A rôh hôp Khu kăn Đảng ƀô̆ kong pơlê Dak Lak hâi lơ 24/4, mâu kăn hiăng ăm veăng tối ‘na pro rế lĕm, tơ’mot tơdjuôm tíu pêi cheăng ƀă mâu tơdroăng cheăng pêi ki kal. Tiô tơdroăng tơkêa bro Dak Lak kô kơdroh sap 180 chu ối 68 tíu pêi cheăng râ cheăm, châ 62,22% tiô pơkâ 60-NQ/TW. Krê to pơlê kong kơdrâm Buôn Ma Thuột tơ’mot tơdjuôm chiâng 5 bêng ƀă 1 cheăm. Rôh kố xuân vâ môi tuăn ‘na tơdroăng tơkêa bro tơ’mot kong pơlê Dak Lak ƀă Phú Yên, mơjiâng chiâng kong pơlê ki nếo dêi Tíu xiâm, ƀă tíu  xiâm pêi cheăng pro a Dak Lak.

Klêi tơ’mot, tíu pêi cheăng ki nếo ai lối 18.000km2 tơnêi tíu, pơ’leăng mâ mơngế lối 3,3 rơtuh ngế ƀă 102 tíu pêi cheăng râ cheăm. Tối mơgêi hneăng hôp, pôa Nguyễn Đình Trung Kăn hnê ngăn Đảng kong pơlê  pơkâ thế mâu tíu pêi cheăng, kơvâ cheăng dêi Dak Lak tơrŭm krá ƀă Phú Yên vâ tơbleăng pêi mâu tơdroăng cheăng  kô châ tơƀrê, malối tơdroăng mơhno xoăng tíu pêi cheăng, rơxế chơ ƀă tíu ối ăm kăn bô̆ Phú Yên pơ’lêh lăm pêi cheăng a Dak Lak.