*Vi ƀan hnê ngăn kong pơlê Dak Lak pơkâ thế tơdroăng ki ‘mot tơkŭm mâu tíu hnê hriâm athế tơmiât troh tơdroăng ki kơdroh dâng 50% tíu hnê hriâm, hên tâ kơlo Tơnêi têa pơkâ. Kố cho tơdroăng ki châ tối nhên a rôh hôp ƀă mâu khu râ, kơvâ cheăng ƀă 102 to cheăm bêng ‘na túa pơkâ ‘mot tơkŭm hngêi trung hriâm, drêng Dak Lak cho môi tung 15 to kong pơlê châ Tơnêi têa rah xo tíu pơkâ pêi. Nôkố tung lâp kong pơlê ai 1.238 to tíu hnê hriâm kông lâp.

Túa pơkâ dêi mâu kong pơlê cho kơdroh 462 to hngêi trung, tung pơla Khu ngăn hnê hriâm ƀă hnê mơjiâng tuăn ngoâ rơkê pơkâ thế kơdroh 690 to hngêi trung, tơdrêng amê hlối mơjiâng pro tơ’nôm hên hngêi trung péa râ. Pôa Nguyễn Thiên Văn, Phŏ hnê ngăn Vi ƀan kong pơlê Dak Lak pơkâ thế cheăng ‘mot tơkŭm athế châ pêi pro rơkê, tơtro ƀă rêm kong pơlê; bu kơdroh tíu pơkuâ ngăn, ôh tá pơhlêh tíu hriâm tâp ăm hok tro.

*Viƀan kong pơlê Khánh Hòa nếo môi tuăn troăng pêi rah xo bro lế lĕm tro tíu hnê hriâm tơnêi têa, hbrâ ăm hơnăm hriâm 2026 – 2027. Tiô mơ-éa chêh hdrối, lâp kong pơlê kô kơdroh 248 hngêi trung tơnêi têa, tơdâng 34% tíu hriâm ki ai nôkố, tơxâng pơkâ kơdroh ki vâ iâ 30% tiô hnê mơhno dêi Chin phuh. Nôkố Khánh Hòa ai 728 tíu hnê hriâm tơnêi têa ƀă lối 26.500 kăn ƀô̆ pơkuâ, thái cô ƀă nhân viên.

Klêi kơ’nâi tơmot chiâng môi, mâu hngêi trung ƀă phân hiê̆u xuân rak tơdroăng hnê hriâm, tơniăn tơmeăm khoăng gum ăm hok tro; krê mâu hngêi trung hdrông kuăn ngo ai tíu kâ koi ối pơtê ƀă hngêi trung ki chuyên biệt tá hâi pêi pro tơmot chiâng môi. Ƀă mâu kăn ƀô̆ pơkuâ rơlối, kong pơlê kô séa ngăn pơtroh mâu tíu cheăng ki tơtro lơ pêi pro tơdroăng ki vêh hnê; mâu ngế ki vâ  pơtê kô pro mơ-éa ăm pơtê tiô pơkâ.