VOV4.Sêdang - Kơxê lơ 15/10, pôa Võ Văn Thưởng, Kăn hnê mơhno má môi kơvâ cheăng Đảng hiăng ai roh tơpui tơno mơ’no tơdrêng tung um tiô troăng măng Internet ƀă Khu hnê mơhno má môi Đảng Nhân yân Kăch măng Lếo – Kăn xiâm phŏ hnê ngăn kong têa Lếo. Péa pâ hiăng tơbleăng ăm dêi pó ‘na tơdroăng rêm Đảng, rêm tơnêi têa; tối ăm dêi pó túa ki rơkê tơtro ‘na tơdroăng mơjiâng Đảng, mơjiâng khu cheăng kal kí, tơdroăng hbrâ, mơdât kâ kơhveăm liăn ngân, tơdroăng séa ngăn, pơxâu phak mơngế pro xôi tung Đảng ƀă mâu troăng pêi pro Pơkâ Hneăng hôp dêi rêm Đảng.

Péa kăn xiâm xuân hiăng tối tơdroăng kal, túa ki rơkê tơtro tung tơdroăng hbrâ, mơdât pơreăng COVID-19 tơdrêng amê ƀă tơdroăng mơnhông mơdêk cheăng kâ – rêh ối pơlê pơla a rêm kong têa tung pơla kố nah; tối nhên mơhé ối trâm hên pá puât laga péa pâ đi đo môi tuăn, tŏng kum dêi pó teăm tơdrêng, châ tơƀrê, mơhno tơdroăng tuăn pâ khu pú, nhŏng o ƀă khôi túa kum dêi pó pơla péa hdroâng mơngế Việt Nam – Lếo.

A Sa Ly tơplôu ƀă tơbleăng