Cheăng kâ tơrŭm cheăng ƀă kong têa ê rế trâu, tơdroăng mơjiâng inâi rế kal. Ki xiâm dêi mơjiâng inâi cho pro chiâng môi tơdroăng tơƀrê ki tơviah, môi inâi ki tro, môi um méa ki kal ƀă kơnía ôh ti ai má péa ki tơmối chiâng vâ châ hlo ƀă tơmiât troh kế tơmeăm lơ tê mơdró mê. Kơnôm mê khu mơdró kâ mơni kô châ tê mâu kế tơmeăm ƀă yă kơnâ tâ, pro pơxúa hên ‘na ki kơnía tâ.

Tơdroăng ki rơkê ki ai khât dêi hên kong têa tung lâp plâi tơnêi ăm hlo, vâ ƀlêi chiâng tung tơdroăng ki thăm mơdêk tê mâu kế tơmeăm dêi kong pơlê a mâu kơchơ kong têa ê, kal khât troh tơdroăng ki pro, rak vế ƀă rak inâi. A Việt Nam, maluâ hiăng ai troăng, túa pơkâ mơjiâng inâi ăm mâu kế tơmeăm pêi lo ing chiâk deăng tê ngi kong têa ê. Laga, tơdroăng ki châ tối bô bối, tá hâi nhên.

Mâu kế tơmeăm tá hâi châ tơkŭm môi tíu ‘na tơdroăng pơkâ, tơdroăng tá hâi châ tơdjêp, tê pơla rêm pâ ki ai tơdjâk ƀă hên ki ê. Xua mê, tơdroăng mơjiâng inâi kế tơmeăm pêi lo ing chiâk deăng troh nôkố tá hâi châ tơdroăng ki môi tiah tơdroăng ki rơhêng vâ.

Đơn pơtroh môi tiah phái, Việt Nam cho tơnêi têa tê phái ngi kong têa ê kân má pái tung lâp plâi tơnêi, la ki hên phái dêi Việt Nam tê ngi kong têa ê cho tiô tơdroăng ki pêi ƀă kŏng, tâ tung kơxâk bông, ôh ti tĕm  tem, tê ngi kong têa ê nếo pro klêi tơdrong, têa logo inâi phái Việt Nam xuân tá hâi châ mâu ngế ki roê kâ mâu kong têa ‘nâi troh. Pôa Phan Minh Thông, Kăn hnê ngăn Hô̆i đong Kuản trĭ, Kăn pơkuâ Grup pơkuâ Phúc Sinh tối tiah kố:

“Pin ‘nâi troh cho tơnêi têa ki tê phái ngi kong têa ê hên la pin ôh tá ‘nâi troh cho mâu tơnêi têa tê phái ai inâi. Mâu inâi ki vâi ô eăng tung lâp plâi tơnêi ôh ti ai inâi dêi Việt Nam”.

Tiô mâu khu ki rơkê ‘na cheăng kâ, Việt Nam tê hên tơmeăm pêi lo ing chiâk deăng ăm kong têa ê, la ki kal cho athế rah xo mâu kế tơmeăm ki lĕm tơviah, a pơxúa ‘na tơxup vâ tơkŭm mơjiâng inâi. Ai mâu kế tơmeăm ki phá tơ-ê mê athế ai túa pơkâ dâi lĕm ƀă athế ai tơdroăng la ngiâ marketing tơxâng ƀă tơnêi têa ƀă ki ê.

Tơdroăng ki khéa dế nôkố, maluâ ai mâu inâi kế tơmeăm pêi lo ing chiâk deăng tung tơnêi têa dâi lĕm khât la khu mơdró kâ ôh tá bê liăn ngân vâ mơjiâng kơpong pêt tơmeăm vâ tê ngi kong têa ê. Tơdroăng kố pâ thế tơmâng ngăn hên tâ dêi kơ koan tơnêi têa, tŏng kum mâu troăng hơlâ tơtro, kum khu mơdró kâ tơmeăm pêi lo ing chiâk deăng ngi kong têa ê rế rơdêi. Rơkong tơpui dêi pôa Lê Thanh Hòa - Kăn phŏ ngăn ki dâi lĕm ‘na Uâ pơliê ƀă Mơnhông kơchơ, Khu xiâm ngăn chiâk deăng ƀă Mơnhông thôn pơlê:

“Tơná mâu khu mơdró kâ Việt Nam pơrá cho mâu khu mơdró kâ kŭn ƀă krâ kơvâ, xuân môi tiah pin ôh tá ai liăn, pin ôh tá hlê ‘na tơdroăng, túa rơkê tung tơdroăng pro tê mơdró, malối cho tê mơdró ƀă kong têa ê. Kố cho mâu tơdroăng ki ôh tá tơƀrê ki á tơmiât tung la ngiâ ah pin athế pơtối ai tơdroăng ki mơdêk tro tâ vâ tơrŭm veăng tung tơdroăng tê mơdró kố. Pin tê tơmeăm ăm hên mâu khu mơdró kâ tê tơmeăm hên ăm kong têa ê la tơmeăm ki mơ’nui mê ôh tá tĕp tem Made in Việt Nam. Kố cho tơdroăng ki lup vâ kơ koan pơkuâ ngăn Tơnêi têa athế hlê plĕng tơdroăng kố vâ ai mâu troăng hơlâ kơjo kum tro tâ ‘na liăn, pro tiah lâi mâu khu mơdró kâ ai tŭm ki tơxâng vâ ăm mâu kế tơmeăm ki dâi lĕm châ tê a kơchơ tê mơdró kong têa ê ƀă inâi Việt Nam”.

Tiô pôa Trần Văn Trung - Kăn pơkuâ Kŏng ti Tơlo liăn ‘No liăn cheăng Hải Âu Việt, mơjiâng inâi ăm kế tơmeăm pêi lo ing chiâk deăng Việt Nam cho tơdroăng ki kal pêi pro tơdrêng. La ƀă tơdroăng mê, khu mơdró kâ ƀă kơvâ cheăng ki ai tơdjâk troh xuân kal tơmâng ngăn troh hnoăng cheăng rak vế inâi. Tơdroăng pêi kố kô kum mâu khu mơdró kâ kô kơdroh iâ mâu tơdroăng ki tro lŭp xua tí tăng, xúa inâi ôh tá tro luât ing mâu khu pơkuâ ki ê. Ing mê, chiâng vâ rak vế ki loi tơngah, inâi tung kơchơ tê mơdró.

“Mâu kơchơ tê mơdró ing Kơnhŏng troh hdroh hiăng pêi báu ST25 tê ƀă yă ôh tá tơniăn ing 150 rơpâu liăn. Laga nah pơtih peăng Kơnhŏng phái Hải hậu cho phái ki vâi ô eăng tíu lâi xuân krâ kơƀeăng tê phái Hải Hậu. Vâi tê ƀă ngế ki roê xuân tơ’lêi mơnhên roê phái ki ôh tá xêt khât. Má péa, cho mâu khu mơdró kâ mê ôh tá tơtrŏng troh tơdroăng ki rak vế inâi mê chiâng tơdjâk troh drêng trâm tơdroăng ki ôh tá tơniăn môi tiah mê chiâng vâ hlo ôh tá ai hnoăng vâ rak vế pơkuâ”.

Mâu khu ki rơkê tối tiah kố, tơdroăng ki pêi tơbréa cho kal ai inâi tơdjuôm ăm tơmeăm pêi lo ing chiâk deăng Việt Nam ƀă athế mơjiâng châ logo. Peăng khu mơdró kâ tê tơmeăm pêi lo ing chiâk deăng ngi kong têa ê xuân athế pêi pro châ tơdroăng ki rơhêng vâ dêi khu tơrŭm cheăng, khu tơrŭm pêt vâ pêi lo vâ mơjiâng kơpong pêt tơniăn ăm rêm túa tơmeăm pêi lo ing chiâk deăng ki xiâm.