Pakĭng 3 to ro ki hiăng hlâ, 29 to ro xo têa tôu ki u ối dêi rơpŏng pôa Nguyễn Thanh Phong, thôn Kinh tế mới, cheăm Tu Tra, tơring Đơn Dương, kong pơlê Lâm Đồng pơrá tung tơdroăng ki dế châi klêa, hrế hrối, ôh tá vâ rêi nhâ, tung mê ai mâu kuăn ki ‘na gá kô hlâ drêng lâi ôh ti ‘nâi. Lối 10 hâi hdrối rơpŏng hiăng hrê hên liăn roê pơkeăng pơlât la ro ôh tá hlo chía. Pôa Phong tối ăm ‘nâi, vâ mơ-eăm păn ro ki kố rơpŏng pôa hiăng tơkuô̆m tâi liăn ngân ki ‘măn kơdĭng tung hên hơnăm, mung tơ’nôm liăn ing hngêi rak liăn ai 3 rơtal. Nôkố ro ai ki hlâ ai ki rêh xua pâk vaccine, ôh tá chiâng ai têa tôu, mê cheăng kâ rơpŏng chiâng rế pá khât:

“Khu ro 32 to mê hlâ 3 to hiăng tâp, 3 to ki ê mê dế ối a’nâi rơlâi tiah kố. Ro nôkố dế vêh tâ pơreăng nếo, ôh tá vâ, châi klêa 5-6 to nếo. Á châi heăng khât, liăn ngân tối khât cho ôh ti ai, bu mung liăn ing hngêi rak liăn ƀă liăn ‘măn kơdĭng, mê hiăng hrê tâi tung kố. Nôkố trâm tơdroăng kố ôh ti ‘nâi kơxo ah rêh ối tiah lâi nếo. Rơhêng vâ khu kăn pơkuâ séa ngăn tơdroăng ki tro lŭp kố ăm vâi krâ nhŏng o vâ ai tơdroăng tŏng gum”.

Xuân môi tiah mê, jâ Huỳnh Thị Kim Phượng, a thôn Lạc Nghiệp, cheăm Tu Tra, tơring Đơn Dương xuân ôh ti ‘nâi pro tiah lâi drêng hlo dêi mâu khu ro dêi rơpŏng ối pung pôu to môi tíu. Klêi kơ’nâi pâk vaccine êi a kéa lo po pom a hâi lơ 31/7, tâi tâng 76 to ro xo têa tôu pơrá hlo châi klêa. Maluâ rơpŏng hiăng roê pơkeăng pơlât ăm ro, 8 to hiăng hlâ. Jâ Phượng tối tiah kố, ro tamo ƀă hlâ cho xua pâk vaccine êi kéa lo po pom chiâng pro ro hlâ mê athế kal châ chêl thiê̆n ki tro lŭp kố.

“Tá hâi ‘nâi kuăn ki hlâ gá to lâi to, xua ing mê nah gá hiăng châ môi chât to lâi hâi mê gá hmôu pơ ối puăn xêh a’nâi môi tiah kố châ ngăn gá bu tơkôm hlâ tê ôh tá kâi pơlât xếo. Hâi ki lâi xuân ngăn mâu ro kố ối puăn, rơpŏng hngêi châi heăng ôh tá ‘nâi pro tiah lâi. Nôkố, tơdroăng ki púi vâ dêi rơpŏng păn khu ro ki kố pâk vaccine, khu kăn pơkuâ tŏng gum ăm kuăn pơlê pơkâ thế tíu ki tê vaccine athế thiê̆n liăn ăm mâu ro ki tro châi klêa ƀă mâu ro ki hlâ ăm kuăn pơlê”.

Lăm ngăn dêi khu ro, klêi pâk ngăn mơheăm ƀă tơpui tối leăng ing gen, Khu xiâm ngăn pơlât mơnăn (Khu xiâm ngăn Chiâk deăng ƀă Mơnhông thôn pơlê) apoăng mơgêi xiâm kối pro chiâng châi klêa a ro xo têa tôu a kong pơlê Lâm Đồng xua tro Pestivirus tauri klêi pâk vaccine NAVET-LPVAC dêi Kŏng ti Navetco. Ki nhên, klêi kơ’nâi pâk ngăn mơheăm châ hlo 24/24 klŏng vaccine kố pơrá yương tĭnh ƀă Pestivirus, kố cho túa virus pro châi klêa a ro. Tơdrêng amê, Khu ngăn pơlât mơnăn xuân tối, ôh tá hlo mâu túa virus, vi khuẩn pro châi klêa ki lâi tung mâu kế kâ ƀă puâ vi sinh ăm ro xo têa tôu kâ.

Nôkố, tơdroăng ro châi klêa ƀă hlâ a Lâm Đồng xuân dế pơtối ôh tá tơniăn, rêm hâi mơhrê hên liăn ngân ăm tơdroăng ki pơlât. Laga, ki hên kuăn pơlê xuân athế ‘no hrê xêh mâu liăn ngân ki pơlât ăm ro.