*Tung lâp kong pơlê nôkố ai lối 3 rơpâu toăng tuk tơnăng ƀă lối 12.500 ngế cheăng tơnăng. Tung mê, dâng 500 toăng ƀă 2.800 ngế pêi dế tơnăng a tơdế têa kơxĭ; kơxô̆ ki u ối cho tơnăng tot a kĭng têa kơxĭ. Xoăng tiô kơpong, ai 424 to tuk dế tơnăng a kơpong têa kơxĭ Quảng Ngãi – Pơlê kong kân Hồ Chí Minh; 24 toăng a kơpong têa kơxĭ Đồng Tháp – An Giang; 70 toăng a kơpong têa kơxĭ chuăn Hoàng Sa.

Tâi tâng mâu plong tuk kố hiăng châ djâ troh a tíu ối tơniăn; lối hrĭng to tơdrong ki păn ká xi xŏng châ ‘mêng pro kâk, Troăng tơpui tối tơbleăng châ rak vế tro, teăm tối tơbleăng tơdrêng ăm râ kơpêng ƀă tơrŭm tơniăn ƀă kăn pơkuâ, khu ki ai tơdjâk tung tơbleăng mâu tơdroăng.

*Hâi lơ 25/8, Mô đô̆i gâk tơkăng kong kong pơlê Gia Lai hiăng kơbông krếo 3.397 tuk ƀă lối 23.100 ngế kuăn pơlê tơnăng ká xi xŏng troh a kĭng vâ ối tơniăn drêng ai Kong mêi khía mơhot roh má 5 (kong mêi khía mơhot Kajiki).

Vâ hbrâ ví kong mêi khía mơhot roh má 5, Khu pơkuâ Mô đô̆i gâk tơkăng kong kong pơlê Gia Lai hiăng tơbleăng 3 mơ-éa ki thâ pơkâ mâu tíu cheăng thăm séa ngăn, ‘nâi tơ’nôm mâu tơdroăng ‘na kong prâi a kơpong tơkăng kong ƀă kơpong têa kơxĭ; tơdrêng amê tơbleăng, hnê mơhno mâu tuk ‘nâi tíu, troăng prôk dêi khía vâ hbrâ ví, hlŭn lơ ôh tá mot a kơpong rơ-iô. Khu cheăng gâk tơkăng kong hiăng hnê mơhno 626 tuk ƀă 5.147 kuăn pơlê tơnăng ká xi xŏng tot a mâu tíu tuk tot tơniăn; tơdrêng amê kơbông krếo châ 3.397 tuk ƀă 23.104 kuăn pơlê tơnăng ká xi xŏng mot a kĭng ví kong prâi pro ôh tá tơniăn.