Pêi pro tơdroăng Pơkâ tơnêi têa mơnhông cheăng kâ rêh ối pơlê pơla kơpong kuăn pơlê hdrông kuăn ngo ƀă kong ngo, mâu hơnăm hdrối nah, cheăm Ba Vinh, kong pơlê Quảng Ngãi hiăng kơjo gum mâu kơxô̆ liăn ‘no pêi cheăng pro troăng prôk tung thôn pơlê, hngêi hôp tơdjuôm, mâu kế tơmeăm xúa tơdjuôm ƀă rak ngăn ivá kuăn pơlê. Rơtế ƀă kơxô̆ liăn ‘no pêi cheăng dêi Tơnêi têa, mâu tơdroăng ăm mung liăn kơjo cho ivá, cho tơdroăng tŏng gum hên rơpŏng khên tơnôu mơnhông cheăng kâ. Môi tiah rơpŏng pôa Phạm Văn Rôm. Ing kơxô̆ liăn mung kơjo, pôa Phạm Văn Rôm khên pêt 4 ha loăng nhĕn, păn chu, í, kơnôm mê cheăng kâ rơpŏng hngêi pôa rế hía rế tơniăn:

“Châ tơdroăng tơmâng ngăn tŏng gum dêi Tơnêi têa, Hngêi rak liăn Tŏng gum pro tơ’lêi hlâu ăm kuăn pơlê châ mung liăn pêi cheăng kâ mê tối tơdjuôm kuăn pơlê ai liăn vâ mơnhông cheăng kâ dêi tung rơpŏng hngêi, rế hía rế châ xut tah hrâ mơnguâ kơtiê”.

Pơla hơnăm 2026 - 2035, cheăm Ba Vinh mơnhên tơdroăng ki mơdêk ivá cheăng, rak vế ƀă mơnhông mâu cheăng chal krâ cho troăng prôk ki kal vâ tăng cheăng pêi ton troh tá ah ăm kuăn pơlê. Jâ Trần Thị Thanh Thúy, Phŏ hnê ngăn Vi ƀan cheăm Ba Vinh ăm ‘nâi:

“Tơdroăng pơkâ dêi tơnêi têa tơdjâk troh kơxô̆ liăn pêi cheăng, mê ki hdrối tâ cheăm tơkŭm tŏng gum vâ mơnhông mơdêk mâu túa pêi cheăng ki hdrối kố nah vâi krâ kuăn pơlê hiăng pêi. Pơtih po lâm hnê tĕn ếo pơtâk, kố cho mâu tơdroăng cheăng hiăng châ tŏng gum mê kô pơtối châ po rơdâ ƀă pêi chiâng tơmeăm ăm vâi krâ kuăn pơlê. La kơxô̆ liăn ki kố châ pơcháu liăn ôh tá hên mê cheăm rơhêng vâ kô tŏng gum tâi tâng mâu tơdroăng pơkâ dêi tơnêi têa vâ pêi lo kế tơmeăm ăm vâi krâ kuăn pơlê”.

5 hơnăm hdrối nah, sap ing kơxô̆ liăn veăng tơlo dêi mâu tơdroăng pơkâ tơnêi têa, kong pơlê Quảng Ngãi hiăng tơbleăng pro 26 tơdroăng tơkêa bro tŏng gum mơnhông cheăng kâ tiô troăng ki kơnía ƀă 399 tơdroăng tơkêa bro tŏng gum pơlê pơla, gum kuăn pơlê rế hía rế hbrâ rơnáu tung cheăng kâ, kơdroh tơkôm tung tơdroăng tŏng gum. Krê hơnăm 2026, Quảng Ngãi xoăng lối 1.000 rơtal liăn ing kơxô̆ liăn pơkâ tơnêi têa mơnhông cheăng kâ rêh ối pơlê pơla kơpong kuăn pơlê hdrông kuăn ngo ƀă kong ngo hơnăm 2025 pơtroh.

Mâu cheăm bêng dế mơjiâng mâu kơpng pêt xik tro ƀă uâ pơliê a cheăm Ba Vì, pêt tơ’nôm loăng cau, păn mơnăn mơnoâ a Ba Xa ƀă mơjiâng kơpong pêt pơkeăng a Măng Ri. Pôa Xiêng Thanh Phúc, Kăn pơkuâ Khu ngăn hdrông kuăn ngo ƀă Tiô khôp kong pơlê Quảng Ngãi, ăm ‘nâi:

“Tơdroăng pơkâ tơnêi têa pơla hơnăm 2026 – 2030, cheăng tơkŭm tơbleăng pêi pro mâu tơdroăng pơkâ dêi tơnêi têa mơnhông kơpong hdrông kuăn ngo kô tơbleăng tro tâ ƀă tơdroăng ki ai khât. Kô tơbleăng mâu túa ki djâ troăng ahdrối cho kuăn pơlê hdrông kuăn ngo a kong pơlê tơƀrê tâ, tro tâ, ƀă pêi lo tơmeăm hên tâ, tro ƀă tơdroăng gum kuăn pơlê hluăn ing kơtiê ƀă hluăn ing kơtiê krá ton”.

Ƀă tơdroăng tơmâng ngăn tŏng gum dêi Đảng, Tơnêi têa rơtế ƀă ivá mơ-eăm dêi kuăn pơlê, mâu tơdroăng pơkâ dêi tơnêi têa kô pơtối mơdêk tơƀrê, pro chiâng ivá ó rơdêi ăm mơnhông cheăng kâ rêh ối kơpong hdrông kuăn ngo ƀă kong ngo a kong pơlê Quảng Ngãi tung hneăng nếo.