Mơ’nui hơnăm, tíu mơjiâng tơmeăm khoăng dêi Kŏng ti tơlo liăn pơ’leăng plâi hôt Hải Bình Gia Lai, pơlê kong kơdrâm Pleiku, kong pơlê Gia Lai thâ kơ-óu pơ’leăng plâi hôt ăm mâu ngế ki vâ rôe pro tơmeăm Têt Lo hơnăm nếo. Pôa Hoàng Văn Quang, Teăng mâ Kŏng ti tối ăm ‘nâi, xuân cho pơ’leăng plâi hôt ki hmâ ing mâu kơpong pêt mơjiâng a kong pơlê laga pơ’leăng plâi hôt dêi kŏng ti châ OCOP 4 hơlŏng, dế tơmiât troh pơkâ 5 hơlŏng, cho kơnôm troăng pêi krê; pơ’leăng plâi hôt kơ-óu ƀă on hdréa. Tơmeăm hiăng hmâ laga xuân ối má môi hiăng kum kŏng ti po rơdâ tíu tê, tá tung tơnêi têa ƀă tê ngi kong têa ê:

‘’Khu tê mơdró xuân ai mâu tơdroăng tơ’lêi hlâu. Mê cho tơdroăng tê ngi kong têa ê ai tơdroăng ki pơhlêh nhên tâng pơchông ƀă mâu hơnăm hdrối. Mâu khu tơrŭm a mâu kong têa châu Âu ƀă mâu kong têa Đông Nam Á ki ê xuân hiăng hbrâ troh ti tăng vâ po rơdâ tíu tê ngi kong têa ê. Vâ tơxâng mâu pơkâ tê ngi kong têa ê khu tê mơdró xuân hiăng mơ-eăm châ mâu pơkâ chưng chih kân tâ mê, rơkê tâ mê’’.

Troh tâi hơnăm 2024, kơpong Tây Nguyên hiăng ai lối 1.300 tơmeăm OCOP châ mơnhên ing sap 3 troh 5 hơlŏng. Tơmeăm OCOP Tây Nguyên ôh tá xê to ki dâi lĕm dêi tơdroăng pêi cheăng ƀă tơmiât pêi rơkê, pêi ối cho tơdroăng ki pêng păm tơdroăng hâk tơngăm ‘na kơpong tơnêi pêng păm khôi túa lĕm tro, môi tiah tơmeăm ‘’Chế reăng mêa’’, OCOP 3 hơlŏng dêi tơring Krông Păč, kong pơlê Dak Lak. Pôa Nguyễn Ngọc Quỳnh, ngế ki mơjiâng tơmeăm kố  tối ăm ‘nâi, sap ing ton nah, pôa hiăng tâng ‘na tơdroăng ki kơnâ dêi khu pơkeăng kố, xua mê drêng ‘nâi a kong Tây Nguyên xuân ai xuân ai khu reăng mêa tung kong pơlê, pôa hiăng tơtrŏng pêt mơjiâng tơmeăm kố. Klêi kơ’nâi vâ chê 10 hơnăm pêt, pôa hiăng ai 3.000 xiâm tung ƀăng deăng 2 hectar, vâ mot tung hneăng pêt mơjiâng tơmeăm. Pôa Quỳnh tối:

‘’Á kơnó kố Việt Nam pin ai hên tơmeăm pêi lo ing chiâk deăng ki kơnâ, ki rơhêng vâ tối cho mâu loăng pơkeăng. Ƀă tơdroăng tuăn mơno pâ pơlê xiâm tơnêi têa, á pói vâ rak ƀă pêt mơjiâng tơ’nôm, tơdrêng amê troh lâp lu vâi krâ kuăn pơlê tung pơlê, krếo thế rêm ngế gâk kring loăng tung kong pơlê, mơjiâng môi kong loăng hên hĭn ƀă gâk kring kong prâi tíu rêh ối dêi tơná ƀă mâu ngế ki rơtâ tá’’.

Hâk kơnía, hâk tơngăm ƀă chiâng xúa kơpong tơnêi pêng păm khôi túa lĕm, hên tơmeăm ‘na tơmeăm loăng pơlái kong kế, jâ Lê Thùy Kim Loan, Kăn pơkuâ Kŏng ti pêi cheăng tiô rơnó môi khu Pyloherb a kong pơlê Kon Tum hiăng châ mơhno hiâm mơno mơnê ƀă tơdroăng ki pro tơxâng ƀă 15 tơmeăm châ mơnhên cho tơmeăm OCOP. Tiô jâ Lê Thuỳ Kim Loan, tâi tâng mâu tơmeăm dêi Kŏng ti pơrá châ mơjiâng pro ing pơkeăng kong ki ai xêh. Kuăn pơlê a mâu thôn pơlê kơpong kong ngo dêi tơring Kon Plông ƀă Đăk Glei, kong pơlê Kon Tum cho mâu ngế xing xoăng ăm mâu pơkeăng ki dâi lĕm ăm pêt mơjiâng tơmeăm. Xua mê, rêm tơmeăm OCOP pơrá ai tơdroăng veăng gum dêi pơlê pơla.

‘’Mơnhên OCOP cho mơhên ăm tơmeăm djâ pêng păm khôi túa lĕm kơpong. Drêng châ mơnhên OCOP, ngin hlo nhên tơmeăm dêi tơná ai mâu tơdroăng ki phá tơ-ê krê, ing pơkeăng ki dâi lĕm, tơmeăm vâ pro pơkeăng troh mơngế pêi cheăng pơrá troh ing kơpong tơnêi kố. Tem OCOP pro ăm a kong pơlê Kon Tum hiăng mơnhên tơmeăm pơkeăng ki má môi dêi kơpong’’.

Ing pơkeăng cho mâu tơmeăm pêi lo ing chiâk deăng ki hmâ mơnhên ƀă tơdroăng tuăn pâ, tơdroăng hâk tơngăm ‘na tơmeăm pơlê xiâm, rêm ngế kuăn pơlê Tây Nguyên hiăng tơmiât pêi rơkê mơjiâng mâu tơmeăm OCOP ki má môi djâ tiô ki xú lĕm, um méa dêi kơpong tơnêi. Mâu tơdroăng ki châ tơƀrê dêi tơdroăng rêm cheăm môi tơmeăm a kố ăm hlo tơmeăm ki ai hlâu kân dêi tơdroăng tơdjêp khôi túa lĕm tơring ƀă troăng tơmiât pơhlêh nếo. Tơdroăng ki mê ôh tá xê to gum mơdêk tơdroăng rêh ối dêi kuăn pơlê, mê ối troh lâp lu tơdroăng ki hâk tơngăm ‘na Tây Nguyên kơdrâm mơngế ƀă kro mơdrŏng.