Kŏng ti ngăn on tơhrik Dak Lak hiăng ƀă dế mơdêk xúa kŏng ngê̆ thong tin a tơdroăng pêi pro, tê mơdró vâ hơ’lêh nếo, ‘mâi hơ’lêh pơkâ rak ngăn, mơ’no on tơhrik mơdêk ki tơƀrê mâu tơdroăng xúa on tơhrik. Troh nôkố, Kŏng ti hiăng klêi krâ pro kŏng tơ điê̆n tưh vê hdró hơngế ăm 100% ngế tung kong pơlê.

Tâi tâng 599 rơpâu ngế tơmối hiăng hơ’lêh kĭ tơkêa tê rôe on tơhrik ing hlá mơ-éa chiâng kĭ tơkêa điê̆n tưh, tơ ‘lêi po ngăn, tí tăng ngăn mâu tơdroăng ‘na on tơhrik, kơlo kơxô̆ kŏng tơ, hâi ôh tá mơ’no on tơhrik, hnê xúa on tơhrik tơniăn, kơdĭng... bú ƀă tơdroăng chêh pro tơ’lêi hlâu ing Zalo lơ ing ứng dụng rak ngăn tơmối.

Pakĭng mê, Kŏng ti hiăng ăm tâi tâng hồ sơ, hlá mơ-éa chêh, kih thuât chêh a mâu tơdroăng, mâu túa ki chêh ‘măn tung điê̆n tưh vâ chôa ‘lâng mơdêk tơƀrê tơdroăng rak ngăn. Ing mê, kăn ƀô̆ pơkuâ kô hlo um ki khât ‘na on tơhrik, hlá mơ-éa kih thuât dêi mâu tơmeăm, kơmăi ki kố ki mê... rak ngăn tơdroăng chêh pro ing hơngế xuân ‘nâi nhên mâu tíu ki dế ai tơdroăng xía vâ, vâ teăm pêi pro tơdrêng.

Pakĭng mê, PC Dak Lak hiăng kĭ tơrŭm ƀă 15 hngêi rak liăn ƀă 9 khu tơrŭm cheăng ối tơdế, kum ăm tơmối tơ’lêi tung tơdroăng nâp liăn on tơhrik, kơdroh hâi chôu , liăn ‘no lăm troh. Kŏng ti xuân tơrŭm krá ƀă Tíu xiâm rak ngăn tơmối dêi Khu xiâm ngăn on tơhrik Kơpong tơdế tơnêi têa vâ tơdah xo, tơleăng mơnhên mâu tơdroăng pơkâ thế dêi mơngế ki xúa on tơhrik ing ƀâng mê cho. Tổng đài 19001909, email, website ƀă ing măng xah hô̆i (Facebook, Zalo...).