Tơdroăng tơkêa bro kâng rơchôa Ia Mơr, ai tâi tâng kơxô̆ liăn ‘no lối 2.600 rơtal liăn, ƀă tơdroăng mơ’no têa ăm lối 14.300 ha tơnêi mơdâ pêt báu , loăng plâi a mâu kong pơlê Gia Lai ƀă Dak Lak. Mơhé ti mê, klêi mơjiâng, tâi tâng deăng mơdâ pêt báu loăng plâi ki châ tôh têa bú 3.600 ha, ôi kal ai 5.000 ha nếo tâng vâ pơchông ƀă vê hdró.

A rôh pêi cheăng, Vi ƀan hnê ngăn kong pơlê Gia Lai pơkâ thế Khu xiâm ngăn ‘na Chiâk deăng ƀă Mơnhông thôn pơlê kĭ tơdroăng vâ mơ’no têa toh a mâu kơpong châ pơ’lêh hdrê pêt ing tơnêi pêt loăng kơxu ki ôh tá dâi. Pôa Lê Minh Hoan, Ngế xiâm ngăn ‘na chiâk deăng ƀă mơnhông thôn pơlê môi tuăn ƀă tơdroăng pơkâ thế dêi kong pơlê Gia Lai, rak tơniăn tơdroăng pơkâ mơnhông pêt kong, rak tơniăn tơkăng kong ƀă pro pơxúa ăm tơdroăng pêi chiâk.