VOV4.Sêdang - Tung hâi lơ 14/10, Trung đoân Gia Định – Khu pơkuâ ngăn lêng Pơlê kong kân Hồ Chí Minh ƀă Vi ƀan hnê ngăn mâu pơlê krâm, tơring dêi pơlê kong kân hiăng tơkŭm po mơnê, koh pơ’lâng ƀă khu lêng, mâu khu ƀok thái pơkeăng cheăng lêng sap ing mâu kong pơlê, pơlê kong kân hiăng veăng tŏng kum Pơlê kong kân hbrâ tơplâ mơdât pơreăng COVID-19. Vâ chê 2 khế hdrối, lối 300 ngế ki hriâm Học viê̆n Quân y drêng châ pơtroh sap ing Hà Nội ngi Pơlê kong kân Hồ Chí Minh vâ veăng hbrâ mơdât pơreăng COVID-19. Mê nôkố hiăng vêh dêi tíu pêi cheăng, pơtối hriâm tâp, hên mâu ngế hơnăm ối nếo phiu ro, chôu pâ drêng lo ing pơlê kong kân.

Kăn pơkuâ pơlê krâm 1 Pơlê kong kân Hồ Chí Minh diâp ché tơbâ mâu lêng ki pleăng dêi hnoăng cheăng

Xuân tung hâi lơ 14/10, Vi ƀan hnê ngăn pơlê krâm 1 ƀă pơlê krâm 5 hiăng tơrŭm ƀă Kŏng ti ôm hyô Ảnh Việt ƀă Tíu ‘măn rak kế tơmeăm tung rôh tơplâ nah tơkŭm po mâu tơdroăng ki mơnê mâu khu lêng hiăng tŏng kum hbrâ mơdât pơreăng a pơlê kong kân tung pơla hdrối kố nah. Klêi kơ’nâi 2 khế châ pơtroh a Pơlê kong kân Hồ Chí Minh veăng hbrâ, tơplâ, mơdât pơreăng COVID-19, mâu tíu pêi cheăng ối tung Khu xiâm pơkuâ ngăn lêng kô tơvêh dêi lêng drêng Pơlê kong kân Hồ Chí Minh hiăng pơxiâm mot tung hneăng ki tiah hmâ nếo.

Katarina Nga tơplôu ƀă tơpbleăng