Tơbleăng ƀă Khu kăn lăm pêi cheăng, pôa Y Thanh Hà Niê Kđăm Kăn hnê ngăn Đảng kong pơlê Lâm Đồng ăm ‘nâi, klêi tơrŭm môi ƀă tơbleăng túa pêi cheăng mâu kăn kong pơlê péa râ, tơdroăng cheăng kâ - rêh ối dêi kong pơlê vâ tối hiăng tơniăn.

6 khế apoăng hơnăm, cheăng kâ tâk 7,9%; xo liăn ngân châ lối 18.800 rơtal liăn; tơ’mot dâng 100 tơdroăng tơkêa bro ‘no liăn cheăng ƀă tâi tâng kơxô̆ liăn chêh hdrối vâ chê 200 rơpâu rơtal liăn. Cheăm dế tơmâng tơkŭm tah mâu tơdroăng tơkêa ối pá tơvâ tơvân, rĕng  tăng liăn ngân ‘no pro tơmeăm khoăng tơnêi têa, mơ-eăm pêi châ tiô pơkâ tâk sap 10% tơngi klêng hơnăm 2026.

Kong pơlê xuân pâ thế Quân ủy trung ương, Khu xiâm pơkuâ ngăn lêng pơtối  tơmâng khât, veăng môi tuăn Tơdroăng tơkêa bro  luât pơkâ, tŏng gum krê mơnhông kơvâ hngêi kơmăi pro bô xít- alumin- nhôm. Tơbleăng a rôh pêi cheăng, Đại tướng Nguyễn Tân Cương pâ thế kong pơlê Lâm Đồng pơtối rak vế pêi pro ki tơ’lêi hlâu,  hlối mơnhông cheăng kâ ƀă ‘mâi mơnhông cheăng lêng, kring tơniăn; mơdêk tơrŭm cheăng pơla mâu lêng tung kring vế tíu tơkăng kong ƀă mơdêk tăng, tơkŭm kơxêng kiâ mơngế ki hlâ ai hnoăng.