VOV4.Sêdang - A tíu tơkăng kong dêi tơring Tuy Đức, kong pơlê Dak Nông, mâu hâi hdrối kố nah hiăng ai lối 1 rơpâu 200 ngế prếo vêh ing mâu kong pơlê peăng Hdroh. Khu kăn pơkuâ tơring hiăng tơrŭm cheăng krá tơniăn rơtế ƀă mâu khu râ, kơvâ cheăng, mơngế krê kơhnâ khât tung veăng kum ‘na pơkeăng, khăm pơlât, hmê kơchâi kâ, mâu kơchâi, plâi, pôm vâ vâi hmiân tuăn klâ ối krê xêh vâ pôi tá pro tâ tú pơreăng ăm mâu vâi krâ nhŏng o ki ê, vâ khoh kâi châ hbrâ, tơplâ, mơdât pơreăng COVID-19.

Tung kơpong klâ kơtăn krê la ai hên ngế ối tung Hngêi trung mâm non Họa My a thôn 5, cheăm Quảng Tâm, ngoh Lương Văn Lý, ngế vêh ing kong pơlê Bình Dương, tối ăm ‘nâi:

‘’Á vêh a hâi lơ 3 khế 10, tiô hnê mơhno dêi ƀok thái pơkeăng cheăm mê thế ối klâ kơtăn 14 hâi. Sap ing vêh akố mê á châ test rĕng COVID-19 hên xôh, pơrá hlo âm tĭnh. Tiú kâ koi klâ kơtăn mê krúa lĕm, ôu kâ tŭm môi hâi 3 roh, tơniăn ivá châ chăn. Á hlo tâ hmiân tuăn drêng klâ kơtăn akố’’.

Pôa Nguyễn Quốc Hải – Kăn phŏ hnê ngăn Vi ƀan cheăm Quảng Tâm tối ăm ‘nâi, cheăm nôkố ai lối 60 ngế kuăn pơlê vêh ing kơpong ai pơreăng mâu kong pơlê peăng Hdroh tơnêi têa dế klâ kơtăn krê. Kum vâi krâ nhŏng o hmiân tuăn klâ kơtăn hbrâ mơdât pơreăng, cheăm krếo thế mâu khu tơrŭm cheăng, ngế krê tŏng kum liăn, tơmeăm kâ, pế tê kơtê kum ăm kơpong klâ krê:

‘’Tiô pơkâ dêi khu râ kơpêng mê xo liăn môi hâi ai 80 rơpâu liăn kâ/môi ngế, tá hâi tối liăn têa ôu, mơ-éa ki vâ lăm mơdrah lơ mâu tơmeăm ki ê. Tiô pơkâ cho môi tiah mê laga ngin tá hâi xo liăn. Nôkố tung cheăm ngin dế krếo mâu ngế ki tŏng kum mơngế pá puât veăng tơlo liăn, tŏng kum  tơdroăng ‘’hơniâp kâ 0 liăn’’ ăm vâi krâ tung kơpong klâ krê. Vâi krâ akố cho pá puât ‘nâng, ngin mơ-eăm kơbông krếo veăng tơlo liăn vâ kum tơdroăng pá puât rơtế dêi pó hbrâ mơdât pơreăng roh kố’’.

Môi kơpong klâ krê a cheăm Quảng Tâm, tơring Tuy Đức, kong pơlê Dak Nông

Tung to lâi khế hiăng hluâ, tơring tơkăng kong Tuy Đức, Dak Nông tơdah lối 4.000 ngế kuăn pơlê vêh ing mâu kong pơlê ai pơreăng COVID-19. Krê sap apoăng khế 10 troh nôkố hiăng ai lối 1.200 ngế vêh a pơlê xiâm. Lâp tơring hiăng châ hlo 16 ngế yương tĭnh ƀă COVID-19, pơrá châ hlo a mâu kơpong klâ kơtăn tơkŭm, ôh tá ai ngế tro tâ tung pơlê pơla.

Pôa Trương Đức Minh – Kăn pơkuâ Tíu xiâm ngăn pơkeăng ƀă khăm pơlât tơring Tuy Đức, tối, drêng ai kuăn pơlê vêh ing kơpong ai pơreăng tâk rĕng, Vi ƀan tơring hiăng mơjiâng 7 khu klâ kơtăn krê a tâi tâng mâu cheăm ƀă môi kơpong a Tíu xiâm kal kí tơring. Klâ kơtăn cho troăng pêi ki tơtro vâ hbrâ mơdât pơreăng xông tâ tú tung pơlê pơla. Tiô pơkâ mê, mơngế klâ kơtăn tơkŭm thế nâp liăn 80 rơpâu liăn kâ rêm hâi. Mơhé tiah mê, tơring xuân krếo tơniăn ôh tá xo liăn vâ tŏng kum liăn pơlê hmiân tuăn klâ krê:

‘’ ‘Na troăng hơlâ mê mâu ngế ối tung rơpŏng kơtiê mê ôh tá xo liăn, châ kum tê kơtê, mâu ngế ki ê xuân xo liăn. Ƀă tơring Tuy Đức mê ngin mơhnhôk, veăng tơlo cho tơdroăng pêi pro ki hên. Tơdroăng djâ klâ kơtăn a mâu cheăm cho troăng hơlâ tơtro, châ tơƀrê. Drêng kuăn pơlê châ djâ a mâu cheăm klâ krê, vâi đi đo tâ cho nhŏng xiâm dêi tơná hiăng vêh, mê chiâng mơhnhôk veăng tơlo tŏng kum pế kâ ƀă tŏng kum châ tơƀrê ‘nâng’’.

Môi ngế ki tŏng kum mơngế pá puât a cheăm Quảng Tâm troh tŏng kum liăn ƀă tơmeăm kâ ăm kơpong klâ krê

Tung pơla pơreăng xông tâ tú ó, khôi túa lĕm ‘’tŏng kum dêi pó, ngế ki chía hôm kum ngế ki pá tâ’’ dêi hdroâng mơngế pin hiăng ƀă dế châ kuăn pơlê a tơring kơtiê Tuy Đức pêi pro châ tơƀrê. Tơdroăng tơrŭm môi tuăn, kum dêi pó cho pơkeăng ‘’vaccine’’ châ tơƀrê kum mơdât pơreăng kân COVID-19.

Tuấn Long chêh

A Sa Ly tơplôu ƀă tơbleăng