VOV4.Sdang - Khu ki rĕng troh lâp lu ‘mâi rơnêu ối tung Kŏng ti on tơhrrik Dak Nông nếo rơnêu on tơhrik a troăng kơxái on tơhrik 22KV dế djâ on tơhrik a Čư Jút, rĕng má môi ôh tá troh tơdroăng ki tơ’nhê. Ki nhên, a trăng C53 ối tung troăng tơpéa ĐD481CJU ƀă ĐD477CJU, On tơhrik Čư Jut hiăng châ hlo tíu tơdjêp ki ‘mêi, tơ’lêi tơdjâk troh tơdroăng mơ’no on tơhrik ăm kuăn pơlê ƀă mâu troăng kơmăi on tơhrik kơtâu ƀă mâ hâi krâ a kuâ hngêi kơ’nâi trăng on tơhrik.

Kŏng nhân dế ‘mâi rơnêu a trăng C53 troăng on tơhrik 22kV Čư̆ Jut

Tâng tối tơbleăng, Khu ki rĕng troh rơnêu on tơhrik hiăng tơpâ on tơhrik ing hơngế a tíu ki tơdjêp, ‘mâi bro ăm i krá on tơhrik trung áp ƀă pro krá ko FCO. Klêi kơ’nâi 3 chôu pêi cheăng a troăng kơxái on tơhrik dế djâ on tơhrik 22kV, Khu cheăng hiăng rơnêu kêi đeăng, rak tơniăn troăng kơxái on tơhrik kơtâu đi đo, ôh tá tơdjâk troh tơdroăng mơ’no on tơhrik xuân môi tiah tơdroăng mơ’no on tơhrik dêi mâu troăng on tơhrik kơtâu ƀă mâ hâi a kuâ hngêi a troăng kơxái.

            A Sa Ly tơplôu ƀă tơbleăng