Kố cho 1 tung hnoăng cheăng châ Chi hô̆i ngăn ‘na kơphế mơnhên tối cho tơmeăm khoăng ki dâi tung roh hop kố. A hneăng hôp kân Chi hô̆i kơphế ki dâi lĕm roh má 2, hneăng hơnăm 2024-2029 po a hâi lơ 2/8, a pơlê kong kơdrâm Ƀuôn Ma Thuột, kong pơlê Dak Lak. Chi hôi kơphế ki dâi lĕm (ối tung Khu tơrŭm pêi pêt-tê mơdró kơphế Ƀuôn Ma Thuột, kong pơlê Dak lak) hiăng châ mơjiâng a hơnăm 2019 nah.

Klêi kơ’nâi 5 hơnăm mơjiâng ƀă mơnhông, troh nôkố Chi hô̆i hiăng ai lối 80 ngế ki pêi pêt - rak ngăn, tê mơdró kơphế ki xiâm tung lâp tơnêi têa (tung mê, ai: Dak Lak, Dak Nông, Lâm Đồng, Gia Lai, Kon Tum, Sơn La, Quảng Trị, Nghệ An ƀă hên mâu kong pơlê ki ê).

A hneăng hôp kân mê, mâu kăn hiăng veăng tơpui tối mâu tơdroăng ki vâ mơjiâng chi hô̆i thăm rế mơnhông luâ tâ kơ mê nếo tung hneăng la ngiâ, tối nhên, pơtối mơdêk hnoăng cheăng tơrŭm pơla mâu ngế, mâu khu, mâu kong pơlê, cho kông tơdjêp vâ pro ăm khu ki têng kơ-óu, khu mơdró, khu tê rôe ƀă mâu tíu ki tơrŭm cheăng ai tŭm kơphế vâ mơjiâng chiâng hnoăng tơrŭm krá tơniăn ton. Thăm mơdêk ivá pêi pêt kơphế ki dâi lĕm, hnê hriâm, xúa mâu hnoăng cheăng kơmăi kơmok, tê mơdró kơphế ki dâi lĕm ƀă mâu hnoăng cheăng pêi pêt, rak ngăn kơphế krá tơniăn ton.