Tơdroăng kố châ tơkŭm po a kơxo hâi lơ 17/8, a 498 Hoàng Quốc Việt, bêng Cổ Nhuế, pơlê krâm Bắc Từ Liêm, Hà Nội. Mâu kơphế ki xú kơhiâm lĕm Tơbleăng tăng yă ki lâi kơnâ tâ rôh kố cho mâu túa kơphế ki xú kơhiâm lĕm châ rah xo nhên ing mâu rôh tơ’noăng Kơphế ki xú kơhiâm lĕm Việt Nam hơnăm 2024 (Vietnam Amazing Cup 2024).

Tung rôh kố, kô ai 9 khu kơphế Robusta ƀă 6 khu kơphế Arabica châ mơhno tơbleăng tăng yă ki lâi kơnâ tâ. Rêm tíu pêi cheăng ki ai kơphế tơbleăng tă yă kơnâ tâ kô mơhno tơbleăng tối krê ing mâu deăng pêt kơphế, ing tơdroăng mơnhông ki pơxúa dêi kơphế Việt Nam tơbleăng mâu kơ’lo kơphế ki kơhiâm má môi troh mơngế rôe xúa.

Kố cho rôh má péa Dak lak tơkŭm po tăng yă kơnâ mâu tơmeăm kơphế ki xú kơhiâm lĕm. Hơnăm nah rôh tơbleăng tăng yă kơnâ ki apoăng hiăng hlo klêi tơniăn. Yă tê kơphế xú kơhiâm lĕm hiăng châ mơnhông ing 5  troh 7 hdrôh tâng vâ pơchông ƀă yă kơphế ki hmâ ôu, mơhno ki kơnâ kân dêi kơphế xú kơhiâm lĕm Việt Nam.