Mâu hâi ki kố, a ƀăng klâng kân ối tung mâu cheăm Chưư A Thai, Phú Thiện, kong pơlê Gia Lai, báu hiăng tum môi tiah môi to kế ki lêk kân rơdâ ôh tá hlo kĭng. Ai mâu klâng ki ‘nâ kuăn pơlê hiăng krếo rơxế poê. Pôa Kpă An (kuăn ngo Jarai) a pơlê Ring Dap, cheăm Chư A Thai, lăm ngăn dêi klâng tâ phiu ro xua hlo báu kơpâu lĕm. Pôa ăm ‘nâi rơpŏng ai vâ chê 1,5 ha klâng báu pêt 2 rơnó, têa gá ai xêh lo ing rơchoâ Ayun Hạ, mê rêm hơnăm châ xo dâng 20 tâ̆n báu.

“Nôkố pêt báu klâng a kơpong kố, tâng vâ ăm to rơpŏng hngêi kâ mê gá rơlối hên. Klêi kơ’nâi hiăng ôh tá riân mâu kơxô̆ liăn hrê roê pơkeăng xôh, phon rơvât, hâi pơchoh tơnêi, pôe báu ƀă hên ki ê, mê u ối cho dêi rơpŏng xúa plâ hơnăm. Ôh ti xê to bê kâ mê ối châ ‘măn kơdĭng ăm hơnăm kơ’nâi, tâng ôh tê xo liăn. Hdrối nah, pêi báu klâng, ôh tá tơniăn, báu ôh tá châ poê. Nôkố, mơdâ pêt báu kơnôm ai rơchoâ têa Ayun Hạ, ai tŭm têa tôh ăm báu lĕm, báu kơpâu tâ. Sap ing pơhlêh pêt báu klâng, tơdroăng rêh kâ ối dêi vâi krâ kuăn pơlê hiăng ai tŭm báu vâ kâ plâ hơnăm”.

A ƀăng klâng ối tung cheăm Phú Thiện (kong pơlê Gia Lai) tíu ki ai inâi “Phái Phú Thiện” châ vâi ô eăng, idrâp kơmăi poê báu xuân hiăng tâng pơlok pơlâ. Pôa Nay Keng (kuăn ngo Jarai), Ngế pơkuâ thôn Rbai, cheăm Phú Thiện ăm ‘nâi, kơnôm ai têa tôh sap ing rơchoâ têa Ayun Hạ, kuăn pơlê hiăng pêt châ hên mâu hdrê, pêt tơ’nôm hên mâu kơpong ki hmâ pêt kơtếo, pôm ló, hât ƀă hên ki ê. Hdrối nah, kuăn pơlê bu pêt to báu bu bê kâ tê, nôkố hiăng tơrŭm ƀă khu mơdró kâ vâ pêt báu lĕm, kơpâu, ai inâi “Phái Phú Thiện” ki châ vâi ô eăng.

“Ing rôh ki ai rơchoâ têa Ayun Hạ, tơdroăng pêi chiâk klâng dêi vâi krâ kuăn pơlê a kơpong kố chiâng tơ’lêi hlâu khât. Ai têa ing long djâ troh a mâu hno têa lo troh a klâng, kơnôm mê vâi krâ kuăn pơlê chiâng tơ’lêi hlâu tung tơdroăng ki mơdâ pêt, ôh tá tơkôm xếo a têa kong mê môi tiah hdrối nah. Rơnó ki lâi xuân ai tŭm têa tôh, báu chiâng lĕm, ôh ti ai xếo tơdroăng ki ôh tá ai báu kâ môi tiah hdrối nah. Vâi krâ kuăn pơlê ôh ti xê pêt 2 rơnó tung hơnăm mê ối ai têa vâ po rơdâ tơ’nôm ƀăng tơnêi, pêt tơ’nôm hât, pôm ló vâ pêi lo liăn tơ’nôm. Kơnôm mê, tơdroăng rêh kâ ối dêi kuăn pơlê rế hía rế tơniăn ƀă chía niân. Rơchoâ têa Ayun Hạ hiăng gum vâi krâ kuăn pơlê pơhlêh túa pêi pêt, mơdêk ki lĕm, veăng gum mơnhông cheăng kâ dêi cheăm pơlê”.

