To lâi hâi ki kố, pôa Võ Đình Việt, ối a thôn Lạc Nghiệp, cheăm Tu Tra, tơring Đơn Dương, kong pơlê Lâm Đồng môi tiah dêi tơná ‘nân ối kơpêng on ki tô xua ôh tá ai ivá vâ tơvêh liăn tơkâ ăm hngêi rak liăn. Klêi pâk vaccine mơdât êi po pom a kéa, inâi pơkeăng mê cho Navet- LPVAC dêi Kŏng ti Navetco, 80 to ro dêi rơpŏng hiăng châi klêa ó. Tung mê 11 to hiăng hlâ, 12 to ki dé xiu tơ’nhiê kuăn, 5 to dế tơkôm vâ hlâ, mâu ro ki ê pơtối chôm, ôh pa hro vâ xông rê nhâ, ôh tá ai ivá vâ ai têa tôu môi tiah hdrối nah xếo. Pakĭng mê, vâ tŏng gum pơlât ăm ro, rơpŏng pôa hiăng ‘no lối 1 rơtal liăn vâ rôe pơkeăng pơlât. Tiô pôa Võ Đình Việt tối, tơdroăng ki tro lŭp tung cheăng kâ ‘na păn ro xo têa tôu cho hên păng ‘nâng la Kŏng ti Navetco tơbleăng kơlo liăn vâ chêl thiê̆n bu iâ tê, iâ tâ yă ro pŭm ki tê a kơchơ pa kong:

“Á thế vâi chêl thiăn 50 rơtuh liăn môi to ro ki hlâ, ‘na ro ki dế xiu tơ’nhiê dêi kuăn thế chêl thiăn ăm ngin châ 30 rơtuh liăn. Xua ro mê hiăng tơ’nhiê dêi kuăn ôh tá ai ivá vâ ai têa tôu xếo, pơkâ thế chêl thiê̆n 30 rơtuh liăn, xo ah hmôi tâng ro hiăng chía mo lĕm a tê dah châ 10-15 rơtuh xuân hôm, tơ’nôm ƀă liăn ki chêl thiê̆n 30 rơtuh mê á kô ai ivá vâ pơtối păn ro nếo. Tâng ôh tá chêl thiê̆n châ 30 rơtuh môi tiah kơlo ki ngin pâ thế, mê ngin athế pơtê xo, ‘nhiê tah dêi kơdroăng păn, ti lâikâi  vâ pơtối păn kố ah nếo, ai ro ulâi vâ păn roăng”.

Kơlo yă pơkâ chêl thiê̆n ki nếo dêi Kŏng ti Navetco tơbeăng, ƀă ro xo têa tôu ki hiăng hlâ ai kơlo chêl thiăn 60.000 liăn/kg ro pŭm, 70.000 liăn/kg ro dế xiu, 80.000liăn/kg ro droh ki hâi xiu ƀă 85.000liăn/kg ro kăn ki dế xiu... Tiô pôa Trần Quang Huy, ngế păn ro xo têa tôu ối a thôn Lạc Nghiệp, cheăm Tu Tra, tơring Đơn Dương tối, kơlo chêl thiê̆n mê dêi Kŏng ti Navetco bú châ 1/3 kơlo ki tro lŭp dêi kuăn pơlê:

“Ki tro lŭp mê cho tơdroăng ki pin ƀă kŏng ti ôh tá ai kơbố vâ, la peăng kŏng ti kal thế ngăn nhên, veăng gum kuăn pơlê pơtối mơ-eăm châ păn khu ro dâng 70-80%, rêm ngế kô chiu lŭp iâ. Tâng lôi môi tiah nôkố kuăn pơlê tro lŭp hên ó, kŏng ti chêl thiê̆n bú iâ ‘nâng, liăn tê tâi ro, tơ’nôm ƀă liăn veăng kơjo gum mê ôh tá bê vâ tơvêh liăn tơkâ ăm tơná hngêi rak liăn ki ngin hiăng mung hdrối mê hía nah, mê xo liăn u lâi ngin vâ pơtối păn kố ah nếo”.

Tiô pôa Trần Văn Hiếu, Kăn hnê ngăn kuăn pơlê pêi chiâk, păn tơmeăm  inâi Bồng Lai, cheăm Hiệp Thạnh, tơring Đức Trọng, Kŏng ti Navetco môi pâ xêh tơbeăng kơlo yă chêl thiăn ki tro lŭp mê, la ôh tá ngăn nhên tiu a kơlo ki lâi ôh, vâ chêl i tơxâng. Bu riân krê to yă hdrê ro xo têa tô a kơchơ nôkố rôe ƀă yă 70 rơtuh liăn/1 to ro, tung pơla mê kơlo yă kŏng ti tối vâ chêl thiăn hâi teăm châ tơdế môi to ro, mê kuăn pơlê ti lâi ai ivá kâi pơtối vâ păn ro kố ah nếo. Tơ’nôm amê, Kŏng ti Navetco bu riân a pơla chêl thiăn ki veăng gum xo, riân sap ing hâi khu ro pơxiâm tro tâ pơreăng ki apoăng ta troh hâi lơ 26/9/2024 cho ôh tá tơxâng ôh ‘nâng, xua troh nôkố ro xuân ối châi klêa mô mơnêi ƀă ai ro ki hlâ. Pôa Trần Văn Hiếu, tối:

“Troăng hơlâ chêl thiê̆n liăn ngân dêi kŏng ti tơbleăng mê ôh tá ai tro ki lâi ôh. Kŏng ti tối hiăng tơmâng mâu tơdroăng hnê tối dêi mâu tíu pêi cheăng ki tê  hdrê ro, kuăn pơlê pơkâ thế tối nhên, tối i hleăng tíu pêi cheăng ki lâi vâ mơnhên, xua yă rôe hdrê ro têa tôu nôkố ôh tá rơpâ ôh ‘nâng. Pơtih a Dalat Milk  yă ki vâ rơpâ xuân hiăng ai sap ing 70-85 rơtuh liăn/1 to ro; a kŏng ti păn ro xo têa tôu Châu Á Thái Bình Dương mê dâng 85-86 rơtuh liăn/1 to ro. Nôkố tá mâu tơdroăng tơkêa  bro dêi Tơnêi têa  môi tiah tơdroăng tơkêa  mơnhông păn ro kố nah a tơring Cát Tiên (Lâm Đồng) mê rêm to ro yă hiăng ai sap ing 75- 85 rơtuh liăn,  ôh tá ai ro ki lâi rơpâ yă môi tiah Kŏng ti tối mê’’.

Riân troh nôkố, kơ koan khu râ pơkuâ cheăng kong pơlê Lâm Đồng tối ai lối 6.800 to ro xo têa tôu tro pơreăng châi klêa klêi kơ’nâi pak vaccine êi kéa, cho pơkeăng Navet- LPVAC xua Kŏng ti Navetco tê ăm, thế pâk, tung mê ai vâ chê 500 to ro hiăng hlâ. Vâ veăng gum ăm kuăn pơlê ki păn, hâi lơ 20/8 kố nah, Vi ƀan hnê ngăn Kuăn pơlê dêi kong pơlê Lâm Đồng hiăng pơkâ mơjiâng tôh pêi cheăng veăng gum chêl thiăn ki tro lŭp a ro ki tâ pơreăng xua pâk vaccine êi kéa. La, ing mê troh nôkố, tôh pêi cheăng mê xuân hâi tâng tối ki klâi tung tơdroăng kơjo gum chêl thiăn ki tro lŭp dêi kuăn pơlê.