Ing mê, Tôh pêi cheăng  kơjo kum chêl thiăn liăn ki tro lŭp a ro păn xo têa tôu tro châi klêa xua ing pâk vaccine mơdât êi kéa ki lo po pom a kong pơlê Lâm Đồng mê ai 12 ngế. Tôh pêi cheăng mê ai hnoăng tăng ngăn, riân, tơmiât nhên hdrối, mơjiâng troăng hơlâ pơkâ ki vâ chêl thiăn liăn, kơjo kum ki tro lŭp ƀă tơrŭm bă Kong ti veăng tơlo liăn Rôe Pơkeăng pơlât mơnăn dêi tíu xiâm Navetco tơbleăng pêi tơdroăng chêl thiăn, kum mâu rơpŏng kuăn pơplê ki tro lŭp, kum xua păn ro tro pơreăng klêi pâk vaccxin NAVET-LPVAC a Lâm Đồng tro tiô pơkâ dêi Luât.

Riân troh nôkố, kong pơlê Lâm Đồng ai lối 6.400 to ro châi klêa, tung mê ai 348 to ro hlâ klêi pâk vaccine êi kéa lo po pom dêi Kŏng ti Navetco.