Cho môi tung mâu Khu tơrŭm cheăng krá tơniăn pơhlêh nếo vâ tơtro ƀă kơchơ, Khu pêi cheăng tơrŭm ngăn ‘na chiâk deăng Công bằng Ea Tu, pơlê kong kơdrâm Ƀuôn Ma Thuột, kong pơlê Dak Lak hiăng châ pêi pro blêi chiâng. Lối 320 ha kơphế ki tơrŭm cheăng ƀă kuăn pơlê pêi chiâk pêi deăng, Khu tơrŭm cheăng dế tơkŭm pêi chiâk pêi deăng tro tiô tơdroăng pơkâ ing po văng nhâ, rak ngăn, troh a tơdroăng krí xo, uâ mơdiê kơphế chiâng topăng, kơphế ki tơvât ƀă hên mâu tơmeăm ki ê châ mơnhên tối FLO tơtro ƀă tơdroăng ki vâ mơ’no tê ngi kong têa ê. Pôa Trần Đình Trọng, Kăn pơkuâ ngăn Khu tơrŭm cheăng tối ăm ‘nâi, pakĭng veăng tơrŭm tê mơdró  kâ, mơdêk tơdroăng tê mơdró, Khu pêi cheăng tơrŭm hiăng xúa ki rơkê tung tơdroăng ki vâ mơnhông tơbeăng vâ tơbleăng, mơđah, mơhno vâ mơjiâng inâi:

“Ngin hiăng tăng rah xo mâu vâi pú hơnăm ối nếo, mâu vâi pú kố hiăng ai rơkê khât tung tơdroăng pêi cheăng tung mâu Kŏng ti Pơlê kong kân Hồ Chí Minh ‘na mâu khu ki tơrŭm tê mơdró kâ điê̆n tưh ƀă ‘nâi rơkê tơpui nâl Ănglê. Ing mê, ngin tối tơbleăng, mơhno dêi kế tơmeăm tơná a mâu trang măng môi tiah zalo, facebook ƀă website. Ngin kơnôm châ mâu khu râ pơkuâ ngăn tơdroăng cheăng tung tơnêi têa ƀă lâp plâi tơnêi ‘nâi ‘na Ea Tu kơphế. Ing mê, troh a tơdroăng ki tơrŭm tê rôe kế tơmeăm, mê nếo châ mơ’no tê dêi hên kế tơmeăm”.

Ƀă tơdroăng ki tơ’lêi hlâu xua ai mơngế hơnăm ối nếo, hloh hlê rơkê plĕng, khên tơmiât, khên pêi pro, Khu tơrŭm cheăng ngăn’na chiâk deăng ƀă ôm hyô Phú Nông - Ƀuôn Đôn, tơring Ƀuôn Đôn, kong pơlê Dak Lak hiăng rĕng châ mơjiâng “lơgât kơxô̆”, tơdjêp, tơrŭm, tối tơbleăng mâu kế tơmeăm dêi Khu tơrŭm cheăng a tơdroăng  ki pơhlêh kơxô̆. Kơnôm ing tơdroăng tâ ‘măn, tê mơdró a mâu trang web, môi tiah youtube, zalo ƀă hên mâu tơdroăng ki ê, mê Khu tơrŭm ngăn ‘na tơdroăng cheăng rế hía rế châ hên ngế ‘nâi. Pô Trần Văn Toàn, Kăn hnê ngăn Khu pêi cheăng tơrŭm tối, kố cho môi troăng hơlâ tê mơdró tiô chal nếo, tơtro tơxâng ƀă achê pơla nhŏng o.

“Ngin hiăng mơjiâng trang web, mâu trang fanpage, khu zalo, facebook... vâ ing mâu troăng hyôh web mê ah châ mơhno tơbeăng ‘na mâu tơdroăng ki hlê plĕng rơkê ‘na khoa hok kih thuât vâ thăm mơdêk tuăn hiâm ki rơkê plĕng tung pêi chiâk pêi deăng, tơdroăng ki thăm mơdêk ki kơnía dêi kế tơmeăm. Kơnôm tiah mê, mâu ngế ki cheăng tung khu mơdró, pơlê pơla, pơtối mơhno tơbeăng mâu tơmeăm ƀă mâu tơdroăng cheăng dêi khu pêi cheăng tơrŭm vâ mơngế ki rôe xúa hlo nhên, ‘nâi nhên cho loi tơngah xúa mâu tơmeăm ki mê tơniăn má môi ƀă lĕm má môi”.