Ayun Hạ cho môi tung mâu rơchoâ têa ki kân a kơpong Tây Nguyên, têa tôh ăm lối 13.500 ha hdrê pêt tŭm túa, tung mê ki hên cho báu klâng. Rơtế ƀă mâu hdrê báu pêt ki nếo, xúa khoa hok kih thuât, mâu hơnăm hdrối mê hía nah têa a rơchoâ Ayun Hạ hiăng tôh mơ’drêh ƀă báu lĕm kơpâu a mâu cheăm Phú Thiện, Ayun Pa, Chư A Thai tâk troh 8 tâ̆n tung môi ha, ai tíu ki ‘nâ châ troh 10 tâ̆n tung môi ha.

Pôa Phạm Văn Lượng, hdrối nah cho kăn pơkuâ Đảng tơring Phú Thiện, nôkố cho phŏ pơkuâ Đảng ủi – Kăn hnê ngăn cheăm Čư̆ A Thai, kong pơlê Gia Lai, ăm ‘nâi báu cho hdrê pêt ki xiâm a cheăm kố. Pêi pro tiô Pơkâ dêi Đảng ủi tơring Phú Thiện (hdrối nah) ‘na mơdêk rơdêi xúa khoa hok – kong ngê̆”, rêm hơnăm cheăm kơjo gum liăn ăm kuăn pơlê pêi chiâk, malối cho kuăn pơlê hdroâng kuăn ngo po rơdâ ƀăng tơnêi pêt báu. Rơchoâ têa Ayun Hạ xuân hiăng gum kuăn pơlê pơhlêh túa mâu hdrê pêt; malối cho kuăn pơlê hdroâng kuăn ngo hiăng pơhlêh ing pêt báu tơkôm to ai têa kong mê chiâng pêt báu xúa têa tôh, tơƀrê.

“Mơnhông xúa tơƀrê dêi long têa Ayun Hạ, ai têa vâ mơnhông cheăng kâ, vâi krâ kuăn pơlê hiăng tơkŭm pơhlêh pêt mâu hdrê pêt tiô pơkâ pêi châ hên. Ƀă tơring Phú Thiện hdrối nah mê vâi krâ kuăn pơlê hiăng pêi mâu túa pơkâ pêt báu tơkŭm pro pơxúa tơƀrê. Ing mê, kuăn pơlê hiăng tơniăn tung rêh kâ ối; malối cho ƀă vâi krâ kuăn pơlê Jarai hiăng mơdât pêt hên hdrê báu ki lĕm, kơpâu ƀă tê yă kơnâ”.

Klâng báu tum hâi kố hiăng cho tơdroăng ro châ báu hên dêi vâi krâ kuăn pơlê ki pêi chiâk a kơpong mâu cheăm Čư̆ A Thai, Phú Thiện, Ayun Pa (kong pơlê Gia Lai) mơhno nhên ki tơƀrê sap ing têa tôh dêi rơchoâ Ayun Hạ. Ing tơdroăng ki pêi pêt ôh tá tơniăn, tơkôm ing têa kong mê, mê kuăn pơlê mâu hdroâng kuăn ngo a tíu kố hiăng mơdâ pêt 2 rơnó báu klâng tơniăn, hlối pêt tơ’nôm hên hdrê pêt ki ê, rế hía rế mơdêk pêi lo liăn, mơ-eăm pro mơdrŏng. Ƀlêi chiâng mê ăm hlo ki pơxúa kân ing tơdroăng xúa khoa hok – kih thuât ƀă xúa tơƀrê dêi mâu rơchoâ têa tung mơnhông pêi chiâk deăng krá tơniăn a kơpong Tây Nguyên.