Pôa Y Sanh Niê, kuăn ngo Rơđế ối a ƀuôn Pan, cheăm Ea Yông, tơring Krông Pač, kong pơlê Dak Lak hiăng pêt kơphế, tiu sap ton tín nah. Tiu hmâ tro pơreăng kâ ‘nhiê pro ôh tá dâi tá ai plâi hên, yă tê hlối ôh tá tơniăn ai drêng to drêng chu; ‘na kơphế hiăng krâ, vâ pơtối pêt nếo thế ai liăn hên hlối pá vâ châ tơƀrê. Hơnăm 2011, pôa Y Sanh Niê khên ‘no liăn pêt tơvât loăng plâi sầu riêng tung kơdrum kơphế. Sầu riêng tơ’lêi pêt, la tâng ôh tá ‘nâi rak ngăn loăng kô rĕng hlâ xua ai pơreăng kơmeăn kâ ‘nhiê, ki ‘nâ chiâng la plâi gá iâ, ôh tá ‘nhó lĕm.

Ƀă kơdrum ki kân rơdâ 1,7 ha, hiăng ai 1.400 xiâm kơphế ƀă lối 400 xiâm tiu, pôa Y Sanh Niê pêt tơvât tơ’nôm 130 xiâm loăng plâi sầu riêng hdrê Dona. Drêng loăng plâi sầu riêng hiăng kân hŭn hveăng ai tơkâng kô pro xâp rơngiâp ăm loăng kơphế. To lâi hơnăm achê kố xuân tơ’mô ti mê pôa châ xo dêi 10 tâ̆n plâi sầu riêng, 2 tâ̆n kơphế, 1,5 tâ̆n tiu. Pôa Y Sanh Niê ăm ‘nâi, klêi hiăng riân tâi dêi kơxô̆ liăn ki ‘no  rôe phon ki pơkeăng, rêm hơnăm pôa ối châ xo dêi vâ chê 1 rơtal liăn.

“Apoăng á xuân ôh tá ‘no liăn pêt hên, á xuân ôh tá ko tah dêi kơphế ƀă ôh tá tah dêi tiu, mê a pêt tơvât tê. Rêm hơnăm kơphế châ xo 1 tâ̆n tơdế, hơnăm kố a châ xo dêi 2 tâ̆n. Riân tâi tâng, klêi á hiăng riân tah dêi kơxô̆ liăn ‘no rôe phon pơkeăng, ki kố ki mê, á ối châ xo dêi sap 500- 600 rơtuh liăn’’.

Pôa Y Mi Êban ối a ƀuôn Ea Kmat, cheăm Hoà Đông, tơring Krông Pač xuân pêt tiu tơvât tung kơdrum kơphế. Drêng ai hên ngế mơhnhôk dêi rơpó pêt sầu riêng rế hên, pôa Y Mi Êban hiăng rôe 40 xiâm loăng plâi sầu riên hdrê Dona djâ pêt tơvât tung kơdrum. Xuân rah xo troăng hơlâ pêt tơvât ƀă loăng kơphế ƀă tiu. Nôkố loăng plâi sầu riêng pôa hiăng châ 120 xiâm, ối rak dêi 900 xiâm kơphế ƀă 200 xiâm tiu a kơdrum deăng 1,4 ha. Pôa Y Mi Êban ăm ‘nâi, kơdrum deăng pêt tơvât loăng plâi mê rêm hơnăm pôa châ xo dêi 1,5 rơtal liăn.

“Ƀă hnoăng cheăng cho đảng viên, djâ troăng a hdrối vâ mâu kuăn pơlê pêi ƀối, á thế pêt tơvât tá loăng plâi sầu riêng, tiu kơphế, tâng bú pêt to kơphế mê ôh tá tơniăn, krê to plâi sầu riêng hơnăm kố châ xo dêi dâng 10 tâ̆n tiô yă nôkố mơni châ dâng 1 rơtal péa’’.

Pakĭng pro kro mơdrŏng ing rơpŏng hngêi, mâu pôa Y Sanh Niê ƀă Y Mi Êban vâ kum hnê kuăn pơlê kih thuât rak ngăn loăng plâi, kum ăm mung liăn, hdrê loăng, hdrê mơnăn vâ mơnhông cheăng kâ tung rơpŏng hngêi kơdroh kơklêa xăm kơtiê. Pôa Y Niêm Niê - Ngế pơkuâ ƀơrô ngăn ‘na chiâk deăng ƀă mơnhông thôn pơlê tơring Krông Pač tối ‘na pôa Y Sanh Niê ƀă pôa Y Mi Êban xuân cho đảng viên hlối kơhnâ djâ troăng a hdrối tung mơnhông cheăng kâ vâ  kơdroh klêa xăm kơtiê.

“A tơring Krông Pač ai hên đảng viên pêi cheăng kâ rơkê, tung mê ai pôa Y Sanh ối a cheăm Ea Yông ƀă pôa Y Mi ối a cheăm Hòa Đông. Tung mâu hâi hôp tơpui tơno hriâm kih thuât pêi chiâk deăng hnê kuăn pơlê kơpong hdroâng kuăn ngo, ngin xuân tơbleăng ‘na mâu túa pêi cheăng ki mê dêi mâu pôa vâ kuăn pơlê hriâm pêi ƀôi, rơtế mơnhông cheăng kâ tah hrâ mơnguâ kơdroh kơtiê’’.

Tơdroăng khên tơnôu pêt tơvât loăng plâi sầu riêng tung kơdrum kơphế, tiu môi tiah mâu pôa Y Sanh Niê ƀă Y Mi Êban ối a Krông Pač hiăng mơnhông tơƀrê cheăng kâ, pro pơxúa pêi lo liăn hên ăm dêi rơpŏng hngêi. Vâi ôh tá xê to hluăn kơtiê krá tơniăn mê ối cho mâu ki mơhno nhên túa cheăng kâ hlối hmâ achê vâ kuăn pơlê hriâm ƀối.