Ing tơdroăng mơ-eăm pơhlêh nếo, mơ-eăm pêi vâ pro kro mơdrŏng a tơnêi dêi pơlê xiâm, klêi mâu khế hơnăm tô tuăn tơdrêng ƀă tơdroăng mơhnhôk dêi rêm râ Đảng, mâu kăn pơlê cheăm, tơring, ngoh Y Hưng Niê, đảng viên chi ƀộ Ƀuôn Trăp, cheăm Ea H’Đing, tơring Čư̆ Mgar, kong pơlê Dak Lak hiăng khên mơjiâng Khu pêi cheăng tơrŭm pêi chiâk tê mơdró cheăm Ea H’Đing. Veăng pêi cheăng tơrŭm cho mâu đoân viên, droh rơtăm kơhnâ, vâ hriâm, vâ xúa ki rơkê túa pêi cheăng nếo khoa hok tung pêi chiâk. Kơ’nâi lối 3 hơnăm mơjiâng, troh nôkố, khu pêi cheăng tơrŭm hiăng tơkŭm châ 25 ngế pêi khât ƀă lối 500 ngế tơrŭm cheăng. Hên túa pêi cheăng ki nếo, túa pêi ki tro hiăng pro pơxúa cheăng kâ pơxúa hên.

Ngoh Hưng Niê ăm ‘nâi, ƀă mâu túa pêi cheăng môi tiah: păn pú pái kroăng tung kơdroăng, pêt báu a  klâng, pêt kơphế, pêt tiu, plâi sầu riêng tơniăn, rêm hơnăm, rêm rơpŏng tơveăng pêi cheăng tơrŭm xo rơkâ châ sap 50 rơtuh troh 1 rơtal liăn:

“ Tơdroăng mơnhông cheăng kâ dêi tơring cho kal, malối cho cheăng kâ pú hên, mơnhông pêt loăng plâi, păn mơnăn, ôm hyô ngăn kuăn kiâ nhâ loăng tung pơlê. Púi vâ á kô veăng kum mâu vâi pú mơnhông tơƀrê túa pêi cheăng ki pơxúa má môi ăm tơná mơngế tung khu ƀă cheăm tơring. Malối cho khu pêi cheăng tơrŭm ai 1 chi ƀô̆ dêi đảng bộ cheăm Ea H’Đing vâ hnê tơ’nôm tơdroăng cheăng pêi ăm kuăn pơlê kum kuăn pơlê mơnhông tơƀrê’’.

Khên tơmiât, khên pêi cho tơdroăng ki hên ngế kuăn pơlê tối pơlê kân Quảng Phú, tơring Čư̆ Mgar, kong pơlê Dak Lak hiăng ai ngoh Dương Văn Ngọc, môi ngế đảng viên hơnăm ối nếo, kơhnâ păng ‘nâng tung tơdroăng tơ’noăng pêi chiâk. Ngoh Ngọc ăm ‘nâi: hlo mơngế vâ xúa rế hên ‘na ki tơƀrê, hơnăm 2019, ngoh hiăng pơhlêh 4 ha tơnêi pêt kơphế hiăng krâ pêt sầu riêng tiô troăng hưh cơ tơkŭm ƀă tôh têa ‘nâi kơdĭng. Troh nôkố, túa pêt sầu riêng tiô troăng rơhlâ hưh cơ dêi ngoh rôh pơxiâm mơhno ki tơƀrê drêng kơxô̆ liăn ‘no pêt rak ngăn kơdroh lối 20%, la plâi, ki lĕm dêi plâi tâk vâ châ tơdế. Túa pêi cheăng dế châ mâu rơpŏng kuăn pơlê rơtâ tá lăm ngăn, hriâm, po rơdâ. Tiô ngoh Dương Văn Ngọc, cho đảng viên pin thế mơ-eăm djâ troăng ahdrối tung tơdroăng mơhnhôk, pêi hdrối, vâ kuăn pơlê pin loi pêi bối.

“Drêng pin veăng pêi mâu tơdroăng cheăng peăng Đoân, peăng Đảng mê a thế hriâm mâu túa pêi cheăng ki ‘ló tro, pêi cheăng tơƀrê ing mê xúa ăm rơpŏng hngêi pêi tơƀrê tâ. Tung la ngiâ, á kô mơ-eăm xoăng dêi tơdroăng cheăng pêi tung rơpŏng hngêi ƀă tơdroăng veăng pêi vâ pê klêi  tâ’’.

Ôh tá xê to djâ troăng a hdrối tung mơnhông cheăng kâ rơpŏng hngêi, mâu đảng viên ai tơdroăng rêh ối tơƀrê  hôm tâ ối veăng tơlo liăn, pro kơxô̆ liăn ‘măn kơdĭng ăm mâu rơpŏng xơpá châ mung la ôh tá xo liăn rơkâ.  Sap ing kơxô̆ liăn kố, hên rơpŏng hngêi hiăng hmiân tuăn ‘no liăn pêi pro, tơkâ luâ xơpá, hluăn kơtiê mơ-eăm mơnhông tơƀrê. A bêng Đoàn Kết, pơlê kong kơdrâm  Ƀuôn Ma Thuột , kong pơlê Dak Lak, pôa Hà Ngọc Cẩn, đảng viên Chi ƀô̆ tôh kơphô̆ 2 cho môi tung mâu đảng viên veăng tơdroăng kố.

Pôa Cẩn ăm ‘nâi, mơhé kơxô̆ liăn veăng tơlo ôh tá hên, la ƀă tuăn mơ-eăm “ ‘Nâi hơ-ui pâ dêi pó” mâu đảng viên môi tiah pôa púi vâ iâ hên veăng mơhnhôk mâu rơpŏng kơtiê mơ-eăm pêi cheăng vâ mơnhông tung rêh ối.

“A kố kuăn pơlê tối tơdjuôm pêi chiâk ai rơpŏng ai liăn ăm tơdrêng, ai rơpŏng vâi rôe mung troh rơnó ah nếo ăm mê nếo ai liăn tê tơmeăm  mê vâi nếo ăm. Xua mê, hlo vâi krâ nhŏng o xơpá ‘na tơdroăng mê xuân ăm kuăn pơlê mung liăn vâ pêi cheăng kâ la ôh tá xo liăn rơkâ”.

Ing mâu ngế pêi cheăng kơhnâ ki tối kơpêng mê ăm hlo, hên đảng viên a Dak Lak hiăng pơtối rak vế hnoăng cheăng ki djâ troăng a hdrối, chiâng mâu ngế kăn ƀô̆ ki rơkê, mâu kuăn pơlê ki djâ troăng a hdrối, mơnế kơhnâ pêi chiâk, kơdroh kơklêa xăm kơtiê, rơtế ƀă dêi rơpó mơjiâng dêi pơlê xiâm tơná rế kro mơdrŏng.