Jâ H’Dit Byă, ối a ƀuôn Dhă Prông, bêng Buôn Ma Thuột, kong pơlê Dak Lak sôk ro ăm ‘nâi, jâ lâp kơtuăn drêng khăm bú jâ to phôn ki ai cài ứng dụng VNeID:

Băng1: (tiếng Êđê) “Sap ing xúa VNeID drêng lăm khăm ôh tá kal xúa theh ƀaoh hiêm khăm pơlât ki chêh ƀă hlá mơ-éa xếo mê tích hợp a phôn râng kong, tơ’lêi tê”.

Tiô riân ngăn, tung hơnăm kố, lâp tung kong pơlê Dak Lak ai lối 6,9 rơtuh ngế khăm, pơlât xúa căn cước công dân; lối 2,5 rơtuh theh căn cước hiăng tơ’mot tâi tâng ƀă theh ƀaoh hiêm khăm pơlât ối xêt. Kố cho tơdroăng ăm hlo roh apoăng tung tơdroăng tơbleăng Tơdroăng tơkêa bro mơnhông xúa ứng dụng ki hiăng ai tung kơmăi ‘na inâi pơlê pơla, định danh ƀă mơnhên điê̆n tưh vâ pơxúa pơ’lêh kơxô̆ tơnêi têa (ki tối cho Tơdroăng tơkêa bro 06) tung kong pơlê.

Thượng tá Võ Hùng Tường, Ngế pơkuâ Kăn sát rak ngăn ‘na tơdroăng pro tơniăn pơlê pơla, Kŏng an kong pơlê Dak Lak ăm ‘nâi, mâu kŏng an hiăng troh tơrêm hngêi hnê kuăn pơlê cài đặt, kích hoặt ƀă xúa tài khoản định danh điê̆n tưh VNeID, malối a kơpong hơngế hơngo, kơpong kuăn ngo. Ing mê, hlê ƀă môi tuăn dêi kuăn pơlê ƀă ‘mâi hơ’lêh cheăng pro hlá mơ-éa, pơ’lêh kơxô̆ châ mơdêk nhên.

“ ‘Nâi nhên ‘mâi hơ’lêh pro hlá mơ-éa tơdroăng ki kal ƀă pêi tơƀrê hlối mơdêk ki tơƀrê dêi mâu tơdroăng cheăng, hlối pro hlâu má môi ăm kuăn pơlê, khu mơdró. Tung pơla hdrối kố nah, ngin hlối pêi tro tơdroăng tăng ‘nâi plĕng ăm mâu kăn Kong an kong pơlê, hlối tơbleăng tơdrêng mâu troăng hơlâ rak ngăn tơdroăng pêi cheăng pro hlá mơ-éa ‘na tơniăn pơlê pơla tung kong pơlê”.

Pêi pro tơdroăng Tơkêa bro 06, tung 3 hơnăm hdrối, kong pơlê Dak Lak hiăng pê klêi tơdroăng xo, pro theh căn cước công dân krâ chíp ăm tâi tâng kuăn pơlê ki vâ pro tŭm; ăm tài khoản định danh điê̆n tưh ăm lối 10.000 kơ koan, khu tơrŭm cheăng. Troh nôkố, vâ chê 10.000 hồ sơ ăm phĭu lý lịch tư pháp châ chêh ‘mot ing VNeID; lối 90% kơpêng 90% pro mâu hlá mơ-éa tung điê̆n tưh, hlo pơ’lêh tơdroăng pro “hồ sơ chêh ƀă hlá mơ-éa” troh chêh ‘mot tung kơmăi cho  “hồ sơ kơxô̆”.

Tơdrêng ƀă tơdroăng pro tơdrêng, chêh ‘mot tung kơmăi ‘na kuăn pơlê, Tơdroăng Tơkêa 06 a Dak lak dế chôa lâng kum pro mâu hlá mơ-éa tiô troăng tơ’lêi, hlâu ƀă tơdrăng tâ cho kuăn pơlê. Hên túa ki nếo môi tiah tơbleăng drêng lăm troh ối chêh tơbleăng ing phần mềm ASM, hlối pro hlá mơ-éa ‘na tơnêi tíu, rak ngăn tơdroăng ‘na mơngế ki xúa tơnêi chêh ‘mot tung kơmăi rak ngăn tơnêi têa ‘na kuăn pơlê, VNeID lơ kiosk ki chêh pro a mâu hngêi pơkeăng pơlât hiăng veăng pro iâ hâi khê tơkôm, kơdroh lăm troh a tíu trâm mâ tơdrêng.

Tiô Đăi tá Trần Bình Hưng, Phŏ kăn pơkuâ Kŏng an kong pơlê Dak Lak, vâ mâu tơdroăng hiăng pêi pro mê châ pơtối pêi krá kak, hnoăng dêi mơngế ối a ko mâu tíu pêi cheăng, kong pơlê ai pơxúa kal khât.

“Ngế ối a ko rak hnoăng cheăng hnê djâ, troăng hơlâ ƀă hnê mơhno mâu kăn ƀô̆, mâu lêng tơbleăng tơdroăng cheăng pêi. Vâ pêi ai pơxúa tơdroăng tơkêa bro 06 tung hơnăm 2025 ƀă mâu hơnăm pơtối, hnoăng ki mê dêi mơngế pơkuâ mâu tíu pêi cheăng, cheăm bêng kong pơlê cho kal păng ‘nâng”.  

Ƀăng tơdroăng veăng tơmâng tơdrêng mối hdroh, pêi kơtăng dêi tâi tâng khu cheăng kal kí, troh nôkố, Dak Lak hiăng ƀă dế pro “tơ’lêi hlâu’’ tâi tâng 102 to cheăm, bêng; pê klêi 108 tơdroăng pơkâ, tiô Pơkâ kơxô̆ 02 dêi Khu hnê mơhno Tíu xiâm ‘na mơdêk hơ’lêh kơxô̆ tung pro hlá mơ-éa, tơdrêng tâi tâng, rĕng hlối pêi tơbrê. Dak Lak cho môi tung mâu kong pơlê ki apoăng tung lâp tơnêi têa pê klêi tơdroăng cheăng hdrối troh hâi pơkâ, ai tiô pơkâ pro rế lĕm khu kăn pêi cheăng ƀă pêi cheăng tiô mâu kăn pơkuâ péa râ.

Tơdroăng pêi tơbrê mê pơtối mơhno ‘mâi hơ’lêh pro hlá mơ-éa rơtế ƀă Tơkŭm khu kăn ƀă pêi cheăng tiô mâu kăn kong pơlê péa râ. Tơdroăng hiăng pêi tơƀrê mê pơtối mơhno ‘mâi hơ’lêh mâu kăn rơtế ƀă trơdroăng Tơkêa bro 06 ôh tá xê to troăng hơlâ kih thuât, mê cho hvêa prôk pơ’lêh tung tơdroăng rak ngăn, veăng mơnhông tơƀrê tung pêi cheăng pro hlá mơ-éa ăm kuăn pơlê, khu mơdró ƀă châ Tíu xiâm tơnêi têa khĕn kơdeăn.