Dak Lak tơkŭm tâi ivá ‘mâi mơnhông xơpá klêi kơ’nâi kong mê khía mơhot têa lân lu, mơdêk hiâm mơno tơrŭm, khŏm mơ-eăm pêi pro klêi mâu tơdroăng pơkâ pêi mơnhông cheăng kâ rêh ối pơlê pơla, ki kal cho pơkâ thế thăm mơnhông péa kơxô̆ tung hơnăm 2026. Kố cho túa pơkâ pêi châ mơ’no a Hneăng hôp rôh má Péa, Hô̆i đong hnê ngăn kong pơlê hneăng X, nếo mơgêi a kơxê lơ 24/12.

A hneăng hôp mâu kăn hiăng môi tuăn tơbleăng 24 tơdroăng pơkâ ki kal, pro ivá ăm mơnhông cheăng kâ rêh ối pơlê pơla hơnăm 2026 ƀă hơnăm 2026 – 2031, môi tiah: mơdon hâi khế xoăng liăn ƀă mâu tơdroăng tơkêa bro xúa liăn kong pơlê; xoăng liăn tơnêi têa ‘mot tơ’nôm ai pơkâ pêi hơnăm 2026; pơkâ Ƀảng yă tơnêi a kong pơlê Dak Lak ƀă hên ki ê.

Kăn pơkuâ kong pơlê Dak Lak pơkâ thế sap ing nôkố troh Têt khôi hmâ Bính Ngọ 2026, mâu kơvâ cheăng tơtrŏng pêi pro tro troăng hơlâ tŏng gum rêh ối pơlê pơla, tŏng gum kuăn pơlê; tơbleăng pêi tơƀrê mâu tơdroăng tơnêi têa pơkâ pêi ‘na kơdroh kơtiê krá ton ƀă mơnhông cheăng kâ rêh ối pơlê pơla kơpong kuăn pơlê hdroâng kuăn ngo. Ki hdrối tâ, kal tơkŭm tŏng gum kuăn pơlê ‘mâi mơnhông cheăng kâ, tơniăn tơdroăng rêh kâ ối, hmiân tuăn tơdah Têt.