Tiô pôa Nguyễn Thiên Văn, Kăn phŏ hnê ngăn Vi ƀan kong pơlê Dak Lak tối, tung pơla dế tơbriât tê mơdró kâ a kơchơ hên ó tiah dế nôkố, mâu khu tơrŭm cheăng hiăng hlê nhên, trâu rơdâ ‘na xúa kŏng ngê̆ ki rơkê má môi tung pêi chiâk pêi deăng. Hên Khu tơrŭm cheăng xúa kŏng ngê̆ tôh têa túa ki tôh hbri hbríu, têng tơmeăm klêi  kơ’nâi krí xo, ‘măn chôu, uâ pơliê kơphế ki dâi, krúa lĕm ƀă hên mâu tơdroăng ki ê. Mâu Khu tơrŭm cheăng ‘na kơmăi, xúa mâu tơmeăm ki ai tơdjâk troh kơmăi rế hiá rế pơhlêh túa cheăng, pơhlêh tơdroăng pêi pêt, rak ngăn, krí xo, chôu ‘măn, uâ pơliê, mơ’no tê chiâng túa cheăng ki tơdjuôm. Tơdrêng ƀă tơdroăng ki pêi pro tiô túa nếo, mâu Khu tơrŭm cheăng xuân pơtối mơdêk tơdroăng xúa kŏng ngê̆ kơxô̆ tung tơdroăng mơđah tơbleăng, mơhno mơnhên, mơ’no tê dêi kơphế tung hên túa cheăng tê mơdró điê̆n tưh.

Pơla hdrối mê hía nah, mâu khu cheăng tung kong pơlê Dak Lak hiăng tơrŭm ƀă Khu xiâm ngăn ‘na tê mơdró-cheăng kơmăi kơmok hiăng tơkŭm po hên hneăng hriâm ‘na túa tê mơdró kơxô̆, tơkéa vâ tối, mơđah tơbeăng, tơrŭm tê mơdró ƀă điê̆n tưh, mơnhông inâi tơmeăm mơdró, mơjiâng um méa ăm khu mơdró kâ, Khu tơrŭm cheăng tung lâp kong pơlê kố. Pôa Nguyễn Thiên Văn tối ăm ‘nâi, kong pơlê pơtối tŏng gum, thăm mơdêk hnoăng cheăng dêi Khu tơrŭm cheăng vâ pơhlêh túa cheăng tung điê̆n tưh a la ngiâ:

“Dế nôkố, dế pơkâ hdrối pơtối tŏng gum hên luâ tâ kơ mê nếo vâ mơjiâng mâu Khu tơrŭm cheăng ki rơkê. Akố, tơdroăng ki rơkê mê athế ai hên kơvâ ki rơkê plĕng, môi tiah xúa kŏng ngê̆ chal nếo, pơhlêh túa cheăng kơxô̆ tung mơjiâng inâi kế tơmeăm, inâi tíu tê mơdró, mơjiâng mah kơxô̆ kơpong ki pêt hnối ai tá mrô kơxô̆, mah grât, xúa kŏng ngê̆ kơxô̆ gum ăm inâi kế tơmeăm thăm rế kơnâ kơnía, rế vâ thăm mơdêk ki kơnía pro pơxúa kân má môi ăm tơná kuăn pơlê ƀă khu mơdró kâ”.

Mâu ivá ki kơdo mơ-eăm pơhlêh kơxô̆ dêi Khu tơrŭm cheăng pêi a kong pơlê Dak Lak dế veăng gum mơjiâng pro tơ’lêi hlâu tung hnoăng pơkuâ ngăn, gum kơdroh  mơ’no hrê liăn ngân, thăm mơdêk ki ai pơxúa ăm Khu tơrŭm cheăng. Ki rơhêng vâ tối, xúa kŏng ngê̆ kơxô̆ tung mơhno tơbeăng kế tơmeăm ki dế po rơdâ hên túa cheăng ki nếo, hngêi kơchơ ki nếo, thăm mơdêk ki kơnía ƀă mơjiâng inâi kế tơmeăm ăm tơná kong pơlê Dak Lak.