Hâi lơ 12/10, a pơlê kong kơdrâm Ƀuôn Ma Thuột, Viê̆n khoa hok kih thuât pêi chiâk deăng, pêt, gâk ngăn kong Tây Nguyên tơrŭm ƀă Khu hriăn plĕng pêi chiâk deăng, pêt, gâk ngăn kong lâp plâi tơnêi a Việt Nam, Khu pơkuâ ‘na pêi chiâk deăng ƀă mơnhông thôn pơlê mâu kong pơlê Dak Lak, Dak Nông, Gia Lai tơkŭm po mơgêi tơdroăng tơkêa bro “Mơdêk ki krá tơniăn, pêi lo châ hên ƀă ki kơnâ cheăng kâ dêi tơdroăng pêt ƀă ki kơnâ dêi kơphế ƀă tiu a kơpong Tây Nguyên” hơnăm 2023, dó inâi Tơdroăng tơkêa bro V-SCOPE.

Tơdroăng tơkêa bro V-SCOPE châ pêi pro sap ing khế 2/2021 – 9/2024 a 3 kong pơlê Gia Lai, Dak Lak, Dak Nông veăng amê ai vâ chê 300 rơpŏng kuăn pơlê pêt kơphế ƀă tiu. Tung la ngiâ, Tơdroăng tơkêa bro pơtối pêi pro mâu tơdroăng pêi tơmiât la ngiâ rak ki lĕm tơnêi ƀă mơdât ôa hdrong ing tơnêi a mâu kơdrum pêt kơphế ƀă tiu xuân môi tiah tung kơdrum mơdâ hdrê; Troăng pêi pêt krá tơniăn ƀă tơdroăng pêt djâ châ tơƀrê cheăng kâ, tơtro ƀă tung pơla phá tơ-ê dêi pó; Pơ’lêh mâu troăng tơmiât pêi kong kế hên ƀă troăng pêi po rơdâ thăm tơpui tơno tơnêi têa ngế krê a pơlê.