng ai vâ chê 119.000 ha châ ăm mâu mơ-éa mơnhên pêt mơjiâng krá tơniăn, môi tiah: VietGAP, 4C, UTZ...Rơtế ƀă mê kong pơlê Lâm Đồng xuân hiăng mơjiâng châ 6 kơpong pêt kơphế xúa kŏng ngê̆ rơxông nếo ƀă ƀăng deăng vâ chê 2.300ha; 67 troăng tơdjêp pêt mơjiâng tơmeăm ƀă tê tơmeăm kơphế ƀă lối 29.000 rơpŏng kuăn pơlê pêi chiâk deăng veăng pêt vâ chê 55.500 ha.

Pôa Nguyễn Hoàng Phú, Phŏ Kăn pơkuâ ‘na pêi chiâk deăng ƀă Kong prâi kong pơlê Lâm Đồng tối ăm ‘nâi, kong pơlê dế thăm po rơdâ ƀăng pêt kơphế ki dâi lĕm vâ mơdêk ki kơnâ tơmeăm.