Mâu hâi ki kố, 5 ngế tung Tôh pêi cheăng kơxô̆ 1 - Khu pơkuâ ngăn tơdroăng tê mơdró a kơchơ kơxô̆ 4, Khu ngăn ‘na kơchơ tê mơdró kong pơlê Dak Lak hmâ đi đo lăm ngăn a mâu tíu mơdró kơhâi lơ kơmăng, pêi cheăng pa kong chôu kơhâi. Nâ Nguyễn Thị Minh Hạnh, ngế ki séa ngăn ‘na Tôh cheăng ‘na tơdroăng kố tối ăm ‘nâi, mâu ngế ki khu kố dế tơkŭm séa mơnhên ngăn, tí tăng hlê plĕng ‘na tơdroăng pêi chiâk pêi deăng, tê mơdró kâ dêi lối 1.800 tíu cheăng a Ƀuôn Ma Thuột.

“Tơkŭm lăm ngăn a mâu rơpŏng tê mơdró kâ, mê cho khu râ, kơvâ cheăng, mơngế krê vâ hnê tối,  tơbâ hĕn ‘na tơdroăng rak vế ngăn tro mâu tơdroăng pơkâ dêi luât tung tơdroăng pêi chiâk pêi deăng, tê mơdró kâ. Tung mê, pơkâ thế mâu rơpŏng ki rôe xo tơmeăm vâ tê athế rak vế tơniăn ki dâi lĕm, ki xiâm rêi nhên, chêh pơkrâ ƀă tê tro yă pơkâ, ôh tá lôi ai tơdroăng ki pro kơnâ yă ôh ta tro tơdroăng, ôh tá lôi ai tơdroăng ki mơdêk to kơnâ yă, lơ chôu ‘măn kế tơmeăm tơkôm yă to kơnâ ah mơ’no tê dêi; tơdrêng amê, hnối hbrâ rôe ‘măn mâu kế tơmeăm tŭm têk, rak vế tơniăn tơmeăm khoăng tơtro ăm kơchơ tung roh pơla Têt Lo hơnăm nếo”.

Jâ Võ Thị  Bạch Nga, môi ngế kăn pơkuâ ngăn hngêi mơdró kế tơmeăm a bêng Tân Lập, kong pơlê Dak Lak ai tối nhên tiah kố, rêm roh troh mâu hâi ahdrối Têt Lo hơnăm nếo rêm hơnăm, mâu khu râ, kơvâ cheăng pơtối lăm troh hnê tối, mơhnhôk, pơkâ thế mâu rơpŏng hngêi kĭ tơkêa pêi pro mâu tơdroăng cheăng tê mơdró athế tơbleăng yă i nhên, kế tơmeăm ki tơdrăng khât, tro tiô pơkâ.

“Apoăng khế 1 hơnăm 2026, Khu ngăn ‘na pơkuâ ngăn kơchơ hiăng veăng gum, hnê mơhno tối, pơkâ thế rơpŏng hngêi kĭ tơkêa pêi pro, ki má môi mê cho: Rôe ‘mot kế tơmeăm athế ‘nâi nhên xiâm kối ing ahdrối, cho tíu xiâm ki mơjiâng kế tơmeăm mê, rak vế tơniăn, hdró nhên hâi khế ki chiâng xúa. Tâng yă to kơnâ mê athế pêi pro tro tiô pơkâ ki dâi lĕm dêi tơdroăng ki hiăng chêh tối mê".

Pêi pro tiô roh ki tơdrêng, hbrâ mơdât tơmeăm ki pơloi, pro ƀối, tơmeăm ki ôh tá dâi ahdrối, tung ƀă kơ’nâi Têt Lo hơnăm nếo 2026 tiô tơdroăng pơkâ thế dêi Khu hnê mơhno 389 kong pơlê Dak Lak, ing tơdế khế 12/2025 troh nôkố, Khu pơkuâ ngăn ‘na kơchơ kong pơlê Dak Lak hiăng lo tâi tâng vâ lăm séa ngăn ‘na tơdroăng tê mơdró kâ tung kong pơlê, tơkŭm pêi pro mâu tơmeăm khoăng ki xiâm vâ gum tung mâu hâi Têt. Klêi kơ’nâi séa mơnhên ngăn, khu râ ngăn hiăng châ hlo, châ tơleăng 242 tíu ki ai xôi, pơxâu phak lối 2 rơtal 300 rơtuh liăn; tơdrêng amê, mơdrếo xo,  prâu tah lôi hên hĕng mâu kế tomeăm ki ôh tá dâi, kơnâ lối 700 rơtuh liăn.

Pôa Vương Minh Sơn-Kăn pơkuâ ngăn khu rak ngăn kơchơ kong pơlê Dak Lak tối ăm ngin ‘nâi, méluâ a mâu cheăm pêa mâ Hâi Lo ai tơdjâk troh kong mêi kân, têa lân lu, laga, kơpong pêa mâ hâi Lu kuăn pơlê châ xo dêi hên kế tơmeăm, ing mê, tiô tối ahdrối kuăn pơlê ki rôe kế tơmeăm Têt kô tâk sap ing 25 troh 30%. Khu ngăn ‘na tơdroăng cheăng mê kô pơtối hnê tối mâu khu râ ki ai tơdjâk troh thăm mơdêk tơdroăng séa mơnhên ngăn, rak vế krá tơniăn túa pêi chíâk pêi deăng, tê mơdró kâ a kơchơ tiô khôi hmâ ƀă tơdroăng ki tê mơdró kâ tung măng internet.

“Ngin tơrŭm ƀă mâu khu râ Kan sat gak ngăn ‘na cheăng kâ Kŏng an kong pơlê, pro hnoăng mơhá pơkâ pêi pro ahdrêng tung séa mơnhên ngăn, mơnhên hlo tung roh ki kal kân khât kố; tơdrêng amê, hnối thăm mơdêk tâi tâng hnoăng cheăng plâ hâi plâ măng, riân tá hâi tơdrốu ƀă hâi tĭng, vâ tí tăng mơnhên ngăn hngêi kơchơ, ƀă hnối châ tơdah xo tơdroăng tối tơbleăng. Ki xiâm dêi tơdroăng kố, ôh ta ôi ai mâu kế tơmeăm ki pơloi, tơmeăm pro ƀối, tơmeăm ki ôh tá nhên xiâm kối ki tê mơ’no tung hngêi kơchơ, ing mê, vâ kring vế tơniăn ăm kuăn pơlê châ rôe xêh mâu kế tơmeăm ki dâi lĕm tung pơla roh Têt kố”.

Xuân cho khu râ ki kân xiâm tung hneăng ki lăm séa ngăn tung hbrâ mơdât tê mâu tơmeăm pơloi, tơmeăm pro ƀối, tơmeăm ki ôh ta dâi roh kố, lối 1 hơnăm hdrối mê hía nah, Ƀơrô Kan sat gak ngăn ‘na cheăng kâ Kŏng an kong pơlê Dak Lak hiăng châ rup tơleăng 274 xoh, tơleăng 279 ngế ki ai xôi tơdjâk troh mâu tơmeăm ki mơdât, kế ki tê mơdró kâ liu, tơmeăm ki ôh tá dâi; tê mơdró hbrê báu ki ôh tá ‘nâu nhên xiâm kối; pêi mơjiâng, tê mơdró pơkeăng hbrâ mơdât kế pơloi, hât ki mơdró liu, mlŏi ki tê mơdró liu ƀă hên hĕng mâu tơmeăm ki ê. ‘Na tơdroăng ki pơtối tăm mơdêk hbrâ, mơdât mâu tơdroăng pro xôi ahdrối, tung ƀă kơ’nâi Têt Bính Ngọ, Trung tă Trịnh Ngọc Hà, Phŏ Kăn pơkuâ ngăn Ƀơrô Kan sat Cheăng kâ, Kŏng an kong pơlê Dak Lak tối pơtâng, khu kố hiăng vêh mơnhên mâu hnoăng cheăng ki xiâm vâ pơkâ pêi pro tro tơdroăng ki mê.

“Khu xiâm Kan sat gak ngăn ‘na cheăng kâ kŏng an kong pơlê Dak Lak pơtối hbrâ, pêi pro lĕm tro hnoăng cheăng ki plĕng ahdrối, ing hơngế, ing mâu pơlê cheăm, thăm nếo ta tíu ki dế séa ngăn ƀă a măng internet. Ki xiâm mê cho ing mâu troăng prôk ki kân, ki rơhêng vâ tối cho a troăng kân kơxô̆ 1A tơkâ luât mâu kong pơlê mot a Dak Lak, rơtế ƀă mâu tíu ki xiâm, trối kơchơ xiâm, tíu xiâm tê mơdró, mâu plông, tơriah rơxế, mâu tíu ki hmâ tơkŭm pơto chơ kế tơmeăm cho tơmeăm pơloi, tơmeăm pro ƀối, tơmeăm ôh ta dâi. Ing mê, tơrŭm cheăng krá kâk ƀă khu râ, kơvâ cheăng lăm seá mơnhên ngăn, tăng rup ƀă tơleăng mơnhên vâ mâu tíu ki mê tro tiô pơkâ dêi luât”.

Tơdroăng ki hbrâ, pơkâ pêi pro ó rơdêi dêi khu râ, kơvâ cheăng kong pơlê Dak Lak tung hbrâ mơdât, tơplâ ƀă mâu khu ngế ki ai tơdroăng pêi mơjiâng, pơto, tê mâu tơmeăm pơlo, tơmeăm pro ƀối,  tơmeăm ki ôh tá dâi tung roh Têt Bính Ngọ hơnăm 2026 dế vêh pơtroh mâu tơdroăng ki ai pơxúa kân khât. Hngêi kơchơ kố cho roh Têt ki pơtối châ séa mơnhên ngăn krá tơniăn, kế tơmeăm ki vâ tơtro tio tơdroăng ki châ rak ngăn mâu tơmeăm dâi khât, veăng gum vâ kuăn pơlê hmiân tuăn rôe mâu tơmeăm khoăng,  koh tơdah Têt tơniăn, tŭm têk ƀă tơniăn lĕm.