Lối 130 kăn teăng mâ châ ‘nâi tơ’nôm mâu tơdroăng xiâm ‘na pơhlêh xúa kŏng ngê̆ internet, tơdroăng pêi cheăng gum hdrông kuăn ngo ƀă tơdroăng ki pơtâng tối, mơhnhôk kuăn pơlê tung tơdroăng rêh ối nếo. Dak Lak nôkố ai vâ chê 1.100 ngế ki kuăn pơlê loi tơngah ối tung 18 hdrông kuăn ngo, ai hnoăng tơdjêp pơla khu râ kăn pơkuâ tơdroăng cheăng Đảng, khu râ kăn pơkuâ ƀă kuăn pơlê mâu hdrông kuăn ngo.

A hôp tơno tơdroăng kal, mâu kăn teăng mâ châ tối pái tơdroăng ki xiâm, mê cho mơdêk tơdroăng xúa kŏng ngê̆ măng internet ăm kuăn pơlê, tơplâ mơdât mâu tơdroăng ki tối ôh tá tro pro tơklâ tơdroăng tơrŭm môi tuăn hdrông kuăn ngo ƀă pêi pro troăng hơlâ hdrông mơngế hneăng hơnăm 2026 – 2035. Tơdroăng pêi kố vâ mơnhông hnoăng ki xiâm dêi mơngế ki kuăn pơlê loi tơngah tung mơnhông mơdêk cheăng kâ - rêh ối pơlê pơla, rak kring tơniăn ƀă tŏng gum kuăn pơlê châ xúa măng internet.