Mêi tro têa lân, rơnó tô chiâng khăng khoăng, kơpong tơnêi Ea Nhuôl, Ƀuôn Đôn, kong pơlê Dak Lak pá vâ mơdâ pêt mâu hdrê loăng ki ton hơnăm. Tăng troăng vâ pro kro a tơnêi tíu dêi tơná, mâu vâi pú rơxông hơnăm ói nếo a cheăm Ea Nhuôl hiăng khên pêt drê plâi hơmu ai mơngiơk drêh, pro ki xahpá xua hyôh kong prâi ôh tá tơniăn, tơnêi khăng kơtô chiâng mơjiâng pêt tơmeăm ki dâi lĕm tung tơdroăng pêi chiâk pêi deăng. Ngoh Võ Hoài Ân, kăn ƀô̆ ngăn ‘na kih thuât mơdâ pêt plâi hơmu tối ăm ‘nâi:

“Hơnăm 2011 pơxiâm pêt mâu hdrê plâi hơmu hlo ga chiâng dâi lĕm a tơnêi ki kố. Klêi mê, tăng rôe tơ’nôm hdrê ki ê nếo xuân tơtro. Xua hyôh kong prâi akố pơla kơhâi ƀă kơmăng a Ƀuôn Đôn ga phá dêi pó, a rơnó xeăng tô hyôh kong prâi kơtăn dêi pó châ lối 10 đô̆i, mê pro ăm plâi hơmu xú lĕm tâ, kâ ngeăm lĕm tâ”.

-Kơdrum plâi hơmu mơngiơk drêh 10.000 xiâm dêi mâu rơxông hơnăm ối nếo a cheăm Ea Nhuôl, tơring Ƀuôn Đôn, kong pơlê Dak Lak

Ing túa mơnúa pêt plâi hơmu ai mơngiơk drêh ki apoăng mê, troh nôkố, tung lối 1 ha 8 ai 10 rơpâu xiâm plâi hơmu mơngiơk drêh vâi o rơxông nếo hiăng châ krí dêi. Ngoh Nguyễn Quốc Lập, môi tung mâu ngế ki veăng mơ’no dêi liăn, veăng pêi pêt plâi hơmu tối ăm ngin ‘nâi, athế mơ-eăm ‘mâi rơnêu po pông, rơvât phon ăm tơnêi, mơdâng hngêi ki hding hlâm, xua khoa hok kih thuât kŏng ngê̆, klêi kơ’nâi 3 hơnăm, kơdrum plâi hơmu akố hiăng chiâng khât, hiăng ai plâi, á châ xo dêi dâng 10 tâ̆n rêm hơnăm. Yă tê châ 400 rơpâu liăn 1 kg, xua vâi tăng rôe hên, ai rơnó ‘nâ ôh tá bê plâi vâ tê ăm vâi ti tăng rôe. Tiô ngoh Nguyễn Quốc Lập tối, troăng hơlâ ki vâ mơnhông ăm plâi hơmu ai mơngiơk drêh kố xuân dế ối châ po rơdâ hên tung la ngiâ:

‘’Tâng tŭm tơdroăng pơrá châ tơ’lêi hlâu ƀă kuăn pơlê akố xuân vâ môi tuăn pêi trối, veăng mơ’no liăn ngân vâ rôe hdrê, tơmeăm rak ngăn, mê la ngiâ á xuân tơmiât tíu kố cho tíu ki plâi hơmu ai mơngiơk drêh ki hên ăm dêi kong pơlê pin’’.

-Mơnhên ngăn ki ngeăm dêi plâi hơmu hdrối vâ krí. Ki tô hngíu pơka kơhâi ƀă kơmăng a kơpong Ƀuôn Đôn thăm rế pro ăm plâi xú lĕm, ngeăm tâ

Khu rơxông hơnăm ối nếo hiăng ‘nâi nhên ‘na túa ki vâ tê mơdró tung Facebook, Zalo, mê hiăng hnê tối túa mơdâ pêt plâi hmu mơngiơk drêh kố ăm hên ngế ‘nâi. A rơnó krí, lôi hrĭng troăng plâi hơmu tơdrăng, ngiât lĕm, kơtóu plâi hên pro hên tơmối rơhêng vâ mot ngăn. Nâ Nguyễn Thị Thu Hằng ai tối:

‘’Á hiăng lăm troh hên tíu, ing kơdrum plâi yâu Đà Lạt, kơdrum plâi hơmu Ninh Thuận, drêng vêh dêi a pơlê tơná, á hlo ai kơdrum plâi hơmu tiah mê ‘ló hâk mơnê păng ‘nâng.  Pói rơhêng vâ a tơring pin pơtối ai tơ’nôm hên tâ nếo kơdrum plâi hơmu tiah mê vâ mơnhông pêi cheăng kâ, pêi lo hên kế tơmeăm, xuân châ tơ’mot hên khu tơmối ing tíu ê rơhêng vâ troh ngăn’’.

-Tơmối hâk ro drêng châ mot ngăn kơdrum plâi hơmu

Jâ Đinh Thúy Lăng, Kăn phŏ hnê ngăn Vi ƀan cheăm Ea Nhuôl, tơring Ƀuôn Đôn, kong pơlê Dak Lak tối ăm ‘nâi, ing tơdroăng ki apoăng nah dêi túa pêi pêt plâi hơmu mơngiơk drêh hiăng po troăng hơlâ ki nếo ăm kuăn pơlê akố:

‘’Túa cheăng ki kố pro pơxúa hên păng ‘nâng. Hdrối nah cho tơdroăng ki pơhlêh tung túa pêi pêt hdrê plâi, tơtro ƀă tơnêi tíu a cheăm Ea Nhuôl. Pakĭng mê, ai tá tơdroăng mơnhông tơ’môt tơmối mot ôm hyô. Môi troăng prôk ki dế châ mơnhông mê cho troăng hơlâ dêi tơring hiăng ăm phep, hnê djâ. Peăng khu kăn pơkuâ ngăn tơring, ngin pơtối hriăn plĕng vâ tối tơbleăng túa mơdâ pêt kố troh ƀă kuăn pơlê ki rêh ối cheăng kâ a cheăm kố vâ hên ngế châ ‘nâi, châ hriâm vâ pêt mơnúa tiô túa kố. La ngiâ, po troăng vâ mơnhông chiâk deăng, pơhlêh pêt hdrê loăng, hdrê plâi ki ai pơxúa tâ’’